Read Batak Angkola JEHESKIEL 15 Bible Online

JEHESKIEL 15 - Batak Angkola bible

JEHESKIEL 15

¹Dung i ro ma hata ni TUHAN tu au:

²“Ale anak ni jolma, aha dehe halobian ni bona ni anggur sian bona ni hayu na asing na di harangan i, na mamparbatuhon parbatu na tudos tu anggur?

³Tarbaen ma he hayuna i gabe bagi aha? Tarbaen ma he i gabe sangkotan ni parkokas?

⁴Nada adong guna ni i asing sian baenon soban. Jana muda dung abis mosok ujungna na dua i mosok muse ditonga-tonga, adong dope he guna ni i?

⁵Nada adong be i! Salang painte so ditutung, na so tarpagunahon do i. Mur ma dung ditutung jana gabe tiranggong dibaen api, tarpake dope he i mambaen parkokas?”

⁶Jadi hara ni i didok Tuhan DEBATA i ma, “Songon bona ni anggur na nibuat sian harangan jana ditutung, songon i muse ma giot baenonKu halak Jerusalem!

⁷Au sandiri angkon mangalo halahi. Haru pe malua halahi sian api, tapi panganon ni api i do halahi. Jadi botoonmunu ma bahaso Au do TUHAN hatiha Hualo halahi.

⁸Nada setia halahi tu Au, jadi hara ni i, Hubaen ma luat i gabe mamolngit, Au Tuhan DEBATA madung mandok songon i.”