Read Batak Angkola JEHESKIEL 2 Bible Online

JEHESKIEL 2 - Batak Angkola bible

JEHESKIEL 2

¹Marnida i, tinggang ma au manungkap tu tano. Dung i hubege ma sora na mandok, “Jongjong ma ho, ale jolma parsantongkinan anso mangkatai Au dohot ho.”

²Di na hubege sora i, masuk ma Tondi i tu bagasan diringku jana dipajongjong ia ma au. Dung i hubege ma mangulahi sora i mandok,

³“Ale jolma parsantongkinan, Husuru ho tu angka halak Israel na dung mangalo tu Au. Pangalo do halahi lopus tu saonnari laing songon ompu ni halahi i.

⁴Sijogal roha do halahi jana nada dipasangap halahi Au. Husuru ho tu halahi laho palaluhon sanga aha na Hudok tu halahi, Au do Tuhan DEBATA mandok,

⁵sanga na ra do halahi manangihon sanga nada; na porlu, angkon botoon ni halahi do, bahaso na adong do panurirang di tonga-tonga ni halahi.”

⁶Tapi anggo ho ale jolma parsantongkinan, ulang ho mabiar mida angka jolma pangalo i sanga mida na ni pardokkonan ni halahi. Aloon jana palayason ni halahi do ho, lopus songon na mangolu di tonga-tonga ni duri sanga na tada-tada sanga na di tonga-tonga ni halak ho. Haru pe songon i, ulang ho mabiar.

⁷Palalu ma sude na Hutonahon tu halahi, sanga ra pe halahi manangihon i sanga nada. Ingot ma, angka pangalo do halahi.

⁸“Ale jolma parsantongkinan, tangihon ma sanga aha na Hudok tu ho. Ulang dohot muse ho mangalo. Pangangang ma pamanganmi, jana pangan ma sanga aha na Hulehen di ho.”

⁹Dung i huida ma tangan na surdu tu au. Ditangan i adong balunan ni karotes,

¹⁰na marsurat angkup bariba. Dung i dibuka ia ma balunan i jana tarsurat do disi andung, holos dohot angguk-angguk.