Read Batak Angkola JEHESKIEL 20 Bible Online

JEHESKIEL 20 - Batak Angkola bible

JEHESKIEL 20

¹Di tanggal sampulu bulan lima, di taon papituhon hatiha habuangannami, ro ma piga-piga halak pamimpin ni Israel mandapotkon au laho mangido panogu-noguon ni TUHAN. Dung marjuguhan be halahi di jolongku,

²hubege ma mangkuling TUHAN tu au,

³“Ale jolma parsantongkinan, manghobari ma ho dohot angka pamimpin i jana dok ma bahaso Au Tuhan DEBATA mandok songon on, ‘Na puluk ma hamu antong mangido panogu-noguon tu Au! Hara ni Au, Debata na mangolu, nada ra Au anggo hamu do mangido panogu-noguon sian Au! Au Tuhan DEBATA madung mandok songon i.’

⁴Ale jolma parsantongkinan, madung he hobas ho laho manguhumi halahi? Aha dope, dalankon ma! Sungguli ma tu parningotan ni halahi sandok hagigian na nipambaenan ni ompu ni halahi.

⁵Palalu ma sanga aha na Hudokkon on, “Madung Hupili Israel jana Hupudun janji dohot halahi. Di Mesir, Hupapatar do Au tu halahi jana Hudok, ‘Au do TUHAN Debatamu.’

⁶Marjanji do Au di hatiha i giot maroban halahi ruar sian Mesir manuju tu tano na Hutodo di halahi. Tano na mora jana na napu do luat i, i ma tano na dumenggan di portibi on sudena.”

⁷Husuru halahi mangambungkon sude patung sihagigian na ni hagiotan ni halahi i, jana Huorai halahi pahodarkon dirina marhite na marsomba tu angka gana-ganaan na sian Mesir, angke Au do TUHAN Debata ni halahi.

⁸Tapi dialo halahi do Au jana nada ditangihon halahi. Nada ra halahi mangambungkon angka patung sihagigian i jana nada ra halahi mantak marsomba tu gana-ganaan ni Mesir i. Dompak disi dope halahi madung hobas Au palalu murukKu tu halahi.

⁹Tapi nada Hupalalu i anso ulang marlayas goarKu dibaen angka bangso di tano na niinganan ni halahi. Harana na dung Hupabotohon do tu bangso Israel di jolo ni angka bangso-bangso i, na giot obanonKu halahi ruar sian Mesir.

¹⁰Jadi Huoban ma halahi ruar sian Mesir tu parhorsihan.

¹¹Disi ma Hulehen tu halahi angka parentangKu jana Huajarkon angka tona na sian Au sioloan ni halahi, angke mangolu do tongtong sanga ise na patuluskonsa.

¹²Husuru do halahi pasangapkon Ari Sabat songon tanda ni parjanjianKu dohot halahi, laho paingotkon halahi paboa na dung Huhapunjungkon halahi di Au, Au TUHAN mangkapunjungkonsa.

¹³Hape di padang parhorsihan i, dialo halahi muse do Au. Dilaosi halahi do angka tona na sian Au na manjamin mangolu tongtong sanga ise na patuluskonsa. Gabe hodar jana ramun dibaen halahi Ari Sabat i. Hara ni i, di parhorsihan i madung nian hobas Au laho palalu murukKu tu halahi dohot mamusa halahi.

¹⁴Tapi nada tulus Hupalalu hara ni na manjago sangap ni goarKu anso ulang marlayas goarKu dibaen angka bangso-bangso na marnida Au maroban Israel ruar sian Mesir.

¹⁵Di parhorsihan i pe laing marjanji do Au mandok, na so obanonKu bangso Israel i masuk tu tano na dung Hupasingkop i di halahi, tano na denggan boti na napu jana na dumenggan di sandok portibi on.

¹⁶Hubaen pe janji i hara ni na dipasiding ni halahi do angka parentangKu, dilaosi halahi angka tona na sian Au jana ramun dibaen halahi Ari Sabat. Gumonan do di halahi marsomba angka gana-ganaan ni halahi.

¹⁷Tapi dung i ibo do rohangKu di halahi, gabe nada tulus Hubunu halahi di parhorsihan i.

¹⁸Tapi sabalikna, Hupaingot ma angka bagian na umposo sian halahi, Hudok songon on, ‘Ulang ma ihutkon hamu angka aturan na nibaen ni angka ompu na umpompar hamu. Ulang tiru hamu hasomalan ni halahi jana ulang ramun baen hamu dirimunu marhite na dohot marsomba angka debata ni halahi.

¹⁹Hudok ma tu halahi: Au do TUHAN Debatamunu. Oloi hamu ma tona dohot parentangKu.

²⁰Parbadia i ma Ari Sabat i na gabe tanda ni parjanjianKu dohot hamu, laho pasunggulkon tu rohamu paboa Au do TUHAN Debatamunu.’

²¹Hape angka na umposo i pe manggagai do tu Au. Dilaosi halahi do angka tona na sian Au jana dipasiding halahi do parenta na sian Au, na manjamin tongtong mangolu sanga ise na mandalankonsa. Jadi hara ni i madung hobas Au laho palaluhon murukKu maradopkon halahi di parhorsihan i jana mamunu halahi sude.

²²Tapi nada Hupalalu songon i laho manjago anso ulang marlayas goarKu dibaen bangso na marnida Au maroban Israel ruar sian Mesir.

²³Laing marjanji muse ma Au di parhorsihan i mandok na giot paserahonKu halahi tu sandok portibi on,

²⁴hara ni na dipasiding ni halahi angka parenta na sian Au, dilaosi halahi angka uhumKu, ramun dibaen halahi Ari Sabat, jana laing tontong do halahi marsomba angka debata na nisomba ni ompu ni halahi.

²⁵Dung i Hulehen ma tu halahi uhum na so denggan dohot angka parenta na so margogo mangalehen ngolu.

²⁶Hupadiar noma halahi pahodar dirina marhite haul ni halahi sandiri, salang angka anak siangkaan ni halahi dipelehon halahi. Songon i ma Hubaen manguhumi halahi anso diboto halahi Au do TUHAN.

²⁷Antong, ale jolma parsantongkinan, pabolkas ma tu halak Israel, sanga aha na Hudok, Au Tuhan DEBATA mandok tu halahi: On ma tudosan na asing na patuduhon sanga songon dia pambaen ni ompumunu i mangalayasi Au jana naso burju maradophon Au.

²⁸Huoban ma halahi tu tano na dung Hujanjihon tu halahi. Di na niida ni halahi angka dolok na gincat dohot angka hayu na rumbun, dipelehon halahi ma haul tu sude hayu dohot dolok i. Dialap-alapi halahi ma anso muruk au marhite angka haul situtungon dohot pelean anggur ni halahi i.

²⁹Marsapa ma Au tu halahi, ‘Inganan na gincat aha do na nitopotmunu i?’ Jadi mamungka sian hatiha i, margoar ma angka inganan i, ‘Angka inganan na gincat?’[5]

³⁰Jadi palalu ma tu halak Israel sanga aha na Hudok, Au Tuhan DEBATA mandok tu halahi, ‘Biasi dibaen hamu angka dosa songon na nipambaenan ni ompumunu? Laing songon halahi, hamu pe mangihut do tu angka gana-ganaan hagigian i.

³¹Jana lopus tu sadari on pe dipahodar hamu do dirimunu marhite na maroban pelean dohot na manutungi angka dakdanakmunu baen haul tu angka gana-ganaan i. Antong laing puluk dope he hamu mangido panogu-noguon tu au? Hara ni Au na mangolu, Tuhan DEBATA, nada Huloas hamu mangido panogu-noguon sian Au.

³²Giotmunu nian tudos ma hamu dohot angka bangso na asing i dohot tu halak na maringanan di tano sileban na manyomba hayu dohot batu. Tapi nada lalu anggo giot ni rohamunu.’ ”

³³“Mangasahon Au na mangolu, ninna Tuhan DEBATA, Hupaingot hamu, hara ni murukKu koras jana tegas noma baenonKu mamarenta hamu lopus dihilala hamu kuasongKu. PalagutonKu ma hamu jana obanonKu sian sude luat inganan parserahanmunu.

³⁴

³⁵Jadi obanonKu ma hamu tu ‘Halongonan Ni Angka Bangso.’[6] Disi ma hamu uhumanKu paado-adop bohi be,

³⁶songon na Hubaen tu angka ompumunu di Parhorsihan Sinai. Au Tuhan DEBATA madung mandok songon i.”

³⁷“ParmahanonKu ma hamu songon biri-biri, padalanonKu hamu sian toru ni tungkot harajaan, jana pamasukon tu bara jana mangetong hamu.

³⁸PaorotonKu ma sian tonga-tongamunu angka halak pangalo dohot parjahat. ObanonKu halahi haruar sian inganan ni halahi saonnari jana nada paloasonKu mulak tu tano Israel. Jadi gabe botoonmunu ma bahaso Au do TUHAN.”

³⁹Didok Tuhan DEBATA i ma, “Ale hamu halak Israel, saonnari saguru di hamu ma. Toruskon hamu ma mambaen dosa, marhite na marsomba gana-ganaanmunu i! Tapi ingot hamu ma, anggo dung salpu i angkon oloanmunu do Au jana ulang be pajat hamu goarKu na badia i marhite na maroban pelean tu angka gana-ganaanmunu i.

⁴⁰Angke di tano Israel, di puncu ni dolokKu na badia i, hamu sude bangso Israel, disi ma sombaonmunu Au. Disi ma sonang rohangKu mida hamu jana Hupangido hamu maroban tu Au angka haulmunu na dumenggan dohot angka silehen-lehenmunu na gabe hapunjunganKu.

⁴¹Dung Huoban hamu haruar sian angka luat inganan parserahanmunu, palagutonKu ma hamu jana jagitonKu ma sude haul situtungonmunu. Jadi gabe botoon ni sandok bangso ma Au do TUHAN.

⁴²Muda dung Huoban hamu tu tano Israel mangulahi, tu tano na Hujanjihon tu ompumunu i, gabe botoonmunu ma bahaso Au do TUHAN.

⁴³Taringot ma tu rohamunu disi sude pambaenanmunu na so ture na dung pahodarkon dirimunu. Jadi gabe sobalan ma hamu paingot-ingot sude hajahatan i.

⁴⁴Jadi muda dung Hubaen tu hamu hombar tu hasangapan ni goarKu, jana nada marguru tu pangalahomunu na jat dohot tu pambaenanmunu na jahat i, botoonmunu halak Israel ma Au do TUHAN. Au Tuhan DEBATA madung mandok songon i.”

⁴⁵Didok TUHAN ma tu Au songon on,

⁴⁶“Ale anak ni jolma parsantongkinan, ligi ma adop Selatan. Gorahon ma tano na di Selatan jana songgot ma harangan na disi.

⁴⁷Suru ma ditangihon harangan i sanga aha na Hudok, Au Tuhan DEBATA mandok tusia, ‘Tangihon! PagaraonKu ma api manyurbu sude hayu na adong di ho, na mahiang dohot na rata. Nada tarintopi api na gara-gara. Mangararati ma i sian Selatan tu Utara, jana hilalaon ni sude jolma do milasna.

⁴⁸Botoon ni halahi ma Au do TUHAN na pagarahon api i, jana sahalak pe nada adong na lobas mangintopisa.’ ”

⁴⁹Jadi hudok ma: “O ale Tuhan DEBATA, didok halahi tu au: Nada he hum angka hata sindiran do didok ia?”