Read Batak Angkola JEHESKIEL 23 Bible Online

JEHESKIEL 23 - Batak Angkola bible

JEHESKIEL 23

²“Ale anak ni jolma, adong ma dua anak boru na martinadohon.

³Taran poso halahi, maringanan di Mesir do. Disi ma mago habunjingon ni halahi, lalu gabe siboru jalang ma halahi.

⁴Goar ni siangkaan i si Ohola; i ma gambaran ni Samaria. Goar ni anggina i si Oholiba, i ma na manggambarkon Jerusalem. Kawin ma Au dohot halahi na dua jana adong ma dakdanak sian halahi na dua.

⁵Haru pe na dung ripengKu si Ohola, laing tongtong do ia manggampang jana sai gintal do dihilala ia laho mangoloi angka haholongan ni rohania na sian Asur.

⁶Angka tentara na marbaju saragam na rara bunga torung do halahi, angka na mora-mora, dohot angka parpangkat na timbo; angka perwira ni parangan na markudo do halahi boti na tongam-tongam.

⁷Dohot angka halak na godang i ma si Ohola marhamainan. Mardomu hara ni gintalna marhalaklahi, dipahodar ia ma dirina marhite na manyomba angka gana-ganaan.

⁸Laing torus ma ia marhamainan songon na nibaennia taran di Mesir, di na mago disi habujingonnia. Mamungka sian hamenehannia, na dung dipodomi jana dibaen do ia songon panggampang.

⁹Jadi gabe Hupasahat ma ia tu angka haholongan ni rohania i, tu angka halak Asur na sai dihalungunkon ni rohania i.

¹⁰Dipasalang halahi ma ia songon i, lalu dibunu dohot podang jana dirampas angka anaknia halaklahi dohot dadaboru. Ia pe gabe dohot do dibunu. Sanga di dia, bagiannia i noma sihata-hataan ni sandok dadaboru.

¹¹Haru pe diligi angginia, si Oholiba na masa i, tapi gumogo dope hagiotnia marhamainan ulang pado angkangna.

¹²Si Oholiba pe santak do por ni rohania di angka halak Asur i, i ma angka doli-doli na tongam na sian parangan na markudo, angka namora dohot parpangkat na timbo, maradu angka tentara na marpakean saragam na rara bunga torung i.

¹³Nada ture Huida si Oholiba i laing songon i angkangna i.

¹⁴Mur honok, mur so ture do si Oholiba. Sai na jeges do di rohania angka gambar na digorgahon di dingding suman-suman ni halak Kasdim jana na dirarai dohot mudar.

¹⁵Na mamake bobat na jeges dohot saroben marrambu di uluna. Suman tu angka perwira ni Babel do digambarkon disi, na mamake kereta porang, Kasdim do huta hasoranganna.

¹⁶Disi diida si Oholiba angka gambar i, manigor gintal ma hagiotnia jana ditongos ia ma ontang-ontang tu angka perwira i di Babel.

¹⁷Jadi marroan ma halahi antong jana rap modom dohot ia. Songon i ma hodarna dibaen halahi, ujungna gabe magigi ma rohania mida halahi.

¹⁸Dung salpu i, torang noma ia marhamainan jana dipatondurkon ia hailaannia tu halak na bahat. Magigi Au midasa, songon gigi ni rohangKu mida angkangnia i.

¹⁹Mur honok mur jotjot ma ia marhamainan, nada adong be asingna sian dompak di haposoonnia taran marhamainan ia di Mesir.

²⁰Sun do gintalnia paida-ida halaklahi na dung manggogo rohana marhamainan dohot na marhagiot songon gogo ni hagiot ni kudo jantan.

²¹Diparhagiot rohamu do hagatalon hatiha haposoonmu, hatiha dijama-jama halak Mesir andoramu jana mangapus-apus adopmu dompak dihabujinganmu.”

²²Didok Tuhan DEBATA i ma, “Ale Oholiba, madung magigi ho di angka haholongan ni rohami, tapi jajangonKu ma halahi anso muruk tu ho jana hobuhonna ho.

²³PalagutonKu jana obanonKu ma tu ho sude haholongan ni rohami sian Babel, Pekod, Soa, Koa, Asur maradu angka Kaldea. Huobani tu ho angka doli-doli na tongam jana na gincat pangkatna, na mora-mora, halak na godang dohot angka perwira ni parangan na markudo.

²⁴Hobukon ni halahi ma ho sian Utara dohot tentara na bahat, dohot angka kareta porang dohot angka kareta na maroban bohal. Hobukon ni halahi ma ho, marhite parlindungan ni parince dohot angka kupia baja. PadiaronKu do halahi manguhumi ho mangihutkon angka aturan ni halahi sandiri.

²⁵Hara ni na muruk Au tu ho, Hupadiar halahi jingar tu ho. Rampingkonon ni halahi igungmu dohot pinggolmu jana buaton ni halahi angka dakdanakmu jana tutungonna mangolu-olu.

²⁶Pasalangonna ho jana angka barang-barang parhiasanmu rampasonna.

²⁷Songon i noma baenonKu laho mangantak panggintal ni hagiotmu dohot sude parhamainonmu na nibaenmu mamungka taran di Mesir dope ho. Nada be marpos ni roha ho tu gana-ganaan sanga taringot rohamu tu Mesir.”

²⁸Didok Tuhan DEBATA i: “PasahatonKu ma ho tu angka jolma hagigian na nihasogohon ni rohamu.

²⁹Dibaen goyak do roha ni halahi tu ho, rampason ni halahi ma sude suha ni halolojamu. Tadingkononna ma ho nada adong sada bonang alit di pamatangmu songon dadaboru panggampang jana gabe sitontonon ni halak na bahat. Patunda ni gintalna ma hagiotmu dohot hajorngangonmu,

³⁰baen na ro bagianmu na jatjat on tu ho. Gabe siboru panggampang ho di angka bangso jana dibaen ho dirimu gabe ramun marhite angka gana-ganaan ni halahi.

³¹Diihutkon ho do indege ni angkangmi, jadi hara ni i painumonKu ma tu ho piala ni uhuman, songon na dung Hupainumkon tu angkangmu.”

³²Didok Tuhan DEBATA i ma, “Angkon inumonmu do isi ni piala ni angkangmi. Godang jana bagas do mangkuk i. Gok incak dohot bura do isina, angkon taononmu ma i sian ganop jolma.

³³I ma na mambaen ho mabuk jana susa, piala hasesego dohot biar do piala ni Samaria, angkangmi.

³⁴Inumonmu ma sian piala i maradu dilatanmu angka tapor-tapor ni piala, jana sibak-sibakonmu ma adopmu. Au do na mandok i ninna Tuhan DEBATA.”

³⁵Didok Tuhan DEBATA i ma, “Hara ni na dihalupahonmu Au jana dihudukkon ho, manaon parkancitan noma ho patunda ni gogo ni hagiotmu dohot parhamainonmu.”

³⁶Didok TUHAN ma tu au, “Ale jolma parsantongkinan, madung he hobas ho laho manguhumi si Ohola dohot si Oholiba? Gorahon ma halahi salaho tu hahodaron na nibaen ni halahi.

³⁷Marhamainan do halahi dohot mamunu jolma; madung marhamainan halahi dohot angka gana-ganaan jana dibunu halahi angka dakdanakKu na nitubuhon ni halahi, madung dipelehon halahi angka dakdanak i tu angka gana-ganaan ni halahi.

³⁸Jana nada i sajo dope. Hodar muse do dibaen halahi inganan na badiangKu dohot Ari Sabat na dung Hutontuhon i.

³⁹Di angka ari disi dibunu halahi angka dakdanakKu jana dipelehon halahi tu angka gana-ganaan, ro ma sidua halak na martinadohon i tu inganan na badiangKu lalu pahodarkonsa!

⁴⁰Mur ditongos halahi muse dope ontang-ontang tu angka halaklahi di angka luat na dao jana ro be do i. Laho manyambut angka tamu i, maridi ma na martinadohon i, mamake colak ni mata dohot mamake angka barang parhiasan.

⁴¹Dung i juguk ma halahi di ginjang ni podoman na jeges. Adong ma meja di jolo ni halahi dohot angka sipanganon na tabo; songon i muse dupa dohot miak zetun na Hulehen di halahi.

⁴²Tarbege ma sian ruar sora ni halak na bahat gaor hara ni sonang ni rohana. Angka halak na diundang do i na ro sian halongonan. Dipamasuk halahi ma golang tu tangan ni na martinadohon i jana dibaen halahi ma angka jarunjung na jeges tu ulu ni halahi.

⁴³Dung i ning rohangKu ma, ‘Ra dope ulaning angka jolma i mardongan-dongan dohot angka siboru panggampang na busuk i hara ni parhamainonna i?’

⁴⁴Margonti-gonti ma halahi mandapotkon si Ohola dohot si Oholiba, siboru panggampang na busuk sidua halak i.

⁴⁵Tapi, angka halak na tutu alim angkon manguhumi halahi songon halak na manguhumi angka dadaboru na markarosuan, jana na mamunu, angke angka dadaboru na markarosuan do halahi jana tangan ni halahi pe sap mudar.”

⁴⁶Didok Tuhan DEBATA i ma, “Padiar ma bangkit sarombongan jolma laho mamparkanciti dohot mangarampas siboru panggampang na dua i.

⁴⁷Padiar ma didangguri halahi dohot batu jana dibunu dohot podang. Padiar ma dibunu angka dakdanak ni halahi jana disurbu angka bagas ni halahi.

⁴⁸PangabisonKu harorangan na songon i sian sude luat on. Sipatondit ma na Hubaen i tu sude dadaboru anso ulang marhamainan songon sidua halak na martinadohon i.

⁴⁹Ale Ohola dohot ho Oholiba, uhumanKu noma hamu hara ni na marhamainan hamu dohot marsomba tu gana-ganaan. Jadi gabe botoonmunu ma Au do Tuhan DEBATA i.”