Read Batak Angkola JEHESKIEL 24 Bible Online

JEHESKIEL 24 - Batak Angkola bible

JEHESKIEL 24

¹Di tanggal sampulu bulan sampulu, di taon pasambilankon habuangannami, didok TUHAN ma tu au,

²“Ale jolma parsantongkinan, suratkon ma tanggal sadari on, angke sadari on ma mamungka dihobuk raja ni Babel kota Jerusalem.

³Dokkon ma sada umpama tu halak pambarontak jana dokkon ma tu halahi: Songon on do hata ni Tuhan DEBATA, ‘Payakkon ma huali di ginjang ni api, payakkon ma, jana baen ma muse aek tu bagasan.

⁴Pamasuk ma juhut tu bagasan juhutna i, i ma juhut na dumenggan; juhut ni tamparan dohot hae-haena maradu holi-holi na gok sumsumna.

⁵Pake ma juhut ni biri-biri na poso na hamokmohanna tambai muse ma dohot sobanna. Padiar ma gurguran jana marhusor aekna i lompa ma juhutna i rap dohot holi-holina i.”

⁶Didok Tuhan DEBATA i ma, “Marjaya ma kota i na gok dohot sibunu jolma! Songon huali na tasikon na so unjung dibasu do kota i. Diparuar ma juhut i sian bagasan sasangkorot, lopus nada adong be na tinggal.

⁷Masa do di kota i mamunu jolma, tapi nada durus tu tano mudar ni na hona bunu i, tapi tu ginjang ni batu na pir do, jadi nada tartimbun.

⁸Hupadiar do mudar i disi gabe tarida jana mangido balos.”

⁹Didok Tuhan DEBATA i ma, “Marjaya ma kota i na gok dohot sibunu jolma! Au sandiri ma mangatur sobanna laho manyurbusa.

¹⁰Tambai ma sobanna! Hirpasi apina i! Lompa ma juhutna i! Ambungkon aekna i. Tutungi ma holi-holina i!

¹¹Saonnari baen ma hudon loyang na rumar i di ginjang ni api i jana padiar disi lopus mosok marrara. Dung mosok tasikna i, baru ma ias hudon i mangulahi mangihutkon aturan ni ugamo.

¹²Parcuma do halojaonKu, angke harat na hapal i nada ra mago haru pe madung ditutung tu api.

¹³Ale Jerusalem, angka pambaenanmu na so ture i, i do mambaen hodar ho. Madung Hucubo nian paias ho, hape nada adong gunana, angke torus do ho hodar. Nada be ra ho ias mangulahi lopus Hupalalu rimasKu tu ho.

¹⁴Au Tuhan DEBATA, madung mandok songon i. Madung dapot hatihana di Au laho martindak. Indangkon na ra Au manghalupahon dosami jana ampunanKu sanga gabe ibo rohangKu tu ho. Hona uhum do ho hombar tu sasude pangalahomu. Au Tuhan DEBATA, madung mandok songon i.”

¹⁵Didok TUHAN ma tu au,

¹⁶“Ale jolma parsantongkinan di sada hatiha buatonKu ma jolma hasudungan ni rohamu. Tapi nada tola mangandung sanga tangis ho, sanga pe padiarkon marabur ilumu.

¹⁷Ulang jabat tarbege partangismu. Ulang be mardalan na so mamake tutup ni ulu sanga na so marlapik patmu, songon halak na di bagasan siluluton. Ulang tutupi muse bohimu jana ulang pangan roti siluluton.”

¹⁸Dihatiha manyogot mangkatai au dohot bangso i, bornginna i marujung ma ngolu ni dongan saripengku. Ancogotna i hubaen ma sanga aha na niparentahon i tu au.

¹⁹Disapai rayat i ma, “Biasi songon on dibaen ho amang? Aha ma arti ni on di hami?”

²⁰Jadi hudok ma tu halahi: “Madung ro hata ni TUHAN tu au:

²¹Dokkon ma tu halak Israel; songon on do didok Tuhan DEBATA satutu-tutuna pahodaronKu ma inganan parbadiaanKu, kuaso na dipangasahonmu, hasonangon ni matamu dohot rohamu; dohot anakmu halaklahi dohot dadaboru na nitinggalkonmu angkon mate rumpak dibaen podang.

²²Jadi baenonmunu ma songon na hubaen on saonnari. Nada tutupanmunu bohimunu sanga panganonmunu roti siluluton.

²³Nada mardalan hamu na so mamake tutup ni ulu sanga tapak-tapak ni pat, nada mangandung sanga tangis. Mur markancit ma hamu patunda ni angka dosamunu i; humolos be ma hamu na sada tu na asing.

²⁴Jadi au si Jeheskiel, gabe tudosan ma au di hamu; baenonmunu ma songon na hubaen on saonnari. Pandok ni TUHAN, muda dung tulus tarjadi na songon on, botoonmunu ma Au do Tuhan DEBATA.”

²⁵Didok TUHAN ma tu au, “Antong, ale jolma parsantongkinan, buatonKu noma sian halahi bagasKu na tohong i, na gabe hagodangan dohot hasonangan ni roha ni halahi jana na nitatap bope na nidapotkon ni halahi di bagasan jop ni roha. Laing buatonKu muse ma angka dakdanak ni halahi.

²⁶Di ari na patulusonKu songon i, ro ma sada halak na tarbaen paluahon dirina sian hamagoan i jana paboaonna ma barita i tu hamu.

²⁷Laing di na sadari i tarbaen ho ma manghobari mangulahi jana nada ngungu be ho. Jadi manghobari ma ho dohot jolma i. Songon i ma pangalahona gabe tanda ma ho di halahi; jadi gabe botoon ni halahi ma Au do TUHAN.”