Read Batak Angkola JEHESKIEL 26 Bible Online

JEHESKIEL 26 - Batak Angkola bible

JEHESKIEL 26

¹Di tanggal sada di sada bulan[8] di taon pasabolaskon habuangannami, mangkuling ma TUHAN tu au mandok,

²“Ale jolma parsantongkinan, marsurak-surak do halak Tirus lalu mandok, ‘Madung maronco Jerusalem! Gogona di parboniagaan madung mago! Nada be imbangta i!’ ”

³Didok Tuhan DEBATA i ma, “Au ma musumu, ale Tirus! ObanonKu ma bahat bangso laho mamorangi ho, jana parro ni halahi songon ombak ni laut.

⁴Sarsarkonon ni halahi ma angka tembokmu jana rumpakkononna ma angka palas-palasmu. Sude tano na adong disi paisonKu noma i, hum sada batu na mahiang sajo noma na tading di tonga laut.

⁵Di ginjang batu i ma angka parlaut manjomur jala ni halahi. Au Tuhan DEBATA madung mandok songon i. Gabe sitaon na dokdok noma Tirus baenon ni bahat bangso.

⁶Samunon ni halahi ma jana bunuonna angka halak na mangingani kota na di tano napa ni Tirus. Jadi gabe botoon ni halak Tirus ma bahaso Au do TUHAN.”

⁷Didok Tuhan DEBATA i ma, “ObanonKu ma Raja Nebukadnesar sian Babel mamorangi ho ale Tirus. Ro ma raja na gumogo i sian Utara mardongan tentara na bahat, dohot kudo na bahatan maradu angka kareta porang songon i muse parangan na markudo.

⁸Marmatean ma halak na maringanan di sandok kota na di tano napa di parporangan i. Huaron ni musu i ma angka bondar partahanan, timbunonna angka tembok panghobuhan jana aturonna angka parince na godang-godang sipakeon ni halahi songon benteng mangalo ho.

⁹Onjaron ni halahi ma angka tembokmu mamake angka parkokas pangonjar jana rumpakkononna ma angka palas-palasmu dohot angka umban-umban sian bosi.

¹⁰Songon i ma bahat ni kudo ni halahi jabat do sap sude ho abuan na habang hara ni pandege ni kudo i. Humutur angka tembokmu hara ni pangkutur ni sora ni parangan na markudo na maroban kareta inganan ni bohal dohot kareta porang muda mamolus halahi sian angka pintu ni horbangan ni kota na dung marsegoan i.

¹¹Manyolat ma angka parangan na markudo i di angka dalanmu jana parmatehononna angka halakmu dohot podang ni halahi. Rumpakkononna angka tugumu na tohong jana na jagar i.

¹²Rampason ni angka musumi ma sandok sinadonganmu dohot jagalanmu. Parrumpakkonon ni halahi ma angka tembokmu jana sego-segoonna angka bagasmu na jeges i. Pambuatan ni halahi ma angka batuna i, angka papanna dohot tanona jana ambungkonon ni halahi tu laut.

¹³AntahonKu ma sude ende-endemu dohot musik hasapimu.

¹⁴Hum sada batu na pir sajo noma tadingkononKu, inganan ni angka parlaut manjomur jala ni halahi. Nada bangunon be mangulahi kota i. Au Tuhan DEBATA madung mandok songon i.”

¹⁵Didok Tuhan DEBATA i ma tu kota Tirus, “Humitir ma angka halak na maringanan di luat na di topi ni laut hara ni biarna muda dibege barita ni hataluanmu dohot angguk ni angka jolma na di panyambolan.

¹⁶Paida-ida bagianmu, jongjong ma angka raja na sian bangso-bangso na di topi ni laut sian habangsana, bukaonna baju juba hasangapanna baju na marsulam na nipake ni halahi, lalu marjuguhan di tano humitir be. Sun ma biar ni halahi, gabe nada tarbaensa so.

¹⁷Dung i endehonon ni halahi ma ende mangubur na mate di hamu songon on: Madung masego kota na tarpuji! Dihais sian laut sude kapalna i. Halakna i markuaso humani do di laut mambaen angka halak pasisir mabiar jana heput.

¹⁸Saonnari, di ari hatatalumu humitir be ma halak na maringanan di angka pulo. Tarsonggot be ma halahi sude marnida parsegomu na so tarasam be.”

¹⁹Didok Tuhan DEBATA i ma, “Mamolngit mangalungun ho baenonKu songon kota na so adong manginganisa. LingkuponKu ho dohot aek na sian tandolan ni laut.

²⁰Dung i Hutongos ma ho tu inganan ni na mate anso mardomu ho disi dohot jolma na sian sinarobian. Hupadiar ho manongtong di inganan ni jolma na mate i, di tonga-tonga ni hasesego na mamanjang, rap dohot halak na mate i. Gabe nada siinganan be tanomi, jana nada goaron be ho di tonga-tonga ni jolma na mangolu.

²¹BaenonKu ma ho gabe tiruan ni sihabiaran, jana i noma ujung ni baritamu. Jalak-jalakan ni halak ma ho, tapi nada marsuo be dohot ho. Au Tuhan DEBATA madung mandok songon i.”