Read Batak Angkola JEHESKIEL 28 Bible Online

JEHESKIEL 28 - Batak Angkola bible

JEHESKIEL 28

¹Didok TUHAN ma tu au:

²“Ale jolma parsantongkinan, palalu ma tu raja ni Tirus, sanga aha na Hudok, Au Tuhan DEBATA mandok tusia, ‘Bulbul ni hatamu antong mandok na dung dietong ho dirimu debata na mangarajai sude laut. Muda na giot songon debata pe pangalahomu, guru di ho ma i, tapi ingot ma, jolma na somal sajo do ho.

³Ninna rohamu ummalo do ho sian si Daniel, gabe nada adong be na buni di ho.

⁴Dipake ho ma malo-malomu dohot na nibotomu laho palagut arta, sere dohot perak.

⁵Tutu ma da malo ho marboniaga jana saonnari lobi hamoraonmu, jana sinadonganmi ma mambaen gakgak ho!’ ”

⁶Didok Tuhan DEBATA i ma: “O Tirus, dibaen madung dietong ho dirimu sarupa dohot Debata,

⁷tongosonKu ma tentara ni musu na lobi jingar laho mamorangi ho. Roncohonon ni halahi ma sude hajagaran na dung dapot ho hara ni hamaloon dohot na nibotomu.

⁸Hona bunu ma ho jana dikubur di bagasan laut.

⁹Antong muda dung dapot hatiha ni i, laing tardokkon ho dope he, Debata ho? Torang ma di jolo ni musumu bahaso hum jolma na somal sajo do ho.

¹⁰Mate ma ho songon jolma na bile hara ni na hona bunu dibaen halak na asing na so mananda Debata. Au Tuhan DEBATA madung mandok songon i.”

¹¹Mangkuling muse ma TUHAN tu au: ning Ia ma,

¹²“Ale anak ni jolma, andungi ma raja ni Tirus. Palalu ma sanga aha na Hudok, Au Tuhan DEBATA mandok tusia, ‘Jungada do ho gabe gambaran ni na sanggam, najolo, i noma pistarmu dohot tongammu!

¹³Di Eden do ingananmu, di kobun ni Debata. Pakeanmu dipajeges dohot simata marrupa-rupa, i ma jaspis na rara, krisolit, jaspis na rata-rata, permata pirus; krisopras; nefrit; lajurit; batu na rara songon mudar dohot malakit. Bagas godang pe dibaen sian sere jana diparade do i di ari panompaonmu.

¹⁴BaenonKu disi surusuruan laho manjago ho. Di ginjang ni dolokKu Na Badia i do ho maringanan jana mardalan-dalan ho di tonga-tonga ni simata na marlinang-linang.

¹⁵Sanggam do pangalahomu mamungka sian panompaonmu lopus tu na mamungka ho mambaen jahat.

¹⁶Lalap do ho marboniaga, jana i ma da na maroban ho tu jogal ni roha dohot dosa. Jadi gabe Hupaorot ho sian dolokKu Na Badia i, jana diayak surusuruan panjagomi ho sian tonga-tonga ni simata na marlinang-linang i.

¹⁷Rupamu na tongam i ma mambaen ho gakgak jana patunda ni habonggalanmi ma mambaen maoto ho di pangalahomu. Jadi hara ni i Hutombomkon ma ho tu tano jana Hubaen gabe sipatondit tu angka raja na asing.”

¹⁸Didok TUHAN, “Ale Tirus, dipahodar ho do angka inganan paribadatanmu hara ni angka hasalaan dohot pangicuonmu di na mandalankon boniagamu. Hututung ho patunda ni i lopus hornop dohot tano. Sude halak na marnida ho hum abu noma idaonna.

¹⁹Ma pola mago ho salolot-lolotna. Sude jolma na marnida ho gabe humitir hara ni biarna gabe dohot manjagit bagian na songon i.”

²⁰Didok TUHAN ma tu au:

²¹“Ale anak ni jolma, paadop ma bohimu tu Sidon jana manyurirangi ma ho mangalo ia.

²²Palalu ma tu halak kota i, Au Tuhan DEBATA mandok tu halahi, ‘Musumu do Au, ale Sidon. Pujion ni halak ma Au hara ni pambaenanKu tu ho. Di na Huuhumi halak na mangingani ho, botoon ni halahi ma Au do TUHAN Na Badia jana na magigi tu sude na jahat.

²³ParoonKu ma nyae jana padiaronKu mabaor mudar di angka dalanmu. Porangan ni musu ma ho sian sude harorona jana matehononna ma halakmu. Jadi gabe botoonmu ma bahaso Au do TUHAN.’ ”

²⁴Didok TUHAN ma: “Angka negara hombar balok na dung jungada mangalayasi Israel, nada be songon runja dohot duri na mambaen hancitan Israel. Botoon ni halahi ma bahaso Au do Tuhan DEBATA.”

²⁵Didok Tuhan DEBATA i ma, “Giot palagutonKu ma angka halak Israel sian angka luat na dao inganan na Hubaen parserahan ni halahi, jana botoon ni sude bangso ma bahaso Na Badia do Au. Maringanan di tanona sandiri noma bangso Israel, i ma tano na dung Hulehen tu naposongKu si Jakob.

²⁶Sonang do disi halahi mangolu jana pajongjongonna ma angka bagas jana baenon ni halahi ma angka kobun anggur. UhumanKu ma sude hombar balok ni halahi na dung jungada palayaskon halahi, lopus marsonang-sonang Israel. Jadi gabe botoon ni halahi ma bahaso Au do Tuhan DEBATA ni halahi.”