Read Batak Angkola JEHESKIEL 38 Bible Online

JEHESKIEL 38 - Batak Angkola bible

JEHESKIEL 38

¹Didok TUHAN ma tu au,

²“Ale anak ni jolma parsantongkinan, burai ma si Gog raja godang na sian angka Luat Mesekh dohot Tubal na di tano Magog.

³Dokkon ma tusia Au do Tuhan DEBATA, musunia do Au.

⁴PaegolonKu ma ia, baenonKu harihir di isang-isang na i, jana ropoonKu haruar rap dohot sude parangannia i. Bahat sajo do parangannia na markudo na marpakean saragam i. Marsioban podangna parincena do ganop parajurit.

⁵Angka parajurit na sian Persia, Sudan dohot Libia do mangudurkon raja i, ganop be maroban podang dohot kupia baja.

⁶Rap ro ma dohot ia sude parporang na sian Luat Gomer dohot Bet-Togarma na di Utara, jana bahat dope bangso na asing rap dohot ia.

⁷Suru ma ia anso hobas jana parentahon ma sude tentara na marsada dohot ia anso hobas mangihutkon tanda sian ia.

⁸Sanga na piga taon nari suruonKu ma ia laho mamorangi sada luat na diingani ni halak na dipalagut mangulahi sian tonga-tonga ni bahat bangso jana maringanan muse di luat i di bagasan sonang. Inganan ni si Gog ma angka dolok ni Israel na dung honok mangalungun jana gok tapor-tapor, tapi saonnari na niingani ni rayat na mangolu di bagasan dame.

⁹Ro ma ia dohot tentarania dohot bahat bangso mangudurkon ia mamorangi songon halingsungsung lalu mangalingkup luat i sude songon ombun.”

¹⁰Didok Tuhan DEBATA i ma tu si Gog, “Baenonmu ma di hatiha i sangkap na jahat.

¹¹Putuskononmu ma laho mamorangi luat na so marbenteng i, disi halakna mangolu di bagasan sonang so haribo-riboan di angka kota na so martembok jana na so adong parkokas ni partahananna.

¹²Tangkoon jana rampasonmu ma barang ni halak kota na marsegoan na salpu i. Na dipalagut sian ganop bangso do halak na manginganisa, na dung gabe mararta dohot marpahan-pahanan na bahat saonnari jana inganan ni halahi pe di pusat ni tano on.

¹³Sapa-sapa ma tu ho halak Seba dohot Dedan maradu angka parboniaga na di angka kota ni Luat Spanyol songon on, ‘Na giot mangarampas dohot manangko sere, perak, pahan-pahanan dohot barang-barang dehe umbaen diarahon tentarami lalu maroban sudena i?’ ”

¹⁴Hara ni i disuru Tuhan DEBATA i ma au laho palaluhon tu si Gog tona on, “Pala topet ma di hatiha sonang so haribo-riboan Israel bangsongKi ro ho mamorangi.

¹⁵Kehe ho mardalan sian ingananmu na di Utara, diudurkon tentara sibahat-bahat jana na gogo situtu, na markudo do i sude sian ragam ni angka bangso.

¹⁶Songon halingsungsung na manondong portibi on. Muda dung dapot hatihana, tongosonKu ma ho laho mambuat tanongKi. Marhite na Hubaen i di na Hupake ho ale Gog, botoon ni angka bangso ma sanga ise do Au, i ma Debata Na Badia.

¹⁷Nada he Hudok hian do najolo taringot tu ho marhite angka naposongKu na giot suruonKu di hatiha na giot ro sada halak laho mamorangi Israel. Au Tuhan DEBATA madung mandok songon i.”

¹⁸Didok Tuhan DEBATA i ma, “Tapi disi dipungka si Gog mamorangi Israel, manigor muruk ma Au.

¹⁹Jana di bagasan parpiar ni murukKu ondamonKu ma, paboa di ari i, ro lalo na gogo di tano Israel.

²⁰Sude ihan dohot unggas, sude binatang na godang dohot na menek, dohot sude jolma na adong di sisik ni tano on humitir be ma hara ni biarna mangadopi Au. Martolbahan ma angka dolok, marruncuran angka tobing, jana marunggalan ma sandok tembok.

²¹Dung i songgotonKu ma si Gog dohot sude ragam ni parmaraan. Au Tuhan DEBATA madung mandok songon i. Marsitampulan ma angka parangannia i dohot podang ni halahi i.

²²UhumanKu ma ia dohot nyae masa dohot mudar na durus. DuruskononKu ma udan potir dohot ambolas, api dohot barerang tusia dohot tentarania dohot tu angka bangso na marsada dohot ia.

²³Songon i ma dalanna baenonKu laho patuduhon tu ganop bangso paboa na badia jana na godang do Au. Jadi botoon ni halahi ma bahaso Au do TUHAN.”