Read Batak Angkola JEHESKIEL 4 Bible Online

JEHESKIEL 4 - Batak Angkola bible

JEHESKIEL 4

¹Didok Debata ma, “Ale jolma parsantongkinan, buat ma sada batu bata, payakkon ma i di jolomu jana gurat ma di ginjangna i gambaran ni Jerusalem.

²Dung i gombarkon ma sada panghobuhan maradopkon kota i, dohot sude bondar, angka tano timbun, angka undung-undung dohot parkokas laho mangonjar humaliang tembokna i.

³Buat ma panci bosi jana etong ma i tarsongon sada dinding bosi; payakkon ma panci i di antaramu dohot kota Jerusalem. Dung i paadop ma tu kota i, songon na ho sandiri ma na manghobuk kota i. Songon tanda do i di bangso Israel.

⁴Tapi anggo ho, manjorbing tu siambirang do jana payakkon ma hasalaan ni bangso Israel tu ginjangmu, marguru sian lolot ni angka ari parpodommu disi, songon i ma lolotna tanggungonmu hajahaton ni halahi.

⁵Anggo Au madung Hubuhul tu ho angka taon hajahaton ni halahi lolotna 390 ari tanggungonmu hajahaton ni pinompar ni Israel.

⁶Dung salpu i, manjorbing tu siamun ma ho jana hilala ma uhuman hara ni hasalaan ni Juda, opat pulu ari honokna sadari, i ma gambaran ni sataon uhuman tu halahi.

⁷Tatap ma sanga songon dia hona hobuk Jerusalem. Pohul ma tenjumu adop kota i jana palalu ma tonangKu taringot tu uhuman ni halahi.

⁸TambatonKu ma ho lopus nada tarpabalik ho pamatangmu sian siambirang tu siamun dohot sabalikna lopus marujung na manghobuk i.

⁹Satorusna, buat ma gandum, burir-burir; kacang mera na godang, kacang mera ma menek, jawan dohot sekoi, jana pamasuk ma i tu bagasan sada hudon jana lompa ma i gabe roti di ho. I ma panganonmu salolot modom manjorbing; i ma 390 ari.

¹⁰Angkon bagi-bagionmu ma roti i anso tuk di ho ganop ari 230 gram sajo. Nada tola lobi sian i.

¹¹Aek siinumonmu pe angkon marsuhat do, dua mangkuk sajo sadari.

¹²Pagara ma api, baen ma sobanna na hodar ni jolma. Di ginjang ni apina i ma tutung rotimu jana pangan ma roti i di jolo ni halak sudena.”

¹³Didok TUHAN ma muse, “Angkon ambungkononKu ma halak Israel tu tonga-tonga ni angka bangso jana songon i ma halahi mangankon roti na hodar disi.”

¹⁴Tapi hualusi ma, “Iale Tuhan DEBATA! Sian na menek lopus saonnari, na so unjung dope hupahodar diringku marhite na mangankon bangke ni binatang sanga teba-teba ni soroan ni binatang panyoro. Na so jungada do hupangan sipanganon na margoar na haram.”

¹⁵Jadi didok Debata ma, “Antong denggan ma i! Songon gonti ni na hodar ni jolma i, tola do baenonmu kotoran ni lombu laho manutung roti i.”

¹⁶Dung i didok Ia muse, “Ale jolma parsantongkinan, abis baenonKu bohal simpanan na di Jerusalem. Mardongan biar dohot ganggu ni roha antaraan ni angka jolma noma mangankon sipanganonna dohot minum aek siinumonna.

¹⁷Mandele noma halahi hara ni na abis roti dohot aek, jana ujungna marmatean ma halahi hara ni angka dosana.”