Read Batak Angkola JEHESKIEL 40 Bible Online

JEHESKIEL 40 - Batak Angkola bible

JEHESKIEL 40

¹Di tanggal sampulu bulan sada di taon padua pulu limahon hatiha habuangannami, opat bolas taon dung talu Jerusalem, digohi kuaso ni TUHAN ma au, lalu dioban ma au kehe.

²Di sada parnidaan, dioban Debata ma au tu Jerusalem jana dibaen ma au di dolok na gincat. Adong ma huida di jolongku saluhutan bangunan na tudos tu sada kota.

³Dioban Ia ma au tusi jana huida ma sada bayo na marsinondang songon tumbaga na jongjong di lambung ni pintu ni horbangan i. Ditiop ia di tangannia tali pangukur sian abit linen dohot hayu parsuhat.

⁴Didok bayo i ma tu au, “Ale jolma parsantongkinan, tangkas tangihon dohot parrohahon sude sanga aha na hupatidahon tu ho, angke hara ni i do umbaen na dioban ho tuson. Paboa ma tu bangso Israel sude na giot patidahonon tu ho.”

⁵Dung i huida ma bagas na martembok humaliang. Dipungka bayo i ma mangukur tembok i dohot hayu parsuhat i, tolu meter ginjangna. Dapot ma tolu meter gincat ni tembok i, hapalna pe laing tolu meter muse.

⁶Dung i kehe ma ia tu horbangan na mangadop tu Habincaran. Dipanaek ia ma tanggana i jana dung lalu ia di ginjang, disuhat ia ma pamalpal ni pintu i, tolu meter hapalna.

⁷Dibalik ni horbangan i adong do sada gang jana adong do tolu kamar panjagoan ditopina na dua i. Ganop kamar i sarupa do ginjangna dohot bidangna, i ma tolu meter, jana dorpi-dorpi holang-holang ni angka kamar i dua satonga meter hapalna, tolu meter do bidang ni horbangan i di bagasan i ma dalan tu ruangan horbangan i.

⁸Diukur ia ma ruangan ni horbangan i, salapan hasta bidangna.

⁹Diukur muse dohot ruangan ni horbangan i dua hasta bidangna, jana ruangan i ma na gabe ujung ni horbangan i.

¹⁰Jana tolu do angka bilik parjagoan sabola Habincaran jana sarupa ukuranna.

¹¹Dung i disuhat bayo i ma bidang ni dalan ni horbangan i; onom satonga meter dohot pintu ni horbangan i lima meter.

¹²Di jolo ni angka kamar ni panjago sitolu noli tolu meter i, adong do tembok na toruk sisatonga meter, jana hapalna pe laing satonga meter.

¹³Jadi disuhat bayo i ma antara ni tembok na di pudi ni kamar panjago i tu pudi kamar panjago na sabariba nari, dapot ma dua bolas satonga meter.

¹⁴Disuhat ia muse ma bilik na lapang i: sampulu meter ginjangna. Adop alaman parruar ni Bagas Ni TUHAN i do pintu ni bilik i.

¹⁵Adong do dua pulu lima meter antarana sian pintu horbangan parruar i lopus tu tembok ni bilik na lapang na di bagian na mangadop tu Bagas Ni TUHAN i.

¹⁶Di tembok na di pudi i dohot di angka tembok pambolat ni angka kamar-kamar i adong do angka jandela na menek-menek. Angka tembok na di bagasan na mangadop tu dalan na sompit i, digorgahon do i dohot bona ni harambir.

¹⁷Dung i dioban bayo i ma au mamolus sian pintu horbangan i tu alaman parruar ni Bagas Ni Tuhan i. Dipajongjong do di topi-topi ni tembok na humaliang Bagas Ni TUHAN i sian ruar, tolu pulu kamar. Di jolo ni angka kamar i adong do lante sian batu,

¹⁸humaliang alaman i sude. Tumoruk do alaman parruar i ulang pado alaman na di bagasan i.

¹⁹Adong do disi pintu horbangan na asing gumincat parpayakna, jana torus ma i tu alaman parbagasan i. Disuhat bayo i ma antara ni pintu horbangan na dua i: dapot ma lima pulu meter.

²⁰Huihutkon ma ia, adong ma disi horbangan na adop Utara, laing dalan tu alaman na di pudi. Dung i diukur ia ma ginjangna dohot bidangna.

²¹Laing adong do tolu kamar panjagoan di nadua topi ni gang i jana adong do dingding holang-holang ni angka kamar i, laing adong muse do bilik ni horbangan i sudena i sarupa ukuranna dohot na di horbangan Parhabincaran i. Ginjang ni horbangan i 25 meter jana bidang dua bolas satonga meter.

²²Songon i muse bilik na lapang i, angka jandelana, dohot gorga ni bona ni harambirna sarupa do dohot na di horbangan Habincaran i. Adong do pitu tirket anak ni tangga laho tu horbangan i, jana di ujungna i adong do bilik na lapang na mangadop tu alaman parruar ni Bagas Ni TUHAN i.

²³Adong muse do horbangan na asing paadop-adop dohot horbangan Utara i, i ma horbangan laho tu alaman parbagasan, laing songon na di horbangan Habincaran i. Disuhat bayo i ma antara ni horbangan na dua i: dapot ma lima pulu meter.

²⁴Dipatorus bayo i ma maroban au tu horbangan Selatan jana disuhat ia ma i. Laing sarupa muse do hape horbangan i dohot angka horbangan na asing i.

²⁵Angka jandela na adong di angka kamarna i pe laing sarupa do dohot na adong di angka horbangan na asing i. Dua pulu lima meter ginjang ni dalanna i jana bidangna dua bolas satonga meter.

²⁶Adong do pitu anak ni tangga laho tu horbangan i jana bilikna na lapang i laing di ujungna i do, mangadop tu alaman parruar ni Bagas Ni TUHAN i. Angka tembokna i sian bagasan na mangadop tu dalanna i, di bunga-bungai do i dohot gorga ni bona ni kurma.

²⁷Adong muse do disi horbangan laho tu alaman parbagasan i. Disuhat hayo i ma antara ni horbangan na dua i: dapot ma lima pulu meter.

²⁸Dipatorus bayo i ma maroban au mamolus sian horbangan Selatan masuk tu alaman parbagasan i. Disuhat ia ma horbangan Selatan i, jana sarupa do ukuranna dohot angka horbangan na di ruar i.

²⁹Angka kamar jagona, angka tiang ni tembokna dohot bale ni horbanganna sarupa ukuranna dohot na asing. Humaliang pintu horbangan i dohot bale ni horbangan i adong angka jandela; ginjang ni pintu horbangan i dua pulu lima meter jana bidangna dua bolas satonga meter.

³⁰Di humaliangna adong bale ni horbangan, ginjangna dua bolas satonga meter jana bidangna dua satonga meter.

³¹Tapi adop tu alaman parruar i do anggo bilikna na lapang i. Angka tembokna na sian bagasan i sabola dalanna i laing dibunga-bungai do i dohot gorga ni bona ni kurma. Salapan anak ni tanggana laho tu horbangan i.

³²Dung sidung i, dioban bayo i muse ma au mamolus sian horbangan Habincaran lalu masuk tu alaman parbagasan i. Disuhat ia ma horbangan i jana sarupa do ukuranna dohot angka horbangan na asing i.

³³Angka kamar ni panjago i, angka tembokna sian bagasan dohot bilikna na lapang i laing songon ukuran ni angka horbangan na asing do. Di angka kamarna i dohot di bilik na lapang i adong do angka jandelana. Dua pulu lima meter ginjang ni horbangan i jana bidangna dua bolas satonga meter.

³⁴Mangadop tu alaman parruar i do bilikna na lapang i. Angka tembokna sian bagasan na mangadop tu dalanna i, dibunga-bungai do dohot gorga ni bona ni kurma. Salapan anak ni tanggana laho tu horbangan i.

³⁵Ujungna dioban bayo i ma au tu horbangan Utara. Disuhat ia ma horbangan i jana sarupa do ukuran ni horbangan i dohot angka horbangan na asing i.

³⁶Songon i dohot angka kamar panjago i, angka tembokna sian bagasan dohot bilikna na lapang i adong be do jandelana. Dua pulu lima meter ginjang ni dalanna i jana bidangna dua bolas satonga meter.

³⁷Bilikna na di jolo i pe mangadop tu alaman parruar do. Angka na sian bagasanna mangadop tu dalanna i, dibunga-bungai do dohot gorga ni bona ni kurma. Salapan anak ni tanggana laho tu horbangan i.

³⁸Di alaman parruar i adong do sada kamar tamba-tamba di horbangan parbagasan sabola Utara. Sian kamar tamba-tamba i adong ma sada pintu tu bilik na lapang i. Disi ma dibasu angka pahan-pahanan na giot sibaenon haul situtungon.

³⁹Di bilik na lapang i adong do opat meja, dua be ganop topi. Di ginjang ni angka meja i ma disambol angka pahan-pahanan sibaenon gabe haul situtungon i sanga haul hasesaan ni dosa sanga haul panobus ni hasalaan.

⁴⁰Di ruar ni bilik na lapang i adong dope opat nari meja, dua meja angkup be topina i.

⁴¹Jadi gabe salapan meja ma sude meja panyambolan ni haul i: opat ma i di bagasan jana opat ma i di ruar ni alaman i.

⁴²Meja na opat na di bilik tamba-tamba i na dipake laho paradehon haul situtungon i, sian batu do i na dituhil. Satonga meter do gincat ni meja i, jana marsogi opat do i di ginjang, bidangna dohot ginjangna sarupa rap tolu paropat meter. Disimpan do di ginjang ni angka meja i parkokas sipakeon laho manyambol angka pahan-pahanan haul i.

⁴³Tapi adong do bingke ni meja i ganop be, sanjongkal bidangna. Dipayakkon ma di ginjang ni angka meja i sude juhut na giot baenon i gabe haul.

⁴⁴Dung i dioban bayo i ma au tu alaman parbagasan i. Adong do disi dua balerong, sada ma i pahombar dohot horbangan Utara jana adop tu Selatan ma i, jana na sada nari hombar dohot horbangan Selatan jana mangadop tu Utara ma i.

⁴⁵Pandok ni bayo i tu au, anggo balerong na mangadop tu Selatan i baen di angka malim na markarejo do i di Bagas Na Badia,

⁴⁶jana balerong na mangadop tu Utara i diparade di angka malim na markarejo di langgatan do i. Angkon sian Marga Levi pomparan ni si Zadok do na tola mangadop tu TUHAN laho mangoloi Ia di bagasan paribadatan.

⁴⁷Disuhat bayo i ma alaman na di bagasan i. Maropat suhi do potongan ni i: Ginjangna dohot bidangna lima pulu meter do. Sabola Hasundutan do Bagas Ni TUHAN i, jana di jolona i adong sada langgatan.

⁴⁸Dung i dioban ia ma au tu pintu ni Bagas Na Badia i di suhat ia ma pintu i, dua satonga meter do ginjangna jana pitu meter bidangna, jana satonga meter hapal ni dingdingna ganop bariba.

⁴⁹Sampulu meter do ginjang ni bilik i jana bidangna onom meter, jana sampulu tingkat do tangga i. Laho manaek tusi adong do dua tiang, sada be dibariba ni pintu i.