Read Batak Angkola JEHESKIEL 42 Bible Online

JEHESKIEL 42 - Batak Angkola bible

JEHESKIEL 42

¹Dung i dioban bayo i ma au tu alaman parruar i jana ditogu ia ma au tu bangunan na asing sabola Utara ni Bagas Na Badia, nada sadia dao sian bangunan na godang na di sabola Hasundutan ni Bagas Na Badia i.

²Lima pulu meter ginjang ni bangunan i jana dua pulu lima meter bidangna.

³Sabariba topi ni bangunan i mangadop tu emper sisampulu meter i do, jana topina na sabariba nari mangadop tu lante batu na di alaman parruar i. Martirket tolu do bangunan i, ganop tirket juruk do tar tubagasan martimbangkon tirket na di toruna.

⁴Di jolo ni angka bilik i di bagasan adong do dalan lima meter bidangna jana ginjangna lima pulu meter. Mangadop tu Utara do angka pintuna i.

⁵Sumompit do angka bilik na di tirket parginjang i ulang pado bilik-bilik na di tirket na di toruna, angke umbidang do dalan na di jolo ni angka bilik na di ginjang i ulang pado dalan na di toruna.

⁶Martirket tolu do angka bilikna i, jana nada sarupa tiangna songon angka tiang ni alaman i, hara ni ido umbahen na ummenek dibaen bilik pargincat dohot partonga.

⁷Satonga sian tirket na di toru i, hum tembok sajo do i dua pulu lima meter ginjangna,

⁸jana lobina i sidua pulu lima meter nari, disi ma dibaen angka bilik. Di tirket parginjang i adong do angka bilik sian ujung tu ujung.

⁹Jana mulai sian toru ni angka ruangan adong do sada haroroan sian Habincaran. Muda masuk iba tusi, angkon sian tembok parluar.

¹⁰Di sabola Habincaran di jolo ni inganan na tartutup i dohot di jolo ni bangunan sabola Hasundutan i, adong muse do disi angka bilik. Di topi ni Bagas Na Badia sabola Selatan, adong do bangunan na sarupa dohot sinangkin, nada sadia dao sian bangunan na di sabola Hasundutan i.

¹¹Di jolo ni angka bilikna i adong do sada dalan na sarupa tu dalan na adong di sabola Utara. Ukuranna pe sarupa, potonganna sarupa jana angka pintuna i pe sarupa.

¹²Di toru ni angka bilik sabola Selatan i, i ma di ujung sabola Habincaran di pangkal ni tembok i adong muse do sada pintu.

¹³Didok bayo i ma tu au, “Na badia do bangunan na dua i. Disi ma angka malim bolas mangadop tu haroroan ni TUHAN, mangankon angka haul na sun badia. Angkon disi muse ma payakkonon ni halahi angka haul na sun badia i, i ma: Haul gandum dohot haul panyesa ni dosa sanga haul panobus ni hasalaan.

¹⁴Muda dung sidung markarejo angka malim di Bagas Na Badia, jana giot kehe ma tu alaman parruar, angkon tinggalkonon ni halahi ma pakean hapunjungan na nipake ni halahi di na markobasi ibadat i. Angkon pakean na asing noma pakeon ni halahi, baru pe anso tola halahi kehe mandapotkon rayat na marlagut i.”

¹⁵Dung sidung disuhat bayo i Bagas Na Badia i sian bagasan, dioban ia ma au haruar sian horbangan Habincaran, lalu disuhat ia ma Bagas Na Badia i humaliang.

¹⁶Disuhat ia ma dohot tungkot pangukurnia i topina na sabola Habincaran: dapot ma dua ratus lima pulu meter.

¹⁷Dung i disuhat ia ma topina i sabola Utara, sabola Selatan dohot topina sabola Hasundutan; sarupa do ginjangna sude topina i, rap dua ratus lima pulu meter be.

²⁰Jadi marsogi opat do tano na masuk tu pakarangan ni Bagas Na Badia i, dua ratus lima pulu meter be ganop topi. Dihuliangi tembok do sude pakaranganna i laho mambolat tano hapunjungan di TUHAN i ma tano na badia sian na so badia.