Read Batak Angkola JEHESKIEL 47 Bible Online

JEHESKIEL 47 - Batak Angkola bible

JEHESKIEL 47

¹Dioban bayo i muse ma au tu pintu masuk ni Bagas Na Badia i. Huida ma aek mamolus sian toru ni pintu i kehe sabola Habincaran. Mardalan sian toru ni Bagas Na Badia i do aek i sabola Selatan mamolus sian topi sabola Selatan ni langgatan i.

²Dung i dioban bayo i ma au ruar mamolus horbangan Utara jana ditogu ia ma au tu horbangan Habincaran. Mamolus sian topi sabola Selatan ni horbangan i do bondar na menek i.

³Di na lalu marsuhat ia dohot tungkot pangukurnia i, lalu dioban ia ma au paihut-ihut pardalan ni aek i tu Habincaran lima ratus meter daona, jana disuru ia ma au taripar. Anggo di inganan i hum olat ni tambihul do bagas ni aekna i.

⁴Dung i disuhat ia ma lima ratus meter nari, jana lalu tu gonting bagas ni aekna i.

⁵Sanoli nari disuhat ia ma lima ratus meter nari, jana mabagastu do disi aekna i anggo boluson mardalan pat. Muda giot taripar halak disi angkon marlange noma i.

⁶Jadi didok bayo i ma tu au, “Ale jolma parsantongkinan, tangkas ma parrohahon sudena on.” Dung i dioban ia ma au mangulahi paihut-ihut batang aek i,

⁷jana huida ma hape na bahat sajo do hayu di topi ni batang aek i angkup bariba.

⁸Didok ia ma tu au, “Mamolus tu Habincaran do batang aek on manyalpui luat on lalu tu Rura ni Batang aek Jordan lopus tu Laut Mate. Muda dung lalu aekna tu bagasan Laut Mate, digonti ia ma aek laut na ancim i dohot aek tawar.

⁹Sanga na tu dia pe batang aek on mamolus, adong muse ma disi sude ragam ni ihan dohot binatang na asing i. Gabe tawar dai ni aek ni Laut Mate dibaensa jana sanga na tu dia pe mamolus batang aek i, adong ma dumpang disi hangoluan.

¹⁰Sian angka mual haroroan ni aek na di En-Gedi lopus tu angka mual ni aek na di En-Eglaim, ribur ma disi angka parihan na manjomuri jalana disi. Sude ragam ni ihan adong ma dapot di bagasan aek i, laing songon na dumpang di Laut Tonga.

¹¹Tapi anggo aek na di ombik-ombik dohot paya-paya na adong sapanjang topi ni laut i nada ra gabe tawar, tapi laing hot do i pambuatan ni sira.

¹²Sapanjang topi ni batang aek angkup bariba martubuan do sude bona ni hayu sipanganon, nada unjung malos bulung ni hayu-hayu jana batuna pe nada marnamantak. Ganop bulan do bona ni hayu i marbatu, hara ni aek na sian Bagas Na Badia i mangaehisa. Sipanganon do angka batuna i jana bulungna marguna baen ubat.”

¹³Didok Tuhan DEBATA i ma, “On ma batas-batas ni tano na giot bagi-bagion tu angka marga ni Israel na dua bolas i. Horong Josep manjagit dua bagian.[15]

¹⁴Na dung Husumpahon do na giot lehenonKu tano i tu ompumunu. Hara ni i, buat ma tano i jana bagi-bagi ma i tigor di hamu be.

¹⁵Batas na di Utara mamungka sian Laut Tonga manuju tu Habincaran lalu tu kota Hetlon, sabola Hamat, torus tu kota Zedad,

¹⁶tu Berota dohot Sibraim (di antara ni kota Damaskus dohot kota Hamat do parpayak ni angka kota i), dung i tu kota Hasar-Enan di parbalohan ni kota Hauran.

¹⁷Jadi batas sabola Utara, mamungka ma i sian Laut Tonga lopus tu Habincaran, tu kota Hasar-Enan; jadi anggo luat ni Damaskus dohot Hamat, sabola Utara ni parbatasan do i.

¹⁸Parbatasan sabola Habincaran lalu tu Selatan, mamungka sian sada inganan antara ni luat ni Damaskus dohot luat ni Hauran. Jadi Batang aek Jordan ma batasna antara ni tano ni Israel di Hasundutanna dohot Gilead di Habincaranna, lopus tu Tamar na di topi ni Laut Hamatean.

¹⁹Anggo batas sabola Hasundutan lopus tu Barat Daya, sian Tamar lalu tu mual Kades-Meriba, lalu tu Barat Laut na marbatas dohot Mesir lopus tu Laut Tonga.

²⁰Anggo batas sabola Hasundutan mangihutkon potongan ni Laut Tonga do i, lalu tu Utara tu sada inganan di Hasundutan ni dalan laho tu Hamat.

²¹Bagi-bagi ma tano i di hamu be, mangihutkon angka marga-marga ni Israel;

²²jana nampunamunu noma tano i salolot-lolotna. Angka halak sileban na dung hot maringanan di tonga-tongamunu jana na adong dakdanakna na sorang dison, angkon maruli bagian do di tano i. Angkon etongon do halahi songon anggota na gok di bangso Israel, jana angkon dohot do halahi undion anso maruli tano di hatiha dibaen pambagian ni tano i di angka marga-marga ni Israel.

²³Ganop halak sileban angkon dilehen do tano rap dohot marga ni Israel sanga na di dia ia maringanan. Au Tuhan DEBATA madung mandok songon i.”