Read Batak Angkola JEHESKIEL 48 Bible Online

JEHESKIEL 48 - Batak Angkola bible

JEHESKIEL 48

¹Manggistang do batas ni tano i di Utara tu Habincaran, mamungka sian Laut Tonga sabola kota Hetlon, dalan laho tu Hamat, kota Hasar-Enan, lopus tu parbatasan ni kota Damaskus dohot kota Hamat. Angka marga na di toru on angkon mandapot be ma sabagian sian tano na manggistang sian parbatasan na di Habincaran lalu tu Hasundutan lopus tu Laut Tonga songon on ma parjojorna sian Utara tu Selatan: Dan Aser Naftali Manase Efraim Ruben Juda

⁸Anggo tano bagian na mangihut on, angkon paasingon do hara ni hapunjungan ni gunana: Angkon 12,5 kilometer ginjangna sian batas na di Utara lalu tu Selatan. Batasna sian Habincaran dohot Hasundutan angkon dos ginjangna dohot angka bagian na dipasahat tu angka marga-marga ni Israel. Hajongjongan ni Bagas Na Badia do i baenon.

⁹Deba sian tano i dibaen gabe hapunjungan ni TUHAN, i ma tano na di bagian partonga-tonga, 12,5 kilometer ginjangna jana 10 kilometer bidangna.

¹⁰Di tonga-tonga ni tano i ma giot baenon hajongjongan ni Bagas Na Badia. Angkon maruli ma angka malim sian tano na badia i. 12,5 kilometer ma topina di Habincaran lalu tu Hasundutan bagian ni halahi, jana lima kilometer topina di Utara lalu tu Selatan.

¹¹Angka malim sian pomparan ni si Zadok ma nampuna tano na marhapunjungan i. Na dung burju do halahi mangoloi TUHAN jana nada songon halak Levi dongan samarga ni halahi i na dohot mambaen dosa rap dohot angka halak Israel na asing i.

¹²Jadi hara ni i angkon lehenon do tano hapunjungan di pomparan ni si Zadok tamba ni tano na giot lehenon tu halak Levi. Jana badia situtu do tano hapunjungan i.

¹³12,5 kilometer ginjang ni tano ni halak Levi i sian Habincaran tu Hasundutan, jana bidangna lima kilometer sian Utara tu Selatan jana satongtang do i dohot tano ni angka malim.

¹⁴Sanjongkal pe sian tano i nada tola gadison ni halahi sanga tukarkononna; tano na dumenggan sian tano Israel nada tola martukar i tu halak na asing, angke na dung ditontuhon do i gabe hapunjungan ni TUHAN jana gabe nampunaNia.

¹⁵Sabola Selatan di tano na badia i, laing adong dope tano ginjangna 12,5 kilometer jana bidangna 2,5 kilometer. Nada badia anggo i jana bolas do pakeon ni rayat gabe inganan dohot parmahanan, di tonga-tongana i angkon pajongjongon do sada kota.

¹⁶Angkon marsogi opat do potongan ni kota i, ganop topina i 2,25 kilometer.

¹⁷Humaliang ni sude kota i angkon adong dope tano lapang 125 meter bidangna.

¹⁸Sabola Habincaran dohot Hasundutan ni kota i adong dope tano na lapang 5 noli 2,5 kilometer bidangna. Angkon pakeon ni halak kota i do tano lapang na dua i gabe parladangan.

¹⁹Tola do sian sude marga-marga ni Israel mangkarejohon tano i.

²⁰Jadi sude luat i, tano hapunjungan dohot tano na giot parkotaan i, marsogi opat do i 12,5 kilometer ginjang ni sude topina i.

²¹Tano sabola Habincaran dohot Hasundutan sian tano hapunjungan na ditontuhon baen inganan ni Bagas Na Badia, di angka malim, di halak Levi dohot parkotaan i, i ma bagian ni parkuaso na mamarenta. Sabola Habincaran manggistang ma tano i lopus tu parbatasan di Habincaran, jana sabola Hasundutan lopus tu Laut Tonga jana antara ni tano Juda dohot tano Benyamin ma parpayak ni i.

²³Tano hapunjungan i sabola Selatan, i ma baen di angka marga-marga na asing. Bidang ni tano i mamungka sian parbatasan na di Habincaran lalu tu Hasundutan lopus tu Laut Tonga, jana songon on ma parbagina jojor sian Utara tu Selatan: Benyamin Simeon Isakar Zebulon Gad

²⁸Sabola Selatan ni tano Gad, disi ma batasna mamungka sian Barat Daya ni Tamar lalu tu mual Kades-Meriba, torus tu sabola Barat Laut na marbatas dohot Mesir lopus tu Laut Tonga.

²⁹Didok Tuhan DEBATA i ma, “Songon i ma tano i angkon bagi-bagion tu angka marga ni Israel.”

³⁰Dua bolas sude bahat ni pintu masuk tu Jerusalem. Tembokna na opat i 2,25 kilometer be ginjangna, jana tolu be horbanganna. Ganop horbangan dibaen ma goarna mangihutkon goar ni sada sian Marga Israel. Angka horbangan na di Utara digoari Ruben, Juda dohot Levi; angka horbangan sabola Habincaran digoari ma i Josep, Benyamin dohot Dan; na di tembok sabola Selatan i ma na margoar Simeon, Isakar dohot Zebulon; jana na di tembok sabola Hasundutan dibaen ma goarna Gad, Aser dohot Naftali.

³⁵9 kilometer ginjang ni tembokna i sude. Jana mamungka sian hatiha on digoari halak ma kota i: “DISI DO TUHAN I!”