Read Batak Angkola JEHESKIEL 7 Bible Online

JEHESKIEL 7 - Batak Angkola bible

JEHESKIEL 7

¹Didok TUHAN do tu au,

²“Ale jolma parsantongkinan, Au Tuhan DEBATA giot mandok songon on tu tano Israel: On ma ujung ni sude carito ni luat on!”

³“Saonnari madung dapot ajalmu, jana Au manongoskon rimasKu tu ho jana manguhum ho hombar tu jorbut ni parbuatanmu jana manginona tu ho baenonKu sude angka na ni karejohonmu.

⁴Nada pakeonKu ibo ni roha sanga lehenonKu ampunan tu ho. UhumanKu noma ho hombar tu sandok hajorbutan na nibaenmu. Jadi gabe botoonmu ma bahaso Au do TUHAN.”

⁵Songon on ma pandok ni Tuhan DEBATA, “Ligi ma, mardapot-dapot noma parmaraan!

⁶Saonnari madung marujung sudena. On ma hasesegomu. Nada adong be arop ni roha di ho.

⁷Madung marujung sasudena di ho, ale bangso na maringanan di luat on. Saonnari nada adong be angka hariburon di langgatan na di dolok; hum hagaoron noma na adong.

⁸Nada pola sadia honok nari be, hilalaonmu ma rimasKu na jorbut i. UhumanKu hamu hombar tu parbuatanmunu. BaloskononKu tu hamu sude jorbut ni pangalahomunu i.

⁹Nada ibo rohangKu sanga ampunanKu hamu. Giot uhumanKu hamu hombar tu sude hajorbutan na nibaenmunu i. Jadi gabe botoonmunu ma bahaso Au do TUHAN jana Au do na manguhumi hamu.”

¹⁰Ligi ma madung ro arina: Masa ma parhancitan, martumbur ma hajahaton, marharajaon ma ginjang ni roha.

¹¹Mur martamba hajahatan dibaen hakejamon. Sandok sinadongan, hagodangan dohot bungaran ni halahi abis noma i nada martanda.

¹²Ro ne ma hatihana, ari na pe madung donok! Nada manutung bagi aha sipanobusi dohot sipanggadis, angke lingkupon ni uhum ni Debata noma sude jolma.

¹³Nada adong parjagal sanga na nigadisna, angke sude do didondoni rimas ni Debata. Nada malua anggo halak na jahat.

¹⁴Mangkuling ma sarune, dung i markobas ma sude halak. Tapi sahalak pe nada adong na kehe tu galanggang ni parporangan, angke sude jolma do didondoni rimas ni Debata.

¹⁵Di angka dalan na di kota marbadai jolma, di angka bagas ro nyae masa dohot na tangkuraparon. Sanga ise na di balian ni kota mate di bagasan parbadaan noma i, jana na tinggal di kota gabe mate baenon ni nyae noma i dohot tangkuraparon.

¹⁶Malua do nian deba jana maporus ma i tu partoran songon darapati na nihabur sian rura. Mangangguhi be ma i hara ni angka dosa ni halahi.

¹⁷Sandok jolma gabe gale ma tanganna i jana humitir dugulna i.

¹⁸Marabit goni ma halahi jana humitir ma sude pamatangna i. Cukuron ma ulu ni halahi jana pailaon halahi.

¹⁹Ambungkonon ni halahi noma sere dohot perak songon rompak-rompak di topi dalan angke anggo di ari disi dipalalu TUHAN gilap ni murukNa nada tarpalua sere dohot perak i be halahi, mur mangonjarkon halahi noma i tu bagasan dosa. Nada tarpargunahon halahi be i laho papuaskon hagiot sanga laho manggohi butuha ni halahi.

²⁰Anggo najolo godang do roha ni halahi hara ni simata ni halahi na jeges-jeges i, tapi dibaen dipake halahi do i laho pature angka gana-ganaan, na hagigian i, jadi dibaen TUHAN ma arta ni halahi i gabe pangalaho na jorbut.

²¹“PadiaronKu ma angka halak na leban mangarampasi hamu. Rampason ni angka parjahat ma artamunu jana pahodaronna.

²²Nada anto-antoanKu muda pe disego-sego jana dipahodar angka panyamun BagasKi.

²³Gabe gurgar ma sude luat on; sanga di dia adong sibunu jolma dohot hakejamon.

²⁴ParoonKu ma angka bangso na jumingar laho mambuati angka bagasmunu. Heput do angka jolma na gumarang sian hamu angke padiaronKu do angka bangso i mangaroncohon inganan paribadatanmunu.

²⁵Didondoni arsak dohot hasusaan ma halahi, gabe manjalahi hadamean, hape nada dapot halahi.

²⁶Mardapot-dapot ma parmaraan dohot barita na jatjat marroan. Pangidoonmunu ma anso ro nian panurirang na giot paboa alatan, hape nada tarbaen halahi. Boti muse nada adong sanga aha di angka malim siajarkononnia tu bangso i, angka pamimpin pe madung abis sipaingot na nibotona.

²⁷Mangandung ma raja, mandele ma anak ni raja i jana humitir ma rayat i hara ni biarna. UhumanKu noma hamu hombar tu parbuatanmunu sudena jana uhumanKu ma hamu songon panguhumimunu di halak na asing. Jadi gabe botoonmunu ma bahaso Au do TUHAN.”