Read Batak Angkola JEHESKIEL 8 Bible Online

JEHESKIEL 8 - Batak Angkola bible

JEHESKIEL 8

¹Di tanggal lima bulan onom di taon paonomkon di hatiha habuangannami, ro ma angka pamimpin ni angka halak Juda na di habuangan i tu bagasku, juguk-juguk rap dohot au. Ompot ma ro kuaso ni Tuhan DEBATA i mangarajai au.

²Hupadorgak ma jana huida ma sada tarsongon rupa ni jolma. Sian gontingna i lalu tu toru songon api do idaon jana sian gontingna i tu ginjang marlinang-linang do songon linang ni sere.

³Disurduhon Ia ma na tudos dohot tangan, jana dijingjing Ia ma obukku. Dung i di bagasan parnidaan i, diangkat Tondi i ma au tu holang-holang ni tano dohot langit jana dioban ma au tu Bagas Ni TUHAN na di Jerusalem, tu pintu masuk sabola Utara. Disi adong do patung ni gana-ganaan na dung pagurgur muruk ni Debata.

⁴Jana ligi ma disi do hamuliaon ni Debata ni Israel suman tu na huida na jolo di rura i.

⁵Didok Debata ma tu au, “Ale jolma parsantongkinan, tatap ma adop Utara.” Huoloi ma i, jana di lambung dalan laho masuk, huida ma gana-ganaan na dung pagurgurkon muruk ni Debata i.

⁶Didok Debata ma tu au, “Ale jolma parsantongkinan, aha do diida ho na tarjadi? Parrohahon ma angka parbuatan sihagigian na nibaen ni halak Israel, na mur padaohon Au sian BagasKu! Beta, anso Hupatuduhon tu ho angka pangalaho na jumorbut dope.”

⁷Dung i dioban Ia ma au tu pintu masuk ni alaman parduru jana dipatidahon Ia ma tu au sada lubang ni tembok i.

⁸Didok Ia ma, “Ale jolma parsantongkinan, pagodang ma lubang on.” Dung hupagodang huida ma sada pintu.

⁹Ning Ia ma tu au, “Masuk ma ho jana ligi ma angka parbuatan na jorbut dohot hagigian na nipambaenan ni halahi disi.”

¹⁰Masuk ma au antong jana huida ma. Digambari do dingding ni inganan i dohot sude ragam ni ulok dohot angka binatang na haram na asing i, songon i muse ragam-ragam ni gambaran ni gana-ganaan na nisomba ni angka halak Israel.

¹¹Adong do pitu pulu halak pamimpin ni halak Israel disi, dohot ma i si Jaasanya anak ni si Safan. Marsitiop ma sada be pardupaan na marohol be timusna.

¹²Didok Debata ma tu au, “Ale jolma parsantongkinan, aha do diida ho na nipambaenan ni angka pamimpin ni Israel di sihabunian i? Marsomba do halahi di bagasan bilik na gok dohot gana-ganaan i marhite alasan na mandok na dung Hutadingkon luat on jana nada Huida be parbuatan ni halahi i.”

¹³Dung i didok TUHAN ma tu au, “Idaonmu dope halahi mambaen na jumorbut muse.”

¹⁴Gabe dioban Ia ma au tu horbangan sabola Utara ni Bagas Ni TUHAN jana dipatidahon Ia ma tu au angka dadaboru na mangandungi hamamate ni Debata Tamus.[1]

¹⁵Disapai Tuhan ma tu au, “Ale jolma parsantongkinan, diida ho do pangalaho i? Bahat dope na mambaen magigi Iba.”

¹⁶Dioban Ia ma au tu alaman parbagasan di Bagas Ni TUHAN. Dilambung ni dalan laho masuk tu Bilik Na Badia i, di antara ni langgatan dohot dalan i adong disi dua pulu lima halak halaklahi. Dihudukkon halahi do Bilik Na Badia i, jana marsomba ma halahi adop Habincaran manyomba mataniari na bincar i.

¹⁷Didok TUHAN ma tu au, “Diida ho dehe i, ale jolma parsantongkinan? Nada puas dope pangkilalaan ni angka halak Juda on anggo hum angka pangalaho sihagigian i sajo dope dibaen halahi dohot mambaen tindakan na so mananda holong ni roha tu donganna jolma di sude luat i. Dipambaeni halahi do sudena i dison, di bagasan BagasKu jana i ma dalanna umbaen na mur gilap Huhilala. Ligi ma sanga na bia dibaen halahi palayas Au marhite pangalaho na jumorbut on![2]

¹⁸Rasoan ni halahi ma jorbut ni hamumurukKu! Nada halupahononku sanga ampunanKu halahi. Haru pe mangangguhi halahi martangiang tu Au sagogo-gogona, nada ra Au manangihon!”