Read Batak Angkola JEHESKIEL 9 Bible Online

JEHESKIEL 9 - Batak Angkola bible

JEHESKIEL 9

¹Dung i hubege ma pio-pio Debata, “Marroan ma hamu tuson, hamu angka halak na giot padalan uhumanKu maradopkon kota on. Oban hamu ma angka sinjatamunu.”

²Rap ruar ma onom halak sian ruar ni horbangan Utara ni Bagas Ni TUHAN i, marsioban sinjatana be. Rap dohot halahi adong muse halak na marpakean linen na maroban parkokas ni panyurat. Masuk ma halahi jana jongjong di lambung ni langgatan na sian tumbaga i.

³Dung i mamincar ma sinondang na silo sian angka kerub na marhabong na patandahon haroro ni Debata ni Israel, lalu pinda ma i sian ingananna humani tu pintu masuk laho tu Bagas Na Badia i. Dung i dipio TUHAN ma halak na marpakean linen i.

⁴Didok TUHAN ma tusia: “Mardalan ma ho sian tonga-tonga ni kota Jerusalem, jana suratkon ma hurup T di ganop bohi ni halak na marsak dohot na susa hara ni sude parbuatan sihagigian na dibaen di kota on.”

⁵Hubege ma didok Debata tu jolma na deba nari i, “Ihutkon hamu ma ia mandalani kota i sude jana bunu hamu ma ganop halak, ulang adong ampunanna.

⁶Bunu hamu ma sude halaklahi dohot dadaboru, na matobang dohot na poso, na marsaripe dohot dakdanak. Tapi ulang hahua hamu anggo na mamake tanda di bohina. Jadi pungka hamu ma sian on, sian inganan na badiangKu.” Jadi dipungka halahi ma karejo i, dibunu halahi ma angka pamimpin ni Israel na topet marjongjongan di Bagas Na Badia i.

⁷Didok Debata ma tu halahi, “Ramuni hamu ma Bagas Na Badia i! Gohi hamu ma bangke di angka alamanna i. Pungka hamu ma!” Jadi halahi pe mamungka ma dibunui halahi angka jolma na di kota i.

⁸Salolot mardalan na manyamboli i, sasada au do disi. Manungkap ma au jana pio-pio, “O Tuhan DEBATA, songon i ma he murukMu tu Jerusalem jabat do bunuonMu sude halak na adong dope di Israel on?”

⁹Dialusi Debata ma, “Dosa na lobi godang do na dung dipambaeni ni angka halak Israel dohot Juda. Dipadalan halahi do pamunuon di sude inganan, jana dipahodar halahi do Jerusalem marhite hajahatan. Didok halahi bahaso na dung Hutadingkon luat on jana nada Huida be parbuatan ni halahi i.

¹⁰Nada be ibo rohangKu mida halahi. Angkon baenonKu tu halahi sanga aha na nibaen ni halahi tu halak na asing.”

¹¹Dung i mulak ma halak na marpakean linen i mangulahi jana mangalapur ma ia tu TUHAN, ning ia ma, “Madung mardalan sude parenta ni TUHAN i.”