Read Batak Angkola DANIEL 1 Bible Online

DANIEL 1 - Batak Angkola bible

DANIEL 1

¹Tolu taon dung mamarenta Raja Joyakim di Juda, ro ma si Nebukadnesar raja ni Babel mamorangi kota Jerusalem jana manghobuksa.

²Dipaloas TUHAN do ia manaluhon Raja Joyakim dohot mangarampas deba sian angka barang sigodang arga na di Bagas Ni TUHAN. Angka halak na nitabannia, dioban ia ma i tu bagas parsombaan ni debatana di Babel jana angka barang-barang na nirampasnia i disimpan ia ma i di bagasan bagas parsombaan i.

³Dung i diparentahon raja i ma si Aspenas, kapala ni bagas godang, laho mamili sian tonga-tonga angka tahanan Israel i piga-piga halak doli-doli pomparan ni raja sanga angka na sangap.

⁴Angkon doli-doli na so martihas do halahi. Angkon tongam, parsikola dohot na tangkas parbinotoanna di sasudena, na pistar dohot na bahat parbinotoan jana na patut markarejo di bagasan bagas godang. Angkon ajaran ni si Aspenas halahi manyise dohot manyurat di hata Babel.

⁵Laing ditontuhon raja i muse do, angkon sarupa sipanganon dohot anggur siinumon di halahi dohot na dilehen di angka isi ni bagas ni raja i. Dung marsiajar halahi tolu taon honokna, angkon ro ma halahi manopot raja i.

⁶Jana sian angka doli-doli i, masuk ma disi si Daniel, si Hananya, si Misael dohot si Asarya, sian Marga Juda do halahi.

⁷Digonti kapala ni juaro bagas i ma goar ni halahi gabe: Si Daniel gabe si Beltsasar, si Hananya gabe si Sadrakh, si Misael gabe si Mesakh jana si Asarya gabe si Abednego.

⁸Tapi tongtong do dijago si Daniel dirinia anso ulang ramun hara ni sipanganon dohot anggur na somal diinum raja i, dipangido ia ma tu pamimpin pegawe ni bagas godang i anso ulang diramuni ia.

⁹Jadi dilehen Debata ma tu si Daniel holong dohot ibo ni roha sian angka pamimpin ni pegawe bagas godang i.

¹⁰Hara ni na mabiar ia tu raja, didok si Aspenas ma, “Madung ditontuhon raja i do panganon dohot inumonmu, jadi muda hurang sehat ho mangihutkon pandapot ni raja i martimbangkon angka doli-doli na asing i, angkon gabe hona bunu au baenonna.”

¹¹Tapi ninna si Daniel ma tu pangkobasi sipanganon i, na dung dipabangkit ni pamimpin ni angka pangkobasi ni bagas godang laho mangurus si Daniel; si Hananya, si Misael dohot si Asarya.

¹²“Uji ma hami sampulu ari honokna; lehen ma ingkayu sajo dohot aek di hami baen panganon dohot inumonnami.

¹³Dung salpu sampulu ari, patudos ma hami dohot angka doli-doli na mangankon sipanganon na nitontuhon ni raja i, lalu baen ma haputusan hombar tu parnidaanmu.”

¹⁴Jadi dioloi pangawal i ma songon i jana diuji ia ma sampulu ari honokna.

¹⁵Dung abis i, mur sumehat do halahi idaon jana mur gumogo sian sude doli-doli na mangan panganon sian meja ni raja i.

¹⁶Mamungka sian i nada dipasingkop pangawal i be di halahi panganon dohot inumon na nitontuhon ni raja i, tapi hum ingkayu dohot aek sajo noma.

¹⁷Dilehen Debata ma tu doli-doli na opat i bisuk dohot hamaloon di parbinotoan taringot tu hata dohot ragam ni angka surat. Tambani i dilehen Ia muse do tu si Daniel hamaloon laho patorang parnidaan dohot nipi.

¹⁸Di ujung ni sitolu taon parsiajaran ni halahi na ditontuhon ni raja i, dioban si Aspenas ma sude doli-doli i manopot Raja Nebukadnesar.

¹⁹Dung marsipatorangan dohot halahi sudena, diida raja i ma lumobi si Daniel, si Hananya, si Misael dohot si Asarya sian angka na asing i di sude ragam ni hapandean. Jadi mamungka ma halahi markarejo di bagas godang ni raja i.

²⁰Ganop dipasahat raja i parsoalan na mamorluhon hatorangan dohot partimbangan, sampulu lompit dumenggan diida ia sipaingot dohot hatorangan ni doli-doli na opat i martimbangkon sipaingot dohot hatorangan ni sude partondung dohot panjampi na malo di sude harajaan i.

²¹Tongtong do disi maringanan si Daniel lopus tu taon parjolo mangarajai si Kores.