Read Batak Angkola DANIEL 10 Bible Online

DANIEL 10 - Batak Angkola bible

DANIEL 10

¹Di taon patoluhon dung mamarenta si Kores, raja ni halak Persia, dipaboa ma tona tu si Daniel na margoar muse si Beltsasar. Tutu do tona i salaho tu hasusaan na godang. Dung i ditiop ia ma hata i jana diparate-atehon ia ma parnidaan i.

²Marsiluluton do au di hatiha i tolu minggu.

³Nada hupangan panganon na tabo, juhut dohot anggur nada masuk tu pamanganku jana nada marsuri au lopus gok tolu minggu honokna.

⁴Di tanggal dua pulu opat bulan sada di bagasan taon i, jongjong do au topet di topi ni Batang aek Tigris na godang i.

⁵Hupadorgak ma bohingku jana huida ma sada halak na marpakean abit linen jana na marbobat sere na polin.

⁶Marsinondang do pamatangna songon simata, bohina i songon torang ni sondang ni hilap, jana matana i gara-gara songon api. Tanganna dohot patna marsilo songon tumbaga na digosok, jana sorana tudos tu sora ni halak na ribur nibege.

⁷Hum sada au sajo do na marnida parnidaan i. Anggo angka halak na rap dohot au nada diida halahi i, tapi mabiar gabe marlojong kehe martabuni.

⁸Ditadingkon halahi ma au disi sada au sajo pamanatkon parnidaan na pahomang roha. Nada adong be gogongku jana bohingku pe madung muba jabat nada tartanda be.

⁹Di na hubege sorana i, madabu ma au pingsan lalu tungkap tu tano i.

¹⁰Dung i adong ma tangan na manogu au jana i ma mambaen tarsunggul au lalu hutungkolkon ma tanganku dohot totku; jana laing humitir dope au.

¹¹Didok surusuruan i ma tu au, “Daniel, holong do roha ni Debata mida ho. Jongjong ma ho jana tangihon ma angka hatangkon tangkas. Na disuru do au tu ho.” Dung didok ia songon i jongjong ma au huhut humitir.

¹²Jadi didok ia ma tu au, “Daniel, ulang ho mabiar. Madung ditangihon Debata tangiangmi mamungka sian ari parjolo disi diputuskon ho patoruk rohamu anso gabe marbisuk. Madung ro au gabe songon alus ni tangiangmi.

¹³Jongjong do pamimpin harajaan ni halak Persia i dua pulu sada ari honokna mangalo au; tapi si Mikhael, i ma sada halak sian angka pamimpin i; ro do manolong au, jana hutinggalkon ia disi di adopan ni angka raja ni halak Persia.

¹⁴Ro do au laho mambaen ho mangastui sanga aha na giot tarjadi sanoli on di bangsomu. Taringot tu hatiha na giot ro do parnidaan on.”

¹⁵Di na nidoknia songon i, unduk ma au jana nada malo mangkobari.

¹⁶Tapi adong ma na songon jolma tompana manjama pamanganku; dung i hubuka ma pamanganku jana mulai ma au mangkobari; hudok ma tusia na tongon jongjong di jolongki, “Tuan, hara ni parnidaan i gabe markancit do au, jana nada adong be gogongku.

¹⁷Songon sada naposo na jongjong di jolo ni tuanna do au. Bia ma he baenonku mangkuling tu tuan i? Abis do gogongku boti hosangku pe sompit.”

¹⁸Gabe dijama ia ma au sanoli nari, jana taraso ma tu au martamba gogongku.

¹⁹Didok ia ma, “Holong do roha ni Debata mida ho, hara ni i ulang pola mabiar ho.” Taran mandok songon i dope ia, mur martamba ma huhilala gogongku jana hudok ma, “Didok tuan i ma da hatana. Madung ditambai tuan i gogongku.”

²⁰Dung i ning ia ma, “Diboto ho dehe sanga hara ni aha umbaen na ro au tu ho? Santongkin nari mulak do au laho marporang dohot pamimpin ni halak Persia, jana dung sidung au maralo dohot halahi, gabe marroan ma angka pamimpin ni halak Junani.

²¹Tapi haru pe songon i, paboaonKu do tu ho sanga aha na tarsurat di Buku Hasintongan i. Nada adong sahalak pe na jongjong mamihak tu au sian ias ni roha mangalo halahi, ia so hum si Mikhael, pamimpinmunu i,