Read Batak Angkola DANIEL 12 Bible Online

DANIEL 12 - Batak Angkola bible

DANIEL 12

¹Didok surusuruan na marpakean linen i ma mangulahi, “Tarida ma di hatiha i Mikhael surusuruan na godang pangondian ni bangsomi. Dung i masa ma hasusaan na so adong tudosanna dope mamungka adong angka bangso. Tapi sandok halak na sian bangsomu na tarsurat goarna di bagasan Buku i, paluaon ma i.

²Bahat do sian halahi na dung mate mulak mangolu muse; deba ma i tu hangoluan na manongtong, jana deba nari tu habilean na manongtong muse.

³Marsinondang be ma songon sinondang ni langit angka pamimpin na marbisuk i. Jana halahi na dung mangajari halak na bahat laho mambaen sanga aha na denggan dohot na tigor, marsinondang ma halahi songon angka bintang i salolot-lolotna.”

⁴Dung i didok surusuruan i muse ma tu au, “Daniel, tutup ma Buku i saonnari jana baen ma segelna anso tongtong tutup Buku i lopus tu hatiha na parpudi. Bahat do halak na giot manangkasi sanga aha na giot tarjadi. Tapi nada adong gunana karejo ni halahi i.”

⁵Dung i huida ma dua halak bayo. Na sada jongjong di topi ni batang aek sabola bariba on, jana sahalak nari di topi na di baribaan.

⁶Disapai na sada ma tu na marpakean linen i, na jongjong di julu ni aek i, “Andigan dehe marujung angka hahomangan na tarjadi on?”

⁷Dung i hubege ma sora ni bayo na marbaju linen na jongjong di julu ni batang aek i jana diangkat ia ma tangannia siamun dohot si ambirang adop ginjang anso marsumpa ma ia tu Debata na manongtong i: Sada hatiha dua hatiha dohot satonga hatiha dung abis kuaso ni na mamparkanciti bangso na badia i, marujung muse ma angka na masa i.

⁸Tutu do antong sude na nidoknia i, tapi nada tarastui au. Jadi husapai ma, “Tuan, bia do ujung ni on sudena?”

⁹Dialusi ia ma, “Kehe ma ho saonnari Daniel, harana angkon bunihonon do angka hata on jana rahasiahonon do i lopus tu hatiha na parpudi.

¹⁰Bahat do halak na giot papolinon. Nada mangarti anggo halak na jahat, jana torus do halahi mambaen jahat; hum halak na marbisuk do na mangastuisa.

¹¹Mamungka sian na diantak haul siganup ari i jana dipajongjong Hajahatan Na Manyegohon i, 1.290 ari ma honokna.

¹²Martua ma halahi na tongtong burju lopus tu pa 1.335 arihon.

¹³Burju ma anggo ho Daniel lalu tu ujungna. Marujung ma ngolumu, tapi ngot ma ho mangulahi manjagit upamu di hatiha na parpudi.”