Read Batak Angkola DANIEL 3 Bible Online

DANIEL 3 - Batak Angkola bible

DANIEL 3

¹Di sada hatiha, dibaen Raja Nebukadnesar ma sada patung sian sere 27 meter gincatna jana godangna hira-hira 3 meter. Di napa Dura na di propinsi Babel do i dipajongjong ia.

²Dung i diontang raja i ma sude wakilnia, angka gubernur, bupati, panuturi ni negara, sitiop hepeng, panguhum, siboto undang-undang, dohot sude kapala luat mandohoti upacara parasmian ni patung na nipajongjongnia i.

³Dung ro halahi sude jana marjongjongan di jolo ni patung i,

⁴mangkuling ma wakil ni raja marsora na gogo, “Hamu angka dongan sian sandok bangso, sian marga ni bangso dohot na marhata na marragam-ragam. Tangihon hamu ma parenta ni rajanta on:

⁵Muda mangkuling sarune, ihut muse sora ni suling, hasapi, arbap, gambus, sordam dohot sora ni uning-uningan, angkon tungkap ma hamu marsomba tu patung sere na nipajongjong ni Raja Nebukadnesar on.

⁶Sanga ise na so mangoloi parenta on, manigor danggurkonon ma tu bagasan purunan api na gara-gara.”

⁷Jadi disi tarbege sora ni angka sarune dipalu, manungkap be ma sandok bangso, marga ni bangso dohot hata na marragam-ragam jana marsomba tu patung sere na dipajongjong ni Raja Nebukadnesar i.

⁸Adong ma piga-piga halak Kasdim na mamake tingki i laho mangago halak Jahudi.

⁹Mangadu ma halahi tu Raja Nebukadnesar jana didok halahi ma, “Mangolu ma da raja i sapanjangna!

¹⁰Madung didabu raja i sandiri parenta na mandok, disi dipalu angka sarune, angkon manungkap ma sude jolma na marsomba tu patung sere i,

¹¹jana sanga ise na so mangoloi parenta i danggurkonon ma i tu purunan api na gara-gara.

¹²Hape adong do piga-piga halak Jahudi na niangkat ni raja i mamarenta di propinsi Babel na manggagai parenta ni raja i. I ma si Sadrakh, si Mesakh dohot si Abednego. Nada ra halahi marsomba angka debata ni raja i jana nada ra muse halahi manyomba patung sere na nipajongjong ni raja i.”

¹³Umbege i, muruk sajo ma raja i lalu didabu ia ma parenta anso dioban sitolu halak i ro tusia.

¹⁴Disapai raja i ma tu halahi, “Sadrakh, Mesakh dohot Abednego! Tutu dehe na so ra hamu marsomba angka debatangku jana nada ra muse hamu manungkap tu patung sere na hupajongjong i?

¹⁵Saonnari, ra dehe hamu manungkap dohot marsomba tu patung i muda mangkuling sora ni sarune; suling; hasapi; arbab; sordam; gambus dohot angka uning-uningan na marragam i? Muda nada ra hamu, manigor do ambungkonon hamu tu purunan api na gara-gara. Jana debata dia dope na margogo paluahon hamu sian kuasongku?”

¹⁶Jadi ro ma alus ni si Sadrakh, si Mesakh dohot si Abednego tu Raja Nebukadnesar: “Nada adong gunana alusannami ho anggo taringot tu nanidokkonmi.

¹⁷Muda margogo antong Debatanami paluahon hami sian purunan api na gara-gara i dohot sian kuaso ni raja i, angkon baenonNia do songon i.

¹⁸Tapi sugari nada dibaen Ia songon i, diastui raja i ma anggo hami nada sombaonnami debata ni raja i jana patung sere na nipajongjong ni raja i pe nada sombaonnami.”

¹⁹Jadi gilap ma roha ni Raja Nebukadnesar maradopkon si Sadrakh, si Mesakh dohot si Abednego, jana marrarai bohina. Diparentahon ia ma anso dibaen purunan api na ummilas pitu lompit sian na somal.

²⁰Dung i disuru ia ma piga-piga halak sian tentarania na sun gogona laho manambat si Sadrakh, si Mesakh dohot si Abednego, lalu mangambungkon halahi tu bagasan purunan api na milas i.

²¹Dung i ditambat ma sitolu halak i marpakean na singkop, markameja, marbaju juba, markupia dohot pakean na asing, jana manigor diambungkon ma halahi tu bagasan purunan api na gara-gara i.

²²Hara ni pirna parenta ni raja i, na dung dipamilas hian do purunan i sun milasna jabat mate mosok dibaen jilam ni api i angka halak na mangangkat si Sadrakh, si Mesakh dohot si Abednego tu lambung ni purunan i.

²³Tapi anggo na tolu halak i, i ma si Sadrakh; si Mesakh; dohot si Abednego madabu do songon i tartambat tu bagasan parapian na gara-gara i.

²⁴Jadi ompot ma tarsonggot Raja Nebukadnesar. Jongjong ma ia tompu jana pio-pio tu angka pagawenia, “Inda he tolu halak do nangkin na tatambat i jana na didabuhon tu bagasan api i?” Dialusi halahi ma, “Tutu do i, rajanami.”

²⁵Dialusi raja i ma, “Antong biasi opat halak huida mardalan-dalan di bagasan api i? Nada martambat halahi jana nada bagi mahua. Jana na paopatkon i songon anak ni angka debata do tompana.”

²⁶Dung i dipadonok si Nebukadnesar ma tu lambung ni pintu ni purunan i jana pio-pio ma ia: “Jo Sadrakh, Mesakh dohot Abednego, angka naposo ni Debata Na Gumincat! Ruar ma hamu sian purunan i!” Jadi haruar ma halahi.

²⁷Sude wakil ni raja i, angka gubernur, bupati dohot angka pagawe na asing i marsirongom ma humaliang sitolu halak i jana diida halahi ma saotik pe nada adong dais tu halahi api i. Nada mosok obuk ni halahi, jana pakean ni halahi pe nada puntung, salang uap ni timus pe nada adong di halahi.

²⁸Jadi didok raja i ma, “Puji ma Debata na nisomba ni si Sadrakh, si Mesakh dohot si Abednego. Disuru Ia do surusuruanNia laho paluahon naposoNa na tolu on na porsaya tuSia. Dilaosi halahi do parentangku jana gumonan mate ulang pado marsomba sanga mangoloi tu debata sanga na dia pe asing sian Debata ni halahi sandiri.

²⁹Hara ni i, huparentahon tu ganop halak sian bangso dohot marga ni bangso sanga hata na dia pe na mandokkon hata incak tu Debata na nisomba ni si Sadrakh, si Mesakh dohot si Abednego, angkon nilobong-lobong noma i jana bagasna i dirumpakkon. Angke nada adong debata na margogo mambaen songon na nibaen ni Debata i.”

³⁰Dung i dipanaek raja i ma pangkat ni si Sadrakh, si Mesakh dohot si Abednego, gabe angka parpangkat na gincat ma halahi di propinsi Babel.