Read Batak Angkola DANIEL 6 Bible Online

DANIEL 6 - Batak Angkola bible

DANIEL 6

¹Dung hona bunu si Belsasar, dirampas si Darius halak Media ma habangsa ni harajaan i. Marumur onom pulu dua taon ma ia di hatiha i.

²Dibagi si Darius ma harajaannia i gabe saratus dua pulu propinsi na niparenta ni sada be gubernur.

³Diangkat ia ma si Daniel dohot dua halak donganna laho manjago angka gubernur i anso ulang marugi raja i dibaen halahi.

⁴Manigor torang ma tarida na dumenggan parkarejoan ni si Daniel ulang pado angka gubernur dohot angka parpangkat na gincat na asing i. Hara ni i, por ma roha ni raja i giot mangangkat ia gabe parkuaso di sude harajaan i.

⁵Tapi dijalak-jalahi angka gubernur dohot parpangkat na gincat i ma hasalaan ni si Daniel di bagasan na mamarenta i tapi nada adong dapot halahi, angke na burju do si Daniel jana na tigor, boti nada adong dibaen ia hasalaan bagi aha pe.

⁶Jadi didok halahi ma: “Hum na mardomu tu ugamonia sajo noma dapot hita anggo hasalaan ni si Daniel.”

⁷Dung i kehe ma halahi manopot raja i jana didok halahi ma, “Ale tuannami Raja Darius, sai horas ma da raja i salolot-lolotna!

⁸Hami sude na angka gubernur, angka wakil ni gubernur dohot angka na maniop jabatan na asing, madung martahi hami laho mangusulkon anso diparuar raja i surat parenta na mandok angkon oloan sian situtu ni roha. Diparentahon raja i ma nian sugari, anso di bagasan tolu pulu ari sada halak pe nada tola palalu pangidoan tu sada sian angka debata sanga tu jolma, asing ni na tu raja i sandiri. Sanga ise na mangalanggar parenta i ambungkonon ma tu bagasan liang ni singa.

⁹Hami pangido diteken raja i ma surat parenta i anso gabe undang-undang ni Media dohot Persia na so tarpauba-uba be mangulahi.”

¹⁰Jadi diteken Raja Darius ma surat parenta i.

¹¹Dung dibege si Daniel taringot tusi, mulak ma ia tu bagasnia. Biliknia na di tingkat parginjang, adong do angka jandelana na mangadop tu sabola Jerusalem. Jana songon na somal, sai martangiang do ia tolu noli sadari jana marsinggang di jolo ni angka jandela na tarbuka i.

¹²Marroan ma angka musu ni si Daniel di na niida ni halahi ia taran martangiang tu Debatania.

¹³Marnida i, kehe ma halahi sude manopot raja i laho mangaduhon si Daniel. Didok halahi ma, “Inda he na dung diteken raja i surat parenta na mangalarang sude jolma di bagasan tolu pulu ari on palalu pangidoan tu sada sian angka debata sanga jolma asing tu raja i sajo? Boti muse, danggurkonon do sanga ise na mangalaosi parenta i tu bagasan liang ni singa?” Dialusi raja i ma, “Olo tutu do i, jana gabe undang-undang ni Media dohot Persia na so tarpauba-uba do parenta i.”

¹⁴Didok halahi muse ma tu raja i, “Si Daniel sada halak buangan na sian Juda, nada dipasangap ia raja i, songon i dohot parenta ni raja i nada dioloi ia. Torus do ia martangiang tolu noli sadari.”

¹⁵Umbege i marsak jana ganggu ma raja i, gabe dijalahi ia ma dalan laho paluahon si Daniel. Lopus tu andospotangna i laing marpikir-pikir dope raja i.

¹⁶Dung i mangulahi ma angka jolma i ro tu raja i jana didok halahi ma, “Ale rajanami, giotna diingot raja i ma nian anggo mangihutkon undang-undang ni Media dohot Persia, anggo parenta na niparuar ni raja nada tola uba-ubaon.”

¹⁷Jadi ujungna diparentahon raja i ma anso ditangkup si Daniel jana diambungkon tu bagasan liang ni singa. Didok raja i ma tu si Daniel, “Sai Debata na nisombami ma paluahon ho.”

¹⁸Dung i ditutupkon ma sada batu na godang tu baba ni liang i jana dicap raja i ma batu i dohot cap ni harajaan dohot cap ni angka parpangkat gabe nada tarbaen sanga ise be paluahon si Daniel sian singa i.

¹⁹Dung i kehe ma raja i tu bagas godangnia jana nada mangan ia saborngin i; nada disuru ia anso ro angka panghibur, jana nada bisa ia tarpodom.

²⁰Di andostorang i ngot ma raja i, jana mopop ma ia kehe tu liang ni singa i.

²¹Disi lalu tu inganan i, pio-pio ma ia marsora songon na ganggu tu si Daniel, “Naposo ni Debata na mangolu. Tarpalua Debata na nioloanmi dehe ho sian angka singa i?”

²²Dung i ninna si Daniel ma mangalusi raja i, “Sai ginjang ma umur ni raja i salolot-lolotna!

²³Madung disuru Debatangki surusuruanNia laho manghuntam baba ni angka singa i gabe nada disoro au. Dipalua Debata do au angke diboto Ia do na so marsala au tuSia dohot maradopkon raja i.”

²⁴Sonang ma roha ni raja i jana diparentahon ia ma anso diparuar si Daniel sian liang i. Dung dipadalan parenta i, hape nada adong gasa ni si Daniel saotik pe, angke porsaya do ia tu Debatania.

²⁵Dung i diparentahon raja i ma anso ditangkup angka na mangaduhon si Daniel i. Jadi rap diambungkon ma halahi dohot angka dakdanak dohot angka dadaboruna tu bagasan liang ni singa i. Nada jabat lalu dope halahi tu tandolan ni liang i, manigor disoro angka singa i ma halahi jana diropuk holi-holina i.

²⁶Dung i ditongos Raja Darius ma surat tu angka jolma sian sandok bangso, marga ni bangso dohot hata na marragam-ragam na di tano on sudena. Ninna ma, “Sai martamba ma di hamu rasoki!

²⁷Huparentahon tu sude jolma na adong di luat na hurajai anso mabiar jana marsomba tu Debata na nisomba ni si Daniel! Debata na mangolu do Ia salolot-lolotna, lopus tu ujung ni sudena do Ia mamarenta. Nada ra mago harajaanNia. GogoNia nada marhaujungan.

²⁸Ia do mambaen malua dohot na patupa haluaan, mambaen tanda dohot hahomangan di langit sanga pe di tano. Madung dipalua Ia si Daniel, sian sisilon ni singa.”

²⁹Songon i ma laing marpangkat na gincat si Daniel salolot mamarenta si Darius dohot si Kores halak Persia i.