Read Batak Angkola HOSEA 1 Bible Online

HOSEA 1 - Batak Angkola bible

HOSEA 1

¹On ma tona na nilehen ni TUHAN tu si Hosea anak ni si Beeri taran marudut-udut Juda diparenta angka raja, si Usia, si Jotam, si Ahas, dohot si Hiskia, jana Israel diparenta si Jerobeam anak ni si Joas.

²Hatiha mulai TUHAN manghatai marhite si Hosea, didok Ia ma tu si Hosea, “Kehe ma ho, buat ma sada halak siboru jalang baen dadaborumu, jana anakkon ma angka anak gampang, angke madung ramun kota on marhite na manundalkon TUHAN.”

³Jadi dibuat ia ma si Gomer boru ni si Diblaim gabe dadaborunia. Dung i denggan ma pamatang ni dadaboru i jana manyorangkon sada dakdanak halaklahi.

⁴Dung i didok TUHAN ma tu si Hosea, “Baen ma goar ni anakmi si Jisreel,[1] angke nada sadia honok nari be uhumanKu ma pomparan ni si Jehu hara ni mudar na diduruskon di Jisreel, jana paujungonKu ma pangarajaion ni halak Israel.

⁵Di hatiha i, roncohononKu ma hagogoon ni tentara ni Israel di Rura Jisreel.”

⁶Dung i denggan ma muse pamatang ni dadaboru i jana manubuhon sada dakdanak dadaboru. Didok TUHAN ma tu si Hosea, “Baen ma goar ni borumi si Lo-Ruhama, angke nada holong be rohangKu mida bangso Israel, jana nada ampunanKu be halahi.

⁷Tapi haholonganKu do halak Juda, jana paluaon halahi marhite goar ni TUHAN, Debata ni halahi. PaluaonKu do halahi, sior sanga podang, parhohas ni porang sanga kudo dohot halak na mangalombutsa.”

⁸Dung sirang managuk dakdanak na paduahon i, denggan muse ma pamatang ni si Gomer jana sorang ma sada anak halaklahi.

⁹Dung i didok Ia ma, “Baen ma goar ni anakmi si Lo-Ami, angke nada bangsongKu be hamu, jana nada Debatamunu Au.”

¹⁰Gabe sabahat ni horsik na di topi ni laut bahat ni bangso Israel lopus nada habilangan. Saonnari didok Debata ma tu halahi, “Nada bangsongKu hamu,” tapi dapot do i hatihana dohononNia tu halahi, “Au ma da Debata na mangolu jana hamu angka dakdanakKu!”

¹¹PasadaonNa ma mangulahi bangso Israel dohot bangso Juda. Angkaton ni halahi ma sada pamimpin jana mur mabahat ma halahi jana sonang di tano ni halahi. Tutu do, gabe ari na godang ma Ari Ni Jisreel.