Read Batak Angkola HOSEA 12 Bible Online

HOSEA 12 - Batak Angkola bible

HOSEA 12

¹Didok TUHAN ma, “Dihuliangi Efraim do Au marhite gabus dohot sipaoto-oto; bangso Juda laing tongtong mangalo tu Au, Debata Na Badia jana na tigor.

²Sanga aha na nibaen ni halak Israel sian manyogot lalu tu potang, nada adong gunana jana hum na manyegohon do i songon alogo Habincaran. Mur manjadi-jadi do hageduhan dohot hakejamon di tonga-tonga ni halahi. Dipambaeni halahi angka parjanjian dohot Asur jana marboniaga halahi dohot Mesir.”

³Adong do parkaro ni TUHAN dohot bangso Juda; laing uhumonNia muse do dohot Jakob hara ni pangalaho ni bangso i. BaloskononNia ma parbuatan ni halahi i.

⁴Mamungka sian bortian dope, na dung marsiranggut do si Jakob dohot si Esau donganna linduat i; jana dung timpas godang, marsiranggut ma si Jakob dohot Debata.

⁵Marsiranggut ia dohot sahalak surusuruan, jana monang ia. Lalu tangis ma ia jana mangido anso dipasupasu. Dung i ro ma Debata di Betel mandapotkon si Jakob ompunta i, lalu mangkobari dohot ia.

⁶Debata i ma TUHAN, Debata Na Markuaso i. TUHAN do goarNa. Marhite goar i ma dihagioti rohaNia maribadat halak tuSia.

⁷Hara ni i, ale hamu pomparan ni si Jakob, haporsayai hamu ma Debatamunu i jana mulak ma hamu tuSia. Gok holong ni roha dohot hatigoran ma ngolumunu, jana sobar ma hamu paintehon lopus tulus i dibaen Debatamunu.

⁸Didok TUHAN ma tu bangso Israel, “Geduk do hamu songon halak Kanaan; mangicu do angka parboniaga sian hamu tu langgananna marhite timbangan na so tutu.

⁹‘Saonnari mamora hita,’ ninna halahi, ‘Maruntung hita! Sahalak pe nada adong tarbaen manudu hita dapotan hamoraon i sian dalan na geduk.’

¹⁰Tapi Au TUHAN, Debatamunu na maroban hamu haruar sian Mesir, baenonKu ma hamu mangulahi maringanan di angka bandar songon najolo di na Hudapotkon hamu di padang halongonan.

¹¹Madung manghobari Au tu angka panurirang, jana Hulehen bahat parnidaan tu halahi. Marhite sian halahi Hulehen do sipaingot tu hamu, bangsongKu

¹²hape haru songon i pe laing adong do na marsomba gana-ganaan di Gilead dohot na mamelehon lombu di ginjang ni langgatan na di Gilgal. Tapi muli mate do halahi na marsomba gana-ganaan i, jana angka langgatan na di Gilgal i pe gabe batu na nipagukguk di ladang do.”

¹³Gilo do ompunta si Jakob tu Aram jana marinduk somang ma ia tu halak na disi jana marmahan angka biri-biri ni jolma i laho mambuat boru disia.

¹⁴Disuru TUHAN do sada panurirang laho paluahon halak Israel sian parhatobanan di Mesir, bope laho manjagohon halahi.

¹⁵Sun do muruk ni TUHAN dibaen halak Israel; patut do hona uhum halahi hara ni hajahatan ni halahi. Hona uhuman ni TUHAN ma halahi angke patunda ni halahi gabe marlayas Ia dibaen halak.