Read Batak Angkola HOSEA 13 Bible Online

HOSEA 13 - Batak Angkola bible

HOSEA 13

¹Najolo dipasangap do Marga Efraim, jadi muda jabat adong parenta sian marga i, mabiar be noma angka marga na asing na di Israel. Hape mardosa do Marga Efraim hara ni na marsomba tu Baal, i ma mambaen mate ia.

²Lopus saonnari laing torus dope mardosa angka halak Efraim i; dipambaeni halahi do angka patung sian perak na nirangrangan ni akal ni jolma jana na nigana ni tangan ni jolma lalu disomba ma i. Didok halahi, “Pelehon ma haul tu angka patung on!” Padiar ma diummai jolma i angka anak ni lombu i!

³Jadi hara ni i angkon mago ma angka jolma i songon nambur jana songon ombun manyogot. Songon durame di pardegean ma halahi na niombus ni alogo jana songon timus na ruar sian tataring.

⁴Didok TUHAN ma, “Au do TUHAN Debatamu, mamungka sian tano Mesir. Nada adong TUHAN Debatamunu asing sian Au. Jana nada adong sipalua asing sian Au.

⁵Di tano na harsang di padang halongonan, Au do na manjagohon hamu.

⁶Hape dung lalu hamu di tano na denggan jana butongan hamu lopus sombu, gabe ginjang ma rohamunu jana lupa ma hamu tu Au.

⁷Jadi hara ni i, soroonKu ma hamu songon panyoro ni singa. Songon babiat na mangadang di dalan baenonKu tu hamu.

⁸ParsurageonKu ma hamu songon gompul na agoan anak. Sibak-sibahonKu ma hamu. Songon singa, giot polgakonKu hamu di ingananmunu, jana songon binatang panyoro parsurageonKu ma hamu.”

⁹SargehononKu ma hamu, ale bangso Israel! Jana ise ma na margogo mangurupi hamu?

¹⁰Di dia ulaning rajamu, anso dipalua ia ho, dohot sude pamimpinmu anso dilehen ia hatigoran tu ho, ale ho na mandok, “Lehen ma tu au sahalak raja dohot angka pamimpin.

¹¹Hara ni muruk, Hulehen raja di hamu, jana mardongan rimas Hutarik mangulahi.”

¹²“Madung dibungkus hasalaan ni Efraim, jana disimpan do dosana i.

¹³Adong dope hatiha na denggan di Israel laho mangolu nian, tapi songon i ma antong otona gabe nada diparhasaya ari-ari i. Songon dakdanak na giot sorang do ia, tapi nada ra ia haruar sian bortian ni inangna.

¹⁴Giot paluaonKu dehe bangso on sian kuaso ni inganan ni jolma na mate? Jo hamatean, sarsarkon ma balamu! Padalan ma karejomu na manyegohon i! Nada be ibo rohangKu mida bangso on.

¹⁵Haru pe sonang Israel songon duhut na napu, laing suruonKu ma alogo Habincaran na milas i sian padang parhorsihan. Mahiang ma baenon ni alogo i sude mual ni aek dohot angka sumur bage, gabe mago ma sudena na mararga.