Read Batak Angkola HOSEA 14 Bible Online

HOSEA 14 - Batak Angkola bible

HOSEA 14

¹Angkon uhumon do Samaria hara ni na mangalo tu Au. Marmatean ma rayatna i di bagasan parporangan; hona giling angka dakdanakna na baru sorang, jana angka dadaboru na denggan pamatangna hona bola butuhana i.”

²Mulak ma hamu tu TUHAN Debatamunu, ale bangso Israel! Dosamunu do mambaen hamu tarsilandit lalu tinggang.

³Mulak ma hamu tu TUHAN jana palalu hamu ma tangiang on gabe songon haul tuSia, “TUHAN, sesa ma sude dosanami jana jagit ma tangiangnami on, gabe pujionnami ma Ho laing songon na dung hami janjihon i.

⁴Anggo Asur nada margogo i paluahon hami, jana kudo porang pe nada tarbaensa mangurupi hami. Nada ra be hami manghobari dohot angka patung na hami baen i gabe debatanami. Ale TUHAN, holong do rohaMu di angka jolma na so adong sanga ise pe sipangasahononna.”

⁵“Na manyimbil sian bangsongKu, Hubuat mangulahi, jana sian sandok rohangKu Huhaholongi; jana nada muruhanKu be halahi.

⁶Di halak Israel songon ombun do Au na mangaehi tano na harsang. Mangerbang ma halahi songon bunga jana songon bona ni tusam na bagas uratna.

⁷Angka rantingna pe manjarampak, rimbunna pe songon hayu zetun jana uapna pe songon na di Libanon.

⁸Sanoli nari giot mulak halahi jana ondihononKu noma halahi. Tibu do halahi maradu sonang, songon gandum di tano napu na tibu martumbur. Tudos ma halahi tu kobun anggur, songon anggur Libanon tibu goar ni halahi tarbarita.

⁹Efraim, aha dope he lakna hubunganKu dohot angka gana-ganaan? Au do na mangalusi dohot na mamparate-atehon ho! Songon hayu sanobar na rata do Au, sian Au ma ho mandapot parbatuna.”

¹⁰Barang ise na marbisuk denggan ma ia mangastuisa; barang ise na mangastui denggan ma ia mambotosa; harana tigor do angka dalan ni TUHAN, jana halak na tigor do na mandalanisa, tapi angka parjahat tarsilandit do disi.