Read Batak Angkola HOSEA 4 Bible Online

HOSEA 4 - Batak Angkola bible

HOSEA 4

¹Adong do parkaro ni TUHAN dohot halak luat on. Tangihon ale Israel, sanga aha na nidokNia, “Nada adong na tutu, nada adong holong ni roha jana halak luat on pe nada dioKu Au Debata.

²Dibaen halahi janji hape nada digohi halahi; margabus, mamunu, manangko, manggampang do halahi. Martamba do hajahatan jana mardapot-dapot pamunuon.

³Jadi hara ni i gabe mahiang ma luat on, jana mate noma sandok na mangolu disi. Susa ma sude ragam ni binatang na di awang-awang, na di darat dohot na di laut.”

⁴Didok TUHAN ma, “Ale angka malim, ulang adong sian hamu na pasalahon sanga mamuruhi bangsongKi, angke hamu do na Hupasala!

⁵Arian na borngin do hamu mambaen hasalaan, songon i muse angka panurirang. Hara ni i giot abisanKu ma Israel, inangmi.

⁶Hamu angka malim nada parduli hamu di Au, gabe songon i muse ma bangsongKu nada parduli be tu Au, lopus marjaya halahi. Ditulak hamu do angka pangajaranKu. Jadi Au pe tulahonKu noma hamu, jana nada Huokui angka dakdanakmunu gabe malim di Au.

⁷Mur martamba bahatmunu, mur mardosa muse do hamu tu Au, ale angka malim! Harana angkon paubaonKu do na masa tu hamu. Nada pasangapon be hamu tapi palayason noma.

⁸Gabe mamora do hamu hara ni dosa ni bangsongKi, i ma dalanna dihagioti hamu anso torus halahi mardosa.

⁹Jadi gabe markancit noma hamu laing songon rayat i! UhumanKu ma hamu hombar tu angka pambaenanmunu.

¹⁰Panganonmunu do nian sian angka haul na nihaulkon i, hape tongtong malean. Sombaonmunu ma angka debata hagabean, tapi laing nada maruntungan hamu, angke madung ditadingkon hamu Au laho marsomba hamu tu angka debata.”

¹¹Parbatu ni anggur dohot aek ni anggur mangagohon hagogoan laho marpikir.

¹²Marsapa do bangsongKu tu bona ni hayu! Dipaboa sada tungkot do tu hamu sanga aha na giot sibotoonmunu! Ditadingkon hamu do Au. Songon sada anakboru na gabe panggampang, songon i ma dibaen hamu pasahat dirimunu tu angka debata.

¹³Di angka inganan parsombaan ni gana-ganaan di puncu ni angka tor dihaulkon hamu do haul jana ditutung hamu dupa di toru ni angka hayu na godang jana na rumbun disi hara ni na laung inganan i. Tapi aha do akibatna? Gabe panggampang do angka borumunu jana parumaenmunu gabe dadaboru parhamainan!

¹⁴Tapi nada uhumonKu halahi hara ni i, angke hamu sandiri pe kehe do tu angka panggampang na markarejo di angka bagas parsombaan, jana dihaulkon hamu do haul tu debata rap dohot halahi. Tutu situtu ma da na nidok ni pandohan on, ‘Jana bangso na so marpangastuion angkon maronco.’

¹⁵Ale hamu halak Israel, haru pe nada unduk hamu tu Au, sai ulang ma nian dohot Juda mambaen hasalaan na nibaenmunu i! Ulang maribadat di Gilgal sanga di Bet-Awen. Ulang baen hamu janji disi mangasahon goar ni TUHAN na mangolu i.

¹⁶Harana tangkang do Israel songon lombu na tangkang, giot bia ma he TUHAN marmahani halahi, songon biri-biri di tano lapang?

¹⁷Mardomu do Efraim dohot angka gana-ganaan, padiar ma ia!

¹⁸Dung mabuk halahi hara ni na mabahattu minum anggur, sonang ma roha ni halahi manggampang. Jumop noma roha ni halahi marlayas ulang dipasangap.

¹⁹Jadi gabe mago ma halahi songon na niombus ni alogo. Maila ma halahi hara ni angka haul na nihaulkon ni halahi tu angka debata.