Read Batak Angkola HOSEA 6 Bible Online

HOSEA 6 - Batak Angkola bible

HOSEA 6

¹“Beta ma mulak hita tu TUHAN. Ia do na mambaen marhancit hita, tapi laing Ia muse do na pamalumkon. Ia do na mambugangi hita, tapi laing Ia muse do na mambalut angka bugangta.

²Di bagasan dua tolu ari on sunggulanNia ma hita jana mangolu di bagasan pangondianNa.

³Hara ni i, tahaburjuhon ma laho mananda TUHAN. Pasti do ro Ia tu hita songon parbincar ni mataniari jana songon udan na mangaehi tano di ujung ni ari nonat.”

⁴Tapi didok TUHAN ma, “Ale Israel dohot Juda! Angkon bia noma hamu baenonKu? Tibu do mago holong ni rohamu tu Au songon nambur sanga ombun manyogot.

⁵Hara ni i do umbaen na Husuru angka panurirangKu laho palaluhon tu hamu haputusanKu na mandok angkon uhumon jana abiskonon noma hamu. Torang jana tangkas do na nipangido ni rohangKu sian hamu:

⁶GiotKu nian ditanda hamu ma Au jana tongtong dihaholongi hamu, nada anso dihaulkon hamu haul tu Au.

⁷Tapi songon si Adam, digagai hamu do janjimunu dohot Au.

⁸Gilead, i ma sada kota na gok parjahat dohot sibunu jolma.

⁹Songon punguan ni panyamun na mangambat halak pamolus do angka malim na di kota i. Salang di dalan laho tu inganan na badia di Sikem pe puluk do halahi mamunu jolma! Disangajo halahi do mambaen hajahatan i sude.

¹⁰Huida do sada hajorbuton di Israel: Hodar do dibaen bangsongKi dirina sandiri marhite na manyomba gana-ganaan.

¹¹Taringot tu hamu ale halak Juda, madung Hutontuhon hatihana manguhumi hamu laing hara ni parbuatanmu.”