Read Batak Angkola HOSEA 9 Bible Online

HOSEA 9 - Batak Angkola bible

HOSEA 9

¹Ale bangso Israel, ulang be hagodangkon hamu angka ari pestamunu songon angka bangso na asing. Madung ditadingkon hamu Debatamunu jana nada burju hamu tuSia. Di sude luat on, digadis hamu do dirimunu songon panggampang tu Debata Baal, jana sonang rohamunu manjagit gandum na nietong ni rohamunu songon upa ni debata i tu hamu!

²Tapi nada sadia honok nari hurangan gandum ma hamu dohot miak zetun, dohot anggur pe abis muse ma.

³Hamu ale halak Israel, nada tongtong hamu tinggal di tano na nilehen ni TUHAN tu hamu. Angkon mulak hamu tu Mesir jana angkon panganonmunu sipanganon na haram[6] di Asur.

⁴Anggo di angka luat i nada tarbaen hamu manghaulkon anggur dohot haul situtungon laho pasonang roha ni TUHAN. Gabe hodar sandok halak na mangankon sipanganon i, songon sipanganon na dipangan di na mangubur na mate. Hum na pabutong butuha sajo do guna ni sipanganon i; saotik pe nada obanon i tu Bagas Ni TUHAN anso dihaulkon disi.

⁵Di angka ari pesta ni ugamo, nada adong tarbaen hamu laho manghagodangkon ari i.

⁶Madung donok hamamago jana masarsar ma hamu. Jadi palagut-laguton ni halak Mesir ma hamu anso dikubur di Memphis! Tubu ma duhut dohot duri, jana tutupanna ma parbagasonmunu humani dohot angka barang perakmunu sigodang arga i.

⁷Madung dapot ari panguhuman, hatiha pamaloson tu sandok parbuatan. Taonon ni Israel noma i! Didok hamu, “Na oto do panurirang on. Na rintik do jolma na nirajaan ni tondi on!” Didok hamu pe songon i hara ni gigina do rohamunu tu Au jana dosamunu santak godangna.

⁸Efraim, bangso ni Debatangku mangintip angka panurirang, mambaen jorat songon na manangkup unggas di angka dalanna. Dimusui halahi do angka panurirang i di Bagas Ni Debata.

⁹Na lobi do jahatmunu songon na dung unjung dibaen halak Gibea.[7] Ingoton ni Debata do hasalaanmunu jana uhumanNa hamu hara ni dosamunu i.

¹⁰Didok TUHAN ma, “Di mulana marsuo Au dohot Israel marjop ni roha do Au songon dia bayo na dapotan batu ni anggur di padang halongonan. Di na parjolo situtu Huida angka ompumunu, sonang noma rohangKu songon halak na marnida patumonaan ni batu ni ara. Tapi di na kehe halahi tu Dolok Peor, mamungka ma halahi marsomba Baal, jadi gabe hodar ma halahi songon debata na nihaholongan ni halahi i.

¹¹Habang noma hagodangan ni Israel mago songon unggas; nada adong be na mardenggan pamatang jana nada adong be dakdanak na sorang.

¹²Tapi haru pe adong dakdanak na sorang jana na dipagodang-godang, buatonKu do halahi; sahalak pe nada Hupaloas mangolu. Marjaya ma hamu ale bangso Israel, muda jabat Hutadingkon hamu!”

¹³TUHAN, huida do angka dakdanak ni halahi diayak-ayak jana dibunu. Tarpaksa do dilehen si Efraim dakdanakna i tu si pamunu.

¹⁴Lehen ma di halahi, ale TUHAN — aha dehe na giot silehenonMu? Baen ma halahi gabe dadaboru na punu, jana na so bisa pasusuhon dakdanakna.

¹⁵Didok TUHAN ma, “Di Gilgal do mamungka sude hajahatan ni halahi i. Disi ma mamungka goyak rohangKu mida halahi. Hara ni jahat ni pambaenan ni halahi, paorotonKu noma halahi sian tanongKon. Nada holong be rohangKu tu halahi; madung sude pamimpin ni halahi mangalo tu Au.

¹⁶Songon suan-suanan na so marbatu, jana na mahiang uratna, tudos tusi do anggo Israel. Nada adong untunganna tapi haru pe adong dakdanak ni halahi, bunuonKu do angka dakdanak haholongan ni halahi i.”

¹⁷Tulakkonon ni Debata na huoloi ma bangsoNa i, hara ni na so ra halahi manangihon Ia. Madang-adang noma halahi ditonga-tonga ni angka bangso.