Read Batak Angkola JOEL 3 Bible Online

JOEL 3 - Batak Angkola bible

JOEL 3

¹Didok TUHAN ma, “PasuangonKu ma di hatiha i hasonangan ni Jerusalem dohot Juda.

²PalagutonKu ma sandok bangso jana obanonKu tu Rura Josafat. TimbangonKu ma parkaro ni halahi disi domu tu hajahatanna maradopkon bangsongKu angke dibagi-bagi halahi do tano Israel jana dibuang halahi bangsongKi tu luat na marragam.

³Marundi ma halahi laho manontuhon sanga ise na patut dapotan angka na tartangkup. Digadis halahi do angka bujing-bujing dohot doli-doli baenon gabe hatoban. Jana dipake halahi ma hepengna i tu dadaboru panggampang dohot minum anggur.

⁴Na giot bia do baenonmu Au, ale Tirus, Sidon, dohot sandok Luat Pilistin? Na giot palalu hosom dehe ho tu Au? Jagit ma pamalosonKu na tompu harorona muda dibaen ho na songon i.

⁵Ditangkoi hamu do sere dohot perakKu, jana dioban hamu artangKu sigodang arga tu bagasan bagas pameleanmunu.

⁶Halak Juda dohot Jerusalem dioban hamu dao sian tanona; dung i digadis hamu tu halak Junani.

⁷Saonnari Huoban halahi ruar sian angka inganan panggadisanna dibaen hamu, jana balosonKu ma hajahatanmunu maradopkon halahi.

⁸GadisonKu angka anakmu halaklahi dohot dadaboru tu halak Juda, jana gadisonna muse ma i tu halak Seba, luat na dao situtu. Au TUHAN mandok songon i.

⁹Pabotohon ma boa-boa on tu angka bangso: Markobas ma marporang dohot mangasahon gogo! Pajuju hamu ma angka na malo marlojong dohot angka ulubalang; palagut sude angka parajurit, beta ma, maju ma!

¹⁰Topa ma pangkurmu gabe podang, dohot piso parpangkas gabe parkokas laho maniham. Halak na gale-gale pe dohot mandok, ‘Tolap au do marporang songon tentara!’

¹¹Beta, tibu ma hamu ro, ale angka bangso na marroan sian jae dohot sian julu! Marlagut ma hamu di rura adu i.” Ale TUHAN, suruhon ma tentaraMu mangalo halahi!

¹²Didok TUHAN dope, “Angkon markobas do angka bangso lalu kehe tu Rura Josafat. Disi ma uhumanKu angka bangso, Au Tuhan manguhumi hombar balok ni bangsongKi.

¹³Na lobi do jahat ni halahi; rabi ma halahi songon gandum na matobang di ladang. Ropuk ma halahi songon anggur di pangilangan na bubung lopus masabur.

¹⁴Marribu-ribu jolma na ro di Rura Josafat i. Angke manigor ro noma disi ari ni TUHAN i.

¹⁵Manggolap ma mataniari dohot bulan, jana angka bintang pe nada marsinondang be.”

¹⁶Mangorong ma Debata sian Sion, dipatubegehon Ia ma soraNia sian Jerusalem. Humutur langit, dohot tano pe mangihut. Tapi laing tong do TUHAN mambela bangsoNa.

¹⁷“Ale Israel, saonnari botoonmunu, Au do TUHAN Debatamunu. Di Sion do Au maringanan i ma dolokKu Na Badia i. Gabe kota na badia noma Jerusalem, nada be taluhonon ni halak na asing kota i.

¹⁸Gok kobun anggur noma angka dolok di hatiha i. Angka pahan-pahanan manjampali ma di tor na napu. Angka batang aek ni Juda nada unjung abis be aekna. Mardalan ma sada batang aek sian Bagas Ni TUHAN, jana aekanna Rura Sitim.

¹⁹Anggo Mesir gabe halongonan na harsang, jana Edom gabe tano na harsang na so hainganan jolma. Angke diporangi halahi do tano Juda, jana dibunu halak na disi do na so marsala.

²⁰Tapi anggo Juda di ingani do salolot ni lolotna jana Jerusalem marsundut-sundut.

²¹BaloskononKu ma mudar ni halahi tu halak na mamunu halahi, di Sion do TUHAN maringanan.”