Read Batak Angkola AMOS 3 Bible Online

AMOS 3 - Batak Angkola bible

AMOS 3

¹Tangihon hamu ma tona ni TUHAN on, ale bangso Israel na nioban ni TUHAN haruar sian Mesir. Didok TUHAN do,

²“Sian sandok bangso na di tano on, hum sasada hamu sajo do bangso na Hutanda dohot na Huantoi. I ma mambaen godang dosamunu, jana angkon uhumanKu hamu.”

³Tarbaen he ma rap kehe dua halak anggo so jolo martahi?

⁴Jolo marngaur dehe singa di harangan painte so manyoro? Marngaur dehe anak ni singa di bagasan asarna painte so ditangkup ia bagi aha?

⁵Hona jorgong dehe unggas haru so ditaon dope rambang? Bingkas dehe sambil haru so adong na hona tangkup?

⁶Nada he humitir halak muda tarbege sora ni sarune tanda ni gore ni porang? Hona parmaraan dehe sada kota, anggo so TUHAN manongoskonsa?

⁷Nada dibaen Tuhan DEBATA i sanga na aha painte so dipabotohon Ia sangkap na nibaenNia tu angka panurirang, naposoNia.

⁸Muda marngaur singa, ise ma he mabiar? Muda mandok hata TUHAN Debata, ise ma he tarbaen so jana nada paboahon tonaNia?

⁹Pabotohon ma on tu angka jolma na maringanan di bagas godang ni Mesir dohot Asdod, “Marlagut ma hamu di angka dolok na humaliang Samaria, jana pamanat hamu ma hasursaran godang dohot angka hajahatan na dipambaeni disi.”

¹⁰“Saotik nada adong diboto halahi mambaen na tigor, ninna TUHAN, dibaen halahi do bagas paribadatanna dohot angka hakejamon dohot parkancitan.”

¹¹Hara ni i, hobuhon ni musuna noma tano ni halahi, disarsarkon partahananna, jana dirampas angka bagas godang ni halahi.

¹²Songon on do didok TUHAN, “Songon sada halak parmahan na paluahon dua pat sanga sabariba pinggol ni biri-biri sian baba ni singa, songon i ma halak Samaria i giot paluaon, saotik sajo noma na tading.”

¹³Didok Tuhan DEBATA, Debata Na Markuaso i ma, “Parrohahon ma saonnari jana paingot ma pomparan ni si Jakob.

¹⁴Di ari i di na manguhum Au tu halak Israel hara ni dosana, sarsarkononKu ma angka langgatan na adong di Betel. Ponggolkonon ma sude ujung ni angka langgatan i, anso dabu sude tu tano.

¹⁵RoncohononKu sude angka bagas parangin-anginan di musim ngali dohot musim panas. Marrumpahan ma angka bagas na dipajeges dohot gading; marumpak ma sude bagas na godang.