Read Batak Angkola AMOS 4 Bible Online

AMOS 4 - Batak Angkola bible

AMOS 4

¹Tangihon hamu ma, ale angka boru Samaria, na mur mamokmok songon angka lombu Basan! Dipisat hamu do halak na gale, halak na pogos diporo hamu, jana sai digogohon hamu anso diparade halaklahimu tongtong inumon na koras di hamu!

²Au Tuhan DEBATA, TUHAN Na Badia do Au, jana madung Hujanjihon, muli dapot do hatihana saraton hamu dohot saitan; songon ihan na hona hail ma hamu.

³Saraton ma hamu jana ambungkonon tu ruar, sian rigat ni tembok na dumonok. Au TUHAN madung mandok songon i.”

⁴“Ro ma tu Betel jana karejohon ma angka na jat, tu Gilgal jana mur pahebat ma karejo na jat i! Pupu hamu ma manghaulkon haul i ganop ari, jana oban ma haul parsampuluanmu ganop di ari patoluhon!

⁵Datdati hamu ma na manghaulkon roti mandok tarimakasi tu Au, jana toruskon hamu ma mamburas paboa na dung dioban hamu tamba-tamba ni haulmunu! Nada he songon i do diparhagiot rohamunu ale halak Israel?” Songon i ma didok Tuhan DEBATA.

⁶Au do na pamasahon haleon potir tu sude kotamunu, hape nada mulak hamu tu Au.

⁷Au do na mangantak ulang ro udan di na porlu situtu maraek suan-suananmunu. Huparo udan tu kota na sada, tapi tu kota na asing nada. Ladang na sada por udan, hape ladang na asing halogoan.

⁸Di deba kota ma pola gale halakna hara ni na manguas, manjalahi aek tu kota na asing, hape nada tuk aek na disi. Haru pe songon i, laing na so mulak do hamu tu Au.

⁹Huombuskon alogo na milas mamatehon angka suan-suanan. Siapor na mangabiskon bona ni anggur, bona ni ara, bona ni zetun dohot suan-suanan na asing di angka kobunmunu. Haru pe songon i, laing nada mulak hamu tu Au.

¹⁰Hutongos tu hamu nyae masa songon na hutongos tu Mesir. Humatehon angka doli-dolimunu di bagasan parporangan, jana hurampas angka kudomu. Hugohi inganan ni bandarmunu dohot bangke na manyusuk bauna tu igung. Haru songon i pe, laing nada mulak hamu tu Au.

¹¹“Madung Husegoi angka hutamunu, songon Sodom dohot Gomora na disegoi ni Debata. Na tinggal mangolu sian hamu i ma na tudos tu surpu na niela sian api. Haru songon i pe, laing nada mulak hamu tu Au.

¹²Hara ni i, ale halak Israel, uhumanKu ma hamu. Antong marhobas ma hamu mangadopi uhumanKu!”

¹³Dolok dohot alogo, TUHAN do manompasa; dipabotohon Ia do sangkapNia tu jolma manusia. Diuba Ia do arian gabe borngin, jana di puncu ni angka dolok Ia mardalani. TUHAN, Debata Na Markuaso, i do goarNia.