Read Batak Angkola AMOS 5 Bible Online

AMOS 5 - Batak Angkola bible

AMOS 5

¹Tangihon ma ale bangso Israel! Giot endehononKu sada ende arsak di hamu:

²Madung tinggang Israel boru na bujing i, nada lobassa jongjong be! Dipadiar ia bustang di tano, nada adong mangurupisa jongjong.

³Didok Tuhan DEBATA i ma, “Dipajuju sada kota do di Israel saribu halak tentara, hape hum saratus noma na mulak; kota na asing marsuru saratus halak, sampulu noma na mulak.”

⁴Didok TUHAN ma tu halak Israel, “Mulak ma hamu tu Au, anso gabe mangolu hamu.

⁵Ulang hamu kehe tu Berseba laho marsomba. Ulang jalahi hamu Au di Betel, angke na laho mago do Betel. Ulang kehe muse hamu tu Gilgal, angke na giot obanon do halak kota i tu habuangan.”

⁶Mulak ma hamu tu TUHAN, gabe mangolu ma hamu. Muda nada mulak hamu tuSia, ro ma Ia songon api na manutung lopus abis halak Israel. Panganon ni api i ma sudena halak na maringanan di Betel, jana nada adong sanga ise pe na tarbaen mangintopisa.

⁷Marjaya ma hamu, angka na pabalik-balikkon hatigoran dohot na mamogo hak ni halak!

⁸TUHAN do na mambaen angka bintang na di ginjang — bintang Poriama dohot bintang Sidongdong. Dipauba Ia do na golap gabe torang dohot arian gabe borngin. Aek na sian laut ditimba Ia tu darat i. TUHAN do na mambaen sudena i.

⁹Ia do na parohon hasesego maradopkon angka na gogo, gabe ro hasesego i tu benteng ni halahi.

¹⁰Goyak do rohamunu mida halak na mangalo hageduhan jana na mandok hata na tutu di paruhuman.

¹¹Dipisat hamu do halak na pogos jana dirampas hamu dohot gandumna. Hara ni i, nada be ingananmunu angka bagas batumunu na jeges-jeges i na nipajongjongmunu jana nada inumonmunu be anggur na sian kobun anggur na nisuanmunu.

¹²Huboto do sanga songon dia godang ni hajahatanmunu dohot bahat ni dosamunu. Disosak hamu do halak na burju; dijagit hamu do sogok jana dipadiar hamu do dibaen na so tigor tu halak na pogos di paruhuman.

¹³Hara ni i halak na marpikir, sip do ia di hatiha i, harana hatiha na jahat do hatiha i.

¹⁴Parayak hamu ma mambaen na denggan jana ulang ma mambaen na jahat, anso mangolu hamu. Gabe tutu situtu ma maringanan TUHAN, Debata Na Markuaso i di tonga-tongamunu songon na nidokmunu i.

¹⁵Hagigihon hamu ma na jahat, haholongi hamu ma na denggan, jana hajongjongkon hamu ma na tigor. Betak na ibo do roha ni TUHAN di angka jolma na teba i sian pomparan ni si Josep.

¹⁶Didok TUHAN, Debata Na Markuaso i ma, “Di angka dalan ni kota, mangandungi ma halak jana humolos hara ni arsakna. Salang partani pe piohononna anso dohot tangis rap dohot halak na diupai laho mangandungi jolma na mate.

¹⁷Di sude kobun anggur, mangandung ma halak, muda mardalan Au sian tonga-tongamunu,” ninna TUHAN.

¹⁸Na marjaya situtu ma da hamu na painte-intehon ari ni TUHAN i! Aha ma he guna ni ari i di hamu? Hum ari na golap sajo do ari i, nada ari na torang.

¹⁹Tudos tu halak na marlojong sian singa do pangalahona, hape marsuo dohot gompul. Sanga songon halak na mulak tu bagasna, jana ditungkolkon tanganna tu tembok lalu diturbing ulok!

²⁰Hagolapan do tutu na ro sian ari ni TUHAN i, nada hatorangan, ari na holom dohot na habot do.

²¹Didok TUHAN ma, “Goyak do rohangKu jana magigi Au mida angka pesta ni ugamomunu!

²²Muda dioban hamu haul situtungon dohot haul gandum nada ra Au manjagitsa. Nada ra Au manjagit angka pahan-pahananmunu na mokmok i na nihaulkonmunu gabe haul pardamean. Nada ra Au mangaligisa.

²³Antak hamu ma ende-endemunu na pagaor-gaorkon i; nada giot Au patangi-tangi hasapimunu i.

²⁴Dumenggan do usahohon hamu anso mardalan hatigoran songon aek, jana hajujuron songon batang aek na tongtong mardalan.

²⁵Ale halak Israel, taran Hutogu-togu hamu mamolus padang halongonan opat pulu taon honokna, nada Hupangido angka haul sian hamu.

²⁶Hape disomba hamu do patung Sakut, debata na nietong ni rohamunu rajamunu i, dohot Debata Kewan, bintang na nipardebatamunu i. Jadi saonnari angkon obanonmunu sandiri ma angka patungmunu i

²⁷muda Hubuang hamu tu sada luat na dumao sian Damaskus, ninna TUHAN na margoar Debata Na Markuaso.”