Read Batak Angkola OBAJA 1 Bible Online

OBAJA 1 - Batak Angkola bible

OBAJA 1

¹On ma parnidaan ni si Obaja; dipalalu ia do tona ni Tuhan Na Gumincat i taringot tu bangso Edom: Ditongos TUHAN ma angka suruanNa tu angka bangso, jana hubege do tona na niobanna i, “Markobas ma hamu marporang! Beta ma hita mamorangi Edom.”

²Jana tu Edom didok TUHAN ma, “Gale ma ho baenonKu lopus marlayas baenon ni sandok bangso.

³Maoto ma ho baenon ni rohamu na gutgut i. Benteng na togu do nian kota sabunganmu; ingananmu pe di puncu ni dolok na gincat do. Hara ni i gabe marpikir ma ho, ‘Ise ma he na bisa mandabuhon Au?’

⁴Haru dibaen ho pe bagasmu songon gincat ni asar ni unggas rajawali jana gincat ni angka bintang di langit, laing bisa Au do mangarumpakkon i.”

⁵Anggo panangko na ro borngin-borngin, hum por ni rohania do dibuat ia. Halak na mamutik anggur di kobunna, ditinggalkon ia do i deba. Tapi anggo ho, abis noma baenon ni angka musumu.

⁶Ale Esau, madung hona rampas sinadonganmu jana dibagi-bagi.

⁷Dipaoto-oto angka donganmu ho jana dipaorot sian tanomu. Talu ho dibaen angka ale-alemu, ise na rap mangan dohot ho, i do na mambaen jorat tu ho. Sapa-sapa do halahi taringot tu dirimu, ‘Dia dehe sude hamaloannia i?’

⁸Nada he hatiha i songon on do didok TUHAN, “AbiskononKu ma angka halak na pistar sian Edom dohot habisuhon sian partoran Esau?

⁹Mabiar be ma angka parporang na sian Teman, jana marmatean sude parangan ni Edom.”

¹⁰“Jahat do pambaenmu maradopkon angka kahanggimu pomparan ni si Jakob. Jadi hara ni i, roncohonon noma ho, jana ho pe abiskonon noma ro di salolot ni lolotna.

¹¹Jongjong ho di na dao, di ari pangarorak ni musu di pintu ni Jerusalem laho manaluhon kota i. Hohom sajo do ho di na nioban ni halahi sude sinadongan ni Jerusalem jana dibagi-bagi sudena i di halahi. Sarupa do jahatmu dohot musu i.

¹²Nada patut sonang ho nian marnida sitaonon ni angka pomparan ni halak Juda i jana marjop ni roha ho di ari hamamagonai. Nada patut ho antong martata taran susa ia.

¹³Nada patut ho masuk tu kota ni bangsongKi, dohot manyurahi angka jolma na marhancit i, jana mangarampas hartonia di ari hasusaanna!

¹⁴Nada pola angkon sai jongjong ho di sirpang ni dalan i, laho mangambat angka jolma na marlojong paluahon dirina sian musu, jana pasahatkon halahi tu musu taran didondoni hasusaan halahi di ari i.”

¹⁵“Tutu do na dung donok arina, Au TUHAN giot uhumanKu angka bangso. Baloskonon ma tu Edom sandok na nibaennia. Jagitonnia ma mangulahi sanga aha na nilehennia.

¹⁶Di ginjang ni dolokKu Na Badia i, madung diinum bangsongKu siinumon na manggambarkon uhumannia. Tapi umpaet dope siinumon ni angka bangso na di tano on. Nada tarpasiding halahi uhuman i. Angkon inumon ni halahi do i jana pangabisonna. Jadi gabe mago noma halahi ro di salolot-lolotna.”

¹⁷“Hape anggo di Dolok Sion, laing adong do na malua, jana gabe inganan hapunjunganKu ma dolok i. Jadi mulak ma pomparan ni si Jakob gabe tano pusako ni halahi ma i.

¹⁸Pomparan ni si Jakob ma songon api jana pomparan ni si Josep ma songon jilam ni api. Tapi pomparan ni si Esau i ma na gabe songon gandum tutungon, jana panganon ni halahi ma i sude lopus abis, jana umpe sahalak na malua sian pomparan ni si Esau, angke TUHAN do na mandok songon i!

¹⁹Inganan ni halak Juda na di Selatan ma Edom. Taluhonon ni angka halak na sian partoran na di Hasundutan ma Luat Pilistin. Inganan ni Marga Benyamin ma Gilead jana rajaan ni bangsongKu Israel ma sude Efraim dohot Samaria.

²⁰Mulak ma halak Israel na di Utara sian habuangan jana inganan ni halahi ma Punisia lalu tu Sarfat. Angka halak Jerusalem na hona buang tu Sardis, mulak noma i jana taluhononna angka kota na di bagian Selatan ni Juda.

²¹Porangan ni halahi ma rap dohot halak Jerusalem na asing i halak Edom jana taluhononna. Jadi Au TUHAN, mamarenta noma gabe raja.”