Read Batak Angkola JUNUS 2 Bible Online

JUNUS 2 - Batak Angkola bible

JUNUS 2

¹Sian bagasan butuha ni ihan i, martangiang ma si Junus tu TUHAN Debatania. Ning ia ma,

²“Ale TUHAN, pio-pio do au tu Ho di bagasan hasusaanku jana dialusi Ho do au. Sian inganan ni jolma na mate mangido partolongan au, ditangihon Ho do pangidoanku jana diparrohahon Ho.

³Tu inganan na umbagas, didanggurkon Ho do au, lopus tu tandolan ni laut bonom au. Dihuliangi husor ni aek i au disi, ombak dohot galumbang mangalingkupi.

⁴Hudok ma di bagasan rohangku: Na hona usir ni TUHAN do au sian joloNia. Indangkon na idaonku be i inganan parmiananNia na badia i.

⁵Madung dihuliangi aek au, mangancam ngolungku, dibonom aek i sude pamatangku, dililiti angka lumut ulungku di ojahan ni angka dolok.

⁶Julung do au lopus tu ojahan ni tano on, na marhorbangan jana na markunci salolot ni lolotna.[1] Hatiha i ma dipaulak Ho ngolungku sian hamatean, ale TUHAN, Debatangku.

⁷Hatiha gale au, tarsingot ma au tu TUHAN jana lalu ma tangiangku tu Ho tu BagasMu na badia i.

⁸Angka na manyomba gana-ganaan na so marguna, ditadingkon do Ho jana nada be setia.

⁹Tapi anggo au endehononku ma puji-pujian di Ho jana huhaulkon haul tu Ho. Patulusonku do sude na hujanjihon. Ho do ale TUHAN na paluahon.”

¹⁰Dung i, hara ni parenta ni TUHAN, diutahon ihan i ma si Junus tu darat.