Read Batak Angkola JUNUS 4 Bible Online

JUNUS 4 - Batak Angkola bible

JUNUS 4

¹Muruk sajo ma si Junus nada sonang rohania di haputusan ni Debata i; mur muruk ma ia.

²Jadi martangiang ma ia, “Nada he hudok hian do ale TUHAN taran so kehe sian bagasku na salpu i, na giot songon i hian do baenonMu? Hara ni i ma umbaen na huompoti kehe tu Tarsis! Huboto humani do Debata pangusayang dohot parholong Ho, na lambok jana mura sajo do manigor di Ho pauba sangkapMu manguhumi.

³Saonnari ale TUHAN, padiar ma mate au, angke gumonan noma au mate ulang pado mangolu.”

⁴Didok TUHAN ma mangalusi, “Patut ma he ho muruk?”

⁵Dung i kehe ma si Junus sabola Habincaran ni kota i, juguk ma ia disi. Dipature ia ma sada undung-undung jana marsilaung ma ia di bagasan, lalu painte-intehon sanga aha na giot masa di kota Ninive.

⁶Jadi dipatubu TUHAN Debata ma sada suan-suanan na marandor na mangalaungi si Junus gabe sonang pangkilalaannia. Laing na sonang hian do tutu roha ni si Junus tu suan-suanan i.

⁷Tapi ancogotna i taran andostorang dope, dibaen Debata ma sada ulok-ulok na manggirik urat ni suan-suanan i, gabe malos ma i.

⁸Dung bincar mataniari, diparo Debata ma alogo na milas na mangombus sian Habincaran. Giot tarkatos ma si Junus hara ni pandoit ni mataniari i songon dia na manutung ulunia. Gabe mandele ma ia jana por rohania sugari mate. Ning ia ma, “Gumonan noma da iba mate ulang pado mangolu!”

⁹Tapi didok Debata ma tusia, “Nada didalanna gabe songon i arsakmu hara ni suan-suanan i!” Didok si Junus ma mangalusi, “Biasi nada? Dalanna ma da au muruk sajo lopus mate.”

¹⁰Jadi didok Debata ma tusia, “Di bagasan saborngin sajo do tubu suan-suanan on, jana manigor mate ia ancogotna i; nada ho na patubuhon i sanga pature-turehon i. Haru songon i pe laing marsak ho hara ni na mate ia.

¹¹Patut ma da marsak Au pasari-sari Ninive, kota na godang i. Angke asing sian angka pahan-pahananna na so taretong i, adong do disi lobi 120.000 dakdanak na so marsala.”