Read Batak Angkola BILANGAN 1 Bible Online

BILANGAN 1 - Batak Angkola bible

BILANGAN 1

¹Di tanggal sada bulan dua di taon paduahon dung ditinggalkon halak Israel tano Mesir, manghatai ma TUHAN tu si Musa di bagasan Bandar Parmianan Ni TUHAN di Parhorsihan Sinai.

²Ninna ma, “Ho dohot si Harun, rap baen hamu pamilangion tu bangso Israel, mangihutkon marga, ganop ripe. Baen ma daftar, goar ni sude halaklahi

³na marumur 20 taon tu ginjang, na dung tarbaen masuk tentara.

⁴Sian ganop marga pangido ma sahalak gabe kapala ni marga i laho mangurupi hamu.”

⁵On ma goar ni angka halaklahi na gabe kapala ni ganop marga, na nipili sian bangso i, mangkarejohon karejo na nitaringotan i: [MARGA] — [KAPALA NI MARGA] Ruben — Elisur anak ni si Sedeur Simeon — Selumiel anak ni si Zurisiadai Juda — Nahason anak ni si Aminadab Isakar — Natanael anak ni si Zuar Zebulon — Eliab anak ni si Helon Efraim — Elisama anak ni si Amihud Manase — Gamaliel anak ni si Pedasur Benyamin — Abidan anak ni si Gideoni Dan — Ahieser anak ni si Amisadai Aser — Pagiel anak ni si Okran Gad — Eliasap anak ni si Rehuel Naftali — Ahira anak ni si Enan

¹⁷Marhite partolongan ni na dua bolas halak i disuru si Musa dohot si Harun ma

¹⁸anso marlagut sude jolma i di tanggal sada bulan dua, anso didaftar sude bangso i mangihutkon marga dohot ganop ripe. Goar ni sude halaklahi na marumur dua pulu taon tu ginjang disurat jana dietong,

¹⁹songon na dung diparentahon TUHAN i. Sasudena i dipatulus si Musa di Parhorsihan Sinai.

²⁰Angka halaklahi na marumur dua pulu taon tu ginjang na bisa masuk tu tentara, didaftarkon ma goarna mangihutkon marga dohot ripe mamungka sian si Ruben, panggoaran ni si Jakob. Songon on ma bahatna: [MARGA] — [BAHATNA] Ruben — 46.500 Simeon — 59.300 Gad — 45.650 Juda — 74.600 Isakar — 54.400 Zebulon — 57.400 Efraim — 40.500 Manase — 32.200 Benyamin — 35.400 Dan — 62.700 Aser — 41.500 Naftali — 53.400 Sudena: — 603.550

⁴⁷Angka halak Levi nada didaftar i rap dohot marga na asing.

⁴⁸Angke madung didok TUHAN tu si Musa,

⁴⁹“Muda dung disurati ho goar-goar ni na tarbaen masuk tentara, anggo Marga Levi nangkon pola suratkon.

⁵⁰Dokkon ma anso halahi markarejo di Bandar ParmiananKu dohot pasingkop parkokasna. Karejo ni halahi, i ma: Mamorsan Bandar ParmiananKi dohot parkokasna lalu markarejo gabe malim jana marbandar humaliangna.

⁵¹Muda bungkas hamu, halak Levi i ma mambuka Bandar ParmiananKi, dung i mamasang mangulahi di inganan parbandaran na baru. Asing sian halahi, sanga ise na donok tu Bandar Parmianan angkon mate uhuman.

⁵²Angka halak Israel na asing i, pajongjongon ni halahi ma bandar ni halahi marturpuk-turpuk, ganop halak di bagasan turpuk i rap di toru ni manderana be.

⁵³Tapi anggo halak Levi angkon donok tu Bandar ParmiananKu do bandar ni halahi. Angkon jagoon ni halahi anso ulang adong halak na donok, anso ulang gabe muruk Au gabe Huuhumi halak Israel.”

⁵⁴Jadi halak Israel pe dikarejohon halahi do sude na niparentahon ni TUHAN tu si Musa.