Read Batak Angkola BILANGAN 11 Bible Online

BILANGAN 11 - Batak Angkola bible

BILANGAN 11

¹Dung i mamungka ma sai marungut-ungut bangso i tu TUHAN hara ni angka na hurang di halahi. Dung dibege Tuhan i ungut-ungut ni halahi, gabe muruk ma TUHAN, diparo Ia ma api tu halahi. Rarat ma api i ditonga-tonga ni halahi, pola tehe puntung deba parbandaran i.

²Gogo ma sora ni halahi pio-pio mangido pangurupion sian si Musa. Dung i martangiang ma si Musa tu TUHAN, gabe mintop ma api i.

³Hara ni na masa i, gabe digoari ma inganan i Tabera, angke gara api ni TUHAN di tonga-tonga ni halahi disi.

⁴Di bagasan pardalanan ni halak Israel i, adong do halak na leban mangihutkon halahi. Malungun situtu do halahi giot mangan juhut, halak Israel pe mamungka ma marungut-ungut. Ninna halahi ma, “Ah, sugari adong ma juhut di hita.

⁵Di tano Mesir sagogoniba mangan ihan so pola manobusi. Atehe, taingot ma ancimun, harimboja, bawang prei, bawang mera dohot bawang putih na tapangan i disi.

⁶Hape madung loja hita dison, so adong be gogo, bagi aha pe so adong sipanganon di balik ni manna sian ari tu ari.”

⁷Tompa ni manna i songon batu ni hayu na menek, rupana bontar gorsing.

⁸Muda borngin madabu ma manna i rap dohot ombun i di parbandaran i. Manyogotna i marroan ma halahi marhaliang laho palagutkonsa, dung i digiling sanga diduda halahi ma i baen topung, dung i dimasak halahi ma gabe roti na hembang. Daina songon dai ni roti na nipanggang dohot miak zetun.

¹⁰Dibege si Musa ma ungut-ungut ni halahi, di na jongjong halahi marturpuk-turpuk di jolo ni pintu ni bandar ni halahi. Muruk situtu ma TUHAN, jabat hancit roha ni si Musa.

¹¹Dung i didok si Musa ma tu TUHAN i, “Biasi ma he songon i murukMu tu au TUHAN? Adong he na so jop be rohaMu mida au? Biasi dilehen Ho tanggung jawab hara ni halahi tu au?

¹²Au dehe lakna manompa sanga manubuhon halahi? Biasi dipangido Ho au songon sada halak parorot na mangompa dakdanak? Gabe angkon pature-tureonku halahi salolot di pardalanan tu tano na nijanjihonMu tu ompung ni halahi?

¹³Ligi da, torus do halahi murngis-urngis mangido juhut.

¹⁴Di dia ma dapot tuk juhut di halahi na sai bahat? Nada tolap au sandiri mamorsan tanggung jawab hara ni sude halak on, ma borattu do i di au!

¹⁵Muda laing songon i do baenonMu TUHAN tu au, ibo ma rohaMu, gonan ma au bunu anso ulang hutaon be parkancitan na niampehonMon tu au.”

¹⁶Dung i ninna TUHAN ma tu si Musa, “Palagut ma pitu pulu halak na diparsangapi jana na tarakui gabe pamimpin ni bangso on. Oban ma halahi tu Au tu Bandar ParmiananKu dung i suru ma sabola ho jongjong halahi.

¹⁷Mijur pe Au jana manghatai dohot ho di inganan i, buatonKu ma saotik Tondi na Hulehen di ho anso Hulehen di halahi. Dung i tarbaen ma halahi mangurupi ho martanggung jawab hara ni bangso i, gabe nada hum ho sandiri be mamorsan i.

¹⁸Pabolkas ma saonnari tu bangso i, ‘Paias hamu ma dirimunu ancogot, anso mangan juhut hamu. Madung dibege TUHAN partangisan dohot ungut-ungutmunu, na malungun hamu mangan juhut, jana na dumenggan dihilala hamu ngolumunu tingki di Mesir. Saonnari lehenon ni TUHAN ma juhut di hamu, jana angkon panganonmunu i.

¹⁹Panganonmunu ma juhut i nada hum sada sanga dua ari sanga lima sanga sampulu sanga pe dua pulu ari.

²⁰Tapi sabulan honokna mangan juhut hamu, lopus gabe marnyae jana muta-uta hamu patundana. Masa pe songon i hara ni na ditulak hamu do TUHAN na adong ditonga-tongamunu. Dohot hara ni ungut-ungutmunu tuSia, bahaso na dumenggan hian ulang ditinggalkon hamu Mesir.’ ”

²¹Didok si Musa ma, “Bangso na adong rap dohot au bahatna 600.000 halak, tapi didok Ho lehenonMu juhut panganon ni halahi sabulan honokna!

²²Di dia ma he tuk lombu dohot biri-biri sambolon laho panganon ni halahi? Tuk ma he sude ihan na di laut i panganon ni halahi?”

²³Dialusi TUHAN ma, “Marbatas dehe kuasongKu? Idaonmu ma tibu, sanga tulus do na Hudok i sanga nada!”

²⁴Dung i haruar ma si Musa pabolkaskon tu bangso i na nidok ni TUHAN i. Disuru si Musa ma pamimpin na pitu pulu halak i jongjong humaliang Bandar Parmianan Ni TUHAN.

²⁵Mijur ma TUHAN sian ombun i laho mangkatai dohot si Musa. Dibuat Tuhan i ma saotik sian Tondi na dung dilehen TUHAN i tu si Musa, lalu dilehen Ia tu pamimpin na pitupulu halak i. Dung mijur tondi i tu ginjang ni halahi, mamungka ma halahi mangkatai songon panurirang, tapi nada pola sadia honok.

²⁶Dua sian pamimpin na pitu pulu halak i si Eldad dohot si Medad, di parbandaran i do halahi tinggal, nada kehe halahi rap dohot na asing i tu Bandar Parmianan Ni TUHAN. Di parbandaran i ma mijur Tondi i tu halahi, halahi na dua pe mamungka ma sai pio-pio songon panurirang.

²⁷Adong ma sada doli-doli marlojong tu ruar paboahon tu si Musa sude na nibaen ni si Eldad dohot si Medad.

²⁸Dung i ro ma si Josua anak ni si Nun na dung gabe pangurupi di si Musa sian haposoonna dope mandok tu si Musa, “Suru ma, anso mantak halahi.”

²⁹Dialusi si Musa, “Biasi dukungonmu au? Giot pangidoonku dope tu TUHAN i anso dilehen Ia TondiNia tu sude bangsoNia, jana anso sude halahi mangkatai songon panurirang!”

³⁰Dung i mulak ma si Musa dohot pamimpin ni Israel na pitu pulu halak i tu parbandaran.

³¹Dung i manigor ma dibaen TUHAN mangombus haba-haba sian laut, dioban haba-haba i ma angka unggas leto habang toruk sajo. Di sude parbandaran i lalu dope sanga na piga kilometer daona humaliang songgop unggas i. Bahat situtu unggas i marturpuk-turpuk pola sameter gincatna.

³²Jadi ganop ari ganop borngin marudut-udut, ro ma halahi manangkupi leto i. Ganop halak na manangkup i dapot halahi do naotikna saribu kilogram. Diparerak halahi ma unggas na dapot i laho manjomur lopus hiang humaliang parbandaran i,

³³hatiha laing bahat dope juhut panganon ni halahi. Gabe muruk ma TUHAN tu halahi, lalu diparo Ia ma bala tu halahi.

³⁴Digoari ma inganan i “Kuburan ni Halahapon”, angke disi ma dikuburkon halahi angka halak na mate hara ni lahapna.

³⁵Sian i pinda ma halahi tu huta Haserot lalu marbandar disi.