Read Batak Angkola BILANGAN 14 Bible Online

BILANGAN 14 - Batak Angkola bible

BILANGAN 14

¹Sasaborngin tumatangis halak Israel hara ni na mabiar.

²Marungut-ungut ma halahi tu si Musa dohot tu si Harun. Ninna halahi ma, “Dumenggan ma mate hian hita di Mesir sanga pe di parhorsihan on.

³Biasi pola obanon ni TUHAN i hita tu tano Kanaan? Mate ma hita di parporangan dohot angka dongan sabagasta be bope angka dakdanakta tabanonna. Nada he dumenggan hita mulak tu Mesir?”

⁴Gabe marsipandohonan ma halahi sama halahi. “Tapili ma sahalak na mamimpin hita mulak tu Mesir.”

⁵Gabe dipaunduk si Musa dohot si Harun ma di jolo ni halak na bahat i.

⁶Dung i si Josua anak ni si Nun dohot si Kaleb anak ni si Jefunne, dua halak sian angka mata-mata i, manyuakkon pakean ni halahi hara ni marsakna.

⁷Didok halahi ma tu sude jolma i, “Na denggan sun do luat na hami pareso i.

⁸Muda ra TUHAN i, obanonNia ma hita tusi laho mangalehen tano na mora jana na napu i di hita.

⁹Ulang alo hamu TUHAN i, jana ulang mabiar hamu mida halak na maringanan disi. Momo do aloonta halahi, nada he TUHAN i do donganta, jana taluhononNia do angka debata na manjago halahi. Hara ni i ulang ma mabiar.”

¹⁰Sude halahi mangancam giot mandangguri halahi na opat dohot batu lopus mate. Hape tompu ma diida angka jolma i sinondang na silo situtu sian Inganan Ni TUHAN, ruar sian ginjang ni Bandar ParmiananNa i.

¹¹Didok TUHAN ma tu si Musa, “Sadia honok nari aloon ni bangso on Au? Sadia honok nari tangkang halahi nada ra porsaya di Au, haru pe na dung bahat Hubaen hahomangan di tonga-tonga ni halahi?

¹²PukulonKu ma halahi marhite na parohon nyae na mangalangkoti. Jana baenonKu ma ho gabe ama ni sude bangso na gumodang jana na gumogo sian halahi!”

¹³Tapi didok si Musa ma tu TUHAN i, “O Ale Tuhan, madung diboto halak Mesir, hara ni hagogoonMu do maroban hami haruar sian Mesir.

¹⁴Jana nadung dibaritahon halahi do angka pangalaho i tu halak na maringanan di luat on. Jadi madung diboto halahi, na rap do Ho dohot hami. Jana madung dibege halahi, bahaso tarida do Ho tangkas muda maradian ombunMu di ginjangnami, dijoloi Ho do hami mardongan tiang ombun muda arian, jana marhite tiang api muda borngin.

¹⁵Muda bunuonMu sude halak on, sude angka bangso na dung umbege hasurunganMi mandok,

¹⁶madung dibunu Ho bangsoMu di halongonan, dibaen nada tolap Ho be maroban halahi tu luat na dung nijanjihonMi.

¹⁷Hara ni i ale TUHAN, pangidoanku, patidahon ma kuasoMu tu hami, jana patulus ma sude na nijanjihonMi. Angke madung didok Ho,

¹⁸‘Au do TUHAN, nada momo Au muruk. PatidahononKu do holong ni rohangKu dohot habonaranKu martamba-tamba. SesaonKu do dosa ni halak na mangalo Au. Haru pe songon i balosonKu do hasalaan ni simatobangna tu anak dohot pahompuna, lopus tu sundut patoluhon dohot paopatkon.’

¹⁹Saonnari ale TUHAN hara ni holong ni rohaMu jana angkon patulusonMu do janjiMu, pangidoanku sesa ma dosa ni halahi songon na dung niampunanMu halahi, mamungka sian dung ditinggalkon halahi tano Mesir.”

²⁰Gabe dialusi TUHAN i ma, “Denggan! Huampuni pe halahi songon na nipangidomi.

²¹Tapi marjanji do Au hara ni hadirionKu dohot haadongonKu manggohi portibi on,

²²bahaso sian sude halak on, umpe adong na torus mangolu laho masuk tu tano na Hujanjihon tu ompu ni halahi. Angke nada ra halahi mangoloi Au, tongtong do diuji halahi Au. Haru pe na dung diida halahi sinondang ni ingananKu na mambaen siloan halahi, jana madung diida halahi muse angka hahomangan na Hubaen di Mesir dohot di parhorsihan.

²³On pe, nada tola masuk halahi tu luat i. Sian tonga-tonga ni halahi na so mangoloi Au, umpe sahalak tarbaen mandegehon patna tu tano i.

²⁴Tapi anggo tu naposongKu si Kaleb, nada songon i. Tongtong do dioloi ia Au. Hara ni i ma angkon obanonKu ia tu tano na dung nibolusnia i. Jana tano na hornop inganan ni halak Amalek dohot halak Kanaan saonnari gabe bagian ni pomparan ni si Kaleb naposongKi. Antong ancogot mulak ma ho Musa, kehe tu parhorsihan adop Solok Akaba.”

²⁶Didok TUHAN ma tu si Musa dohot tu si Harun,

²⁷“Sadia honok nari halak na jahat on, sai marungut-ungut jana mangalo Au? Madung ingoran Au pabege-bege angguk-angguk ni halahi.

²⁸Dohononmu ma mangalusi halahi songon on: didok TUHAN i, ‘Marsumpa ma Au hara ni hadirionKu, angkon baenonKu tu hamu mangihutkon pangidoanmunu sandiri. Au do TUHAN mandok.

²⁹Angkon mate hamu, jana bangkemunu marserak di parhorsihan i. Madung sai marungut-ungut hamu mangalo Au. Hara ni i ma, asing sian si Kaleb dohot si Josua, umpe sahalak sian hamu na marumur di ginjang ni dua pulu taon tarbaen masuk tu luat na dung Hujanjihon tu hamu.

³¹Didok hamu, tabanonna ma angka anaknami! Hape na giot obanonKu do halahi tu luat na so giotmunu i, jadi baenonKu ma i gabe tano hagodangan ni halahi.

³²Mate di parhorsihan i do anggo hamu.

³³Manjalahi panganon di halongonan ma anakmunu opat pulu taon honokna. Hara ni na so mangoloi hamu, gabe anakmunu manaon, lopus mate sude jolma na parpudi sian hamu.

³⁴Angkon taononmu ma panginona ni dosamunu opat pulu taon lolotna, sataon gonti ni sadari sian na opat pulu ari hamu mangaliati tano i. Botoonmunu sanga na bia daina, muda Au mangalo hamu!

³⁵Husumpahon ma, bahaso patulusonKu songon i tu hamu, angka halak na jahat na satahi mangalo Au. Di parhorsihan on ma angkon mate hamu sude. Au do TUHAN na mandokkon i tu hamu!’ ”

³⁶Angka halak na nisuru ni si Musa pareso tano i, na mangalehen hatorangan na so tutu, na mambaen halak Israel marungut-ungut mangalo TUHAN, diuhum TUHAN ma halahi marhite nyae, na mambaen marmatean halahi.

³⁸Sian mata-mata na dua bolas halak i, hum si Josua dohot si Kaleb do na laing mangolu.

³⁹Di hatiha na nipabolkas ni si Musa sude na nidok ni TUHAN i tu halak Israel, gabe marsak situtu ma halahi.

⁴⁰Ancogotna i sogot manyogot i markobas ma halahi giot kehe marporang laho mangarampas angka luat na martor di luat i. Ninna halahi, “Tutu do na dung mardosa hami. Tapi saonnari rampasonnami ma luat i na dung didok TUHAN i hian tu hami.”

⁴¹Tapi didok si Musa ma, “Biasi langgaronmunu dope saonnari parenta ni TUHAN? Nada adong guna ni karejomunu i!

⁴²Ulang hamu kehe. Taluhonon ni musumunu do hamu angke nada didongani TUHAN hamu.

⁴³Dung paadop-adop hamu annon dohot halak Amalek dohot halak Kanaan i, angkon mate do hamu di parporangan i. Nada ra TUHAN i mandongani hamu hara ni na so ra hamu mangoloi Ia.”

⁴⁴Tapi laing puluk do halak Israel i kehe tu tor i haru pe nada ditinggalkon si Musa bope Poti Parjanjian i parbandaran i.

⁴⁵Jadi ro ma halak Amalek dohot halak Kanaan na maringanan disi mangalo halahi pataluhon halak Israel jana diayak halahi lalu tu Horma.