Read Batak Angkola BILANGAN 15 Bible Online

BILANGAN 15 - Batak Angkola bible

BILANGAN 15

¹Dilehen TUHAN dope tu si Musa

²angka paraturan na angkon baenon ni bangso Israel di tano na giot lehenon ni TUHAN i tu halahi.

³Tu haul situtungon sanga haul manggarar niet, sanga haul sian jop ni roha sanga pe angka haul di ari pesta ni ugamo na somal, tola do dihaulkon halahi tu TUHAN angka on: sada lombu jantan, sada biri-biri jantan, sada biri-biri sanga sada hambeng. Uap ni haul sipanganon i pajopkon roha ni TUHAN.

⁴Sanga ise na manghaulkon biri-biri sanga hambeng gabe haul situtungon di TUHAN, angkon obanonna muse ganop rap dohot pahan-pahanan i sakilogram topung na dicampur dohot saliter miak zetun gabe haul gandum, dung i muse saliter anggur.

⁶Muda biri-biri jantan do na dihaulkon, angkon lehenonnia muse dua kilogram topung dicampur dohot sada satonga liter miak zetun gabe haul gandum,

⁷rap dohot sada satonga liter aek ni anggur. Uap ni haul i pajop roha ni TUHAN.

⁸Muda lombu jantan do na nihaulkon i gabe haul situtungon sanga haul manggarar niet sanga haul haluaan pe,

⁹angkon pasahaton muse tolu kilogram topung dicampur dohot dua kilogram miak zetun gabe haul gandum,

¹⁰rap dohot dua liter aek ni anggur. Uap ni angka haul i pajopkon roha ni TUHAN.

¹¹I ma na angkon haulkonon rap dohot ganop sada lombu jantan, biri-biri jantan, biri-biri sanga hambeng.

¹²Muda lobi sian sada pahan-pahanan na nihaulkon i, topung silehenon, miak dohot anggur i pe angkon tambaan mangihutkon parbandinganna.

¹³Angkon baenon ni halak Israel ma songon i hatiha mangkaulkon haul sipanganon halahi. Uap ni haul i pajopkon roha ni TUHAN.

¹⁴Sada halak na leban na rap dohot hamu, bope na santongkin sanga manongtong, angkon oloanna sude paraturan i muda manghaulkon haul sipanganon, na mambaen uapna i pajopkon roha ni TUHAN.

¹⁵Sude tona dohot aturan dos do di hamu dohot di halak sileban na maringanan rap dohot hamu, angke dos do hamu dohot halahi diida TUHAN. Jana salolot-lolotna do dalankonon na songon i.

¹⁷Didok TUHAN muse ma tu si Musa

¹⁸angka aturan songon on anso dikarejohon halak Israel dung lalu halahi tu luat na giot lehenon ni TUHAN i di halahi.

¹⁹Muda dipangan hamu sanga aha na tubu di luat i, angkon paasingonmunu sabagian gabe silehen-lehen hapunjungan di TUHAN.

²⁰Muda ditutung hamu roti sian gandum na parjolo disabi, roti na parjolo angkon haulkononmunu gabe haul hapunjungan tu TUHAN. Pangalaho ni na giot manghaulkon i dos dohot pangalaho di na manghaulkon gandum parjolo na nigilingmunu.

²¹Ro di salolotna, roti na parjolo i angkon lehenonmunu gabe silehen-lehen na mardohonan tu TUHAN.

²²Betak adong muse halak dohot na so disangajonia lupa patulus deba sian angka paraturan na nilehen ni TUHAN i tu si Musa.

²³Dung i muse betak adong di pudi ni ari halak na lupa patuluskon na niparentahon ni TUHAN markite-hite si Musa.

²⁴Muda marsala jolma i, hara ni na so diboto ia paraturan i angkon haulkonon ni halahi sada lombu jantan gabe haul situtungon. Angkon haulkonon ni halahi muse rap dohot i haul gandum dohot aek ni anggur na dung ditontuhon. Uap ni haul i pajop roha ni TUHAN. Tamba ni i angkon haulkonon ni halahi sada biri-biri jantan gabe haul hasesaan ni dosa.

²⁵Dung i angkon karejohonon ni malim i ma upacara taringot tu hasesaan ni dosa ni na bahat i. Dung i ampunan ni Debata ma halahi hara ni hasalaan na so niuntil i jana na dung dioban halahi haul hasesaan ni dosa gabe haul sipanganon tu TUHAN i.

²⁶Sude halak Israel dohot halak na leban na tinggal rap dohot halahi madung diampuni, dibaen sude do halahi parsidohot di hasalaan i.

²⁷Muda mardosa sahalak marhite na so disangajo, angkon haulkononnia sada hambeng boru-boru na marumur sataon gabe haul hasesaan ni dosana.

²⁸Baenon ni malim i ma upacara taringot tu hasesaan ni dosa di langgatan, laho pabotohon na dung malua halak na i sian dosana, gabe ampunan ni TUHAN ma halakna i.

²⁹Dos do aturan i mangonai sanga tu ise pe na mardosa so hara ni na niuntil ia, bope halak Israel ia bope halak na leban na maringanan disi.

³⁰Tapi muda adong sada halak Israel sanga halak na leban na disangajo ia mambaen dosa, na mangincahi TUHAN do i. Angkon mate do halahi uhumon,

³¹dibaen disangajo ia mangalo TUHAN jana disangajo ia mangalaosi parenta ni TUHAN. Hara ni salania sandiri do umbahen mate ia.

³²Di sada hatiha, dompak di parhorsihan i dope halak Israel, tardapot ma sada bayo na topet papungu soban, di Ari Sabat.

³³Dioban ma bayo i tu jolo ni si Musa, si Harun dohot tu jolo ni na bahat i,

³⁴ditahan ma ia jolo painte so binoto sanga na bia ia baenon.

³⁵Didok TUHAN ma tu si Musa, “Angkon mate uhumon do bayo i, nioban ma ia tu balian ni parbandaran i.”

³⁶Sude halak na bahat i angkon mandangguri ia dohot batu lopus mate di balian ni parbandaran i. Dioban si Musa dohot halak na bahat i ma bayo i tu balian ni parbandaran i jana didangguri halahi disi dohot batu lopus mate, songon na dung diparentahon TUHAN i.

³⁷Disuru TUHAN ma si Musa

³⁸pabolkaskon parenta on tu halak Israel, “Baen ma rambu-rambu di ujung ni pakeanmunu jana holtingkon tali na rata langit tu ganop rambu. Angkon baenonmunu songon i tongtong lalu tu ari parpudi.

³⁹Hasaya ni rambu-rambu i gabe parningotan ma i. Ganop diida hamu i ingotonmunu ma sude parentangKu jana angkon patulusonmunu. Jadi hara ni i nada hudukkononmunu be Au giot patuluskon lungun ni rohamunu dohot hagiotmunu sandiri.

⁴⁰Rambu-rambu i ma na gabe paingot hamu laho mangihutkon sude parentangKu, anso gabe Au nampuna hamu sude.

⁴¹Au do TUHAN Debatamunu; Au do maroban hamu ruar sian Mesir, anso gabe Au Debatamunu, Au do TUHAN.”