Read Batak Angkola BILANGAN 23 Bible Online

BILANGAN 23 - Batak Angkola bible

BILANGAN 23

¹Didok si Bileam ma tu si Balak, “Pajongjong ma di inganan on pitu langgatan di au jana oban ma tuson pitu lombu jantan dohot pitu biri-biri jantan.”

²Dipatulus si Balak ma sude na nidok ni si Bileam tusia. Jadi rap ma ia dohot si Bileam manghaulkon sada lombu jantan dohot sada biri-biri jantan di ganop sada be langgatan i.

³Dung i didok si Bileam ma tu si Balak, “Jongjong ma ho dison, donok tu haul situtungonmi. Hatiha songon i kehe ma au mangaligi, betak na ra do TUHAN i marsuo dohot au sanga nada. Hupaboa pe di ho sude sanga aha didok TUHAN i tu au.” Dung i kehe ma si Bileam sada ia tu puncut ni sada tor

⁴disi ma ro TUHAN i tusia. Ninna si Bileam ma tu Tuhan i, “Tuhan! Madung hupajongjong pitu langgatan, jana huhaulkon do sada lombu jantan dohot sada biri-biri jantan di ganop langgatan i.”

⁵Dung i dipaboa TUHAN i ma tu si Bileam sanga aha na angkon dohononnia, lalu disuruSa anso mulak ia tu si Balak pabolkaskon tona ni Tuhan i tusia.

⁶Dung i mulak ma si Bileam jana didapotkon ia ma si Balak na laing jongjong donok tu haul situtungonnia i, rap dohot sude pamimpin ni halak Moab.

⁷Dung i didok si Bileam ma panurirangonna i songon on, “Sian Aram, sian dolok-dolok di Habincaran an, si Balak, raja ni Moab marpio au mandok, ‘Ro ma ho burai ma si Jakob, jana ro ma ho burai ma Israel!’

⁸Patut ma he au mamurai, anggo so diburai TUHAN? Patut ma he au manguhumi i, anggo so diuhum TUHAN?

⁹Sian angka dolok na gincat, tarida ma bangso i. Sian puncut ni angka tor, huida halahi. Diboto halahi do na nipasupasu halahi so adong bangso na asing mangalobi i.

¹⁰Pomparan ni Israel songon abuan, nada taretong, songon i bahatna. O Tuhan, sugari hupaujung ngolungku songon sada halak sian halakMu. Tunduk tu Debata di sude pangalaho; di bagasan hasonangan au mate.”

¹¹Jadi didok si Balak ma tu si Bileam, “Aha do na nibaenmi tu au? Huoban pe ho tuson laho mamurai angka musungku do. Hape gabe mur dipasupasu ho do halahi.”

¹²Dialusi si Bileam ma, “Sanga aha na nisuru ni TUHAN dokkononku, hum i do na tardokkon au.”

¹³Dung i didok si Balak ma tu si Bileam, “Beta ma rap kehe hita tu inganan na asing, anggo sian i hum saotik do tarida ho halak Israel, disi ma burai halahi.”

¹⁴Jadi dioban si Balak ma si Bileam tu Zopim, di puncut ni Dolok Pisga. Disi pe dipajongjong ia muse pitu langgatan jana dihaulkon ia sada lombu jantan, sada biri-biri jantan di ganop langgatan i.

¹⁵Didok si Bileam ma tu si Balak, “Dison ma ho tinggal, donok tu haul situtungonmi, anso kehe au marsuo dohot TUHAN di adu.”

¹⁶Didapotkon TUHAN ma si Bileam, jana dipaboa Tuhan ma sanga aha na giot dohononnia, lalu disuru ia mulak tu si Balak paboahon tona ni Tuhan i.

¹⁷Dung i mulak ma si Bileam mandapotkon si Balak na laing jongjong donok tu haul situtungonnia i, rap dohot angka pamimpin ni Moab. Disapai si Balak ma sanga aha didok TUHAN i,

¹⁸dung i didok si Bileam ma panurirangonna, “O Balak, anak ni si Zipor, ro ma. Adong na giot dohononku, tangihon ma!

¹⁹Nada dos Debata dohot jolma na ringgas margabus, na momo muba pikiranna. Muda dung Dijanjihon Debata, sudena pasti Dipatulussa! Muda Ia mangkuling, sude angkon tarjadi!

²⁰Disuru do au mamasumasusa, jana muda dipasupasu Debata nada tartarik au mulak.

²¹Huida ari pangapudian ni Israel na marbungaran; nada hona bala dohot mara TUHAN, i do Debatana. Tudia pe tongtong do dohot Ia. Didok halahi: Ibana do Raja!

²²Sian Mesir dioban Debata halahi haruar, marporang halahi songon lombu riar.

²³Gogo ni ajimat sanga elmu sihir, nada hasaya mangalo halak Israel. Bangso i ma na gabe hobaron ni bibir, hahomangan do pambaen ni Debata ni Israel!

²⁴Suman do halak Israel tu singa na gogo; manyosop mudar ni musuna na disoro, salolot so songon i nada ra ia marongok.”

²⁵Dung i mangkuling ma si Balak tu si Bileam, “Tuk ma i, muda so ra ho mamurai halak Israel, pinomat ma ulang pasupasu halahi.”

²⁶Alus ni si Bileam, “Nada he na dung hudok di ho, bahaso na angkon hukarejohon sude parenta ni TUHAN i tu au?”

²⁷Didok si Balak ma, “Beta ma tu inganan na asing. Binoto i, betak na paloason ni Debata do buraanmu halak Israel, hara ni au di inganan on.”

²⁸Dung i dioban ia ma si Bileam tu puncut ni Dolok Peor na adop parhorsihan i.

²⁹Ninna si Bileam ma tu si Balak, “Pajongjong ma pitu langgatan dison, dung i oban ma tuson pitu lombu jantan dohot pitu biri-biri jantan.”

³⁰Dipatulus si Balak ma sude na nidok ni si Bileam i. Dihaulkon ia ma sada lombu jantan dohot sada biri-biri jantan di ganop langgatan i.