Read Batak Angkola BILANGAN 24 Bible Online

BILANGAN 24 - Batak Angkola bible

BILANGAN 24

¹Saonnari tangkas ma di si Bileam hagiot ni DEBATA, i ma mamasumasu Israel. Hara ni i nada dilului Ia be angka tanda songon na binaennia andorang so i dope. Ditatap si Bileam tu halongonan

²diida ia ma halak Israel marbandar marturpuk-turpuk mangihutkon marga ni bangso i.

³Dung i digohi hagogoan ni Tondi Ni Debata ma si Bileam, gabe didok ia ma panyurirangion songon on, “On ma tona ni si Bileam anak ni si Beor, sada halak na marnida giot mangkobari.

⁴Dilehen disia hamaloon manangihonsa, angka hata na marharoroan sian Debata. Di bagasan parnidaan huida dohot mata tarbuka sada hataridaan sian Debata na gok kuaso sasadaSa.

⁵Tung na jogi ma bandarmu ale Jakob dohot ingananmu ale Israel.

⁶Tarsongon barisan ni bona ni harambir. Suman tu kobun di topi ni aek godang. Songon hayu gaharu na nisuan ni TUHAN, tudos tu hayu ares na donok tu paridian.

⁷Manyimbur same tubu di ladang, ditombur udan, aekna nada hurang. Rajana na sangap, nada adong tudosanna, lopus tu na dao do na dirajaisa.

⁸Sian Mesir dioban Debata halahi ruar, marporang halahi songon lombu na riar. Musu ni halahi sude dibondut, holi-holina pe diropuk, sior ni halahi pe digepu-gepu.

⁹Anggo bangso Israel i na gogo do tarsongon singa, ise muse ma he na puluk mangganggusa andigan disia hatiha maradian? Sanga ise mamasumasu halak Israel, ia pe dipasupasu barang ise na mamurai Israel, ia pe hona bura.”

¹⁰Mardongan muruk dipahibul si Balak ma tenjunia lalu ning ia tu si Bileam, “Hupio pe ho laho mamurai musungku do, hape gabe dipasupasu ho do halahi pola tolu noli.

¹¹Saonnari mulak ma ho. Madung hujanjihon mangalehen upamu, tapi nada diisinkon TUHAN jagitonmu upa i.”

¹²Dialusi si Bileam, “Nada he na dung hudok hian tu na nisurumi tu au,

¹³haru pe dilehen ho di au sude perak dohot sere na adong di bagas godangmi, nada langgaronku parenta ni TUHAN jana mambaen roha-rohangku sajo. Hum na nisuru ni TUHAN do dohononku, hum i do na ra au mandokkon.”

¹⁴Didok si Bileam ma tu si Balak, “Mulak ma au saonnari tu bangsongku. Tapi taran so kehe au, giot dohononku siingotonmu sanga aha na giot baenon ni halak Israel tu bangsomu di pudian ni ari.”

¹⁵Dung i didok si Bileam ma panyurirangionnia, “On ma tona ni si Bileam, anak ni si Beor; sahalak na marparnidaan giot mangkobari.

¹⁶Ise na dilehen hamaloon manangihonsa angka hata na ro sian Debata? Ise tarbaen manjagit parbinotoan sian na guminjang, sian Tuhan? Huida di bagasan parnidaan, dohot mata na ungkap sada parnidaan sian Debata Na Sun Markuaso.

¹⁷Madung huida na giot masa muse di Israel. Sada raja na marasal sian Israel. Giot ro songon parbincar ni bintang, sada bintang na marlalai, na marsinondang. Pamimpin ni Moab giot libasonnia angka bangso Set giot taluhononnia.

¹⁸Tano Edom gabe nampuna ni musuna, tapi halak Israel laing tontong do mangkarejohon karejo na marsahala.

¹⁹Musu ni Israel sude ditaluhon nada adong na tinggal umpe sada.”

²⁰Dung i hatiha marbuka parnidaan ni si Bileam diida ia ma halak Amalek, dung i didok ia ma ulpuhannia songon on, “Sian sude bangso di tano on, Amalek do na gumodang hakuasoon. Tapi bangso on pe di ujungna, angkon mago muse sapanjangna.”

²¹Di bagasan parnidaan i diida si Bileam muse ma pomparan ni halak Keni, lalu didok ia ma ulpuhannia songon on, “Tutu nian tung na gogo do ingananmunu, songon asar di ginjang dolok batu na gincat.

²²Tapi hamu halak Keni angkon disegohon. Hatiha ro halak Asur maroban hamu songon tahanan.”

²³Dung i didok si Bileam muse dope ulpuhanna, “Ise do bangso na marlagut di Utara?

²⁴Sian Siprus giot ro ma tentara, Asur dohot Eber ditaluhonsa, tapi halahi pe nada tolapsa martahan.”

²⁵Ujungna marhobas ma si Bileam giot mulak tu bagasna, si Balak pe mulak muse ma.