Read Batak Angkola BILANGAN 25 Bible Online

BILANGAN 25 - Batak Angkola bible

BILANGAN 25

¹Dompak marbandar halak Israel di Rura Sittim, mamungka ma adong na marcampur sian angka halaklahi dohot angka boru Moab na adong disi.

²Dioban angka dadaboru i ma halahi tu angka pesta, marhaul laho pasangapkon Debata Moab. Dipangan halak Israel ma panganon i jana dohot halahi manyomba Baal, debata

³di Dolok Peor. Jadi gabe muruk ma TUHAN tu halahi

⁴didok ma tu si Musa, “Palagut ma sude pamimpin ni Israel, dung i bunu ma halahi di jolo ni halak na bahat i gabe hatutulus ni parentangKu, anso mintop murukKu tu bangso on.”

⁵Dung i didok si Musa ma tu sude pamimpin ni Israel, “Ganop hamu angkon mamunu angka jolma sian margamunu na dung manyomba Baal-Peor.”

⁶Dompak tumatangis si Musa dohot na bahat i di pintu ni Bandar Parmianan Ni TUHAN, diida halahi ma sahalak Israel maroban sada boru Midian masuk tu bandarna.

⁷Hatiha diida si Pinehas anak ni si Eleasar pahompu ni si Harun na masa i, kehe ma ia, ditinggalkon ia parpunguan i. Dung i dibuat ia sada hujur,

⁸kehe ia paihut-ihut halaklahi dohot dadaboru i masuk tu bandar. Dung i dijujarkon ia ma hujur i tu halahi na dua rap hona halahi na dua. Dung songon i mantak ma bala na jorbut i di Israel.

⁹Tapi hatiha i mate do 24.000 halak.

¹⁰Dung i didok TUHAN ma tu si Musa,

¹¹“Nada tahan si Pinehas mida halak Israel manyomba debata na asing, dibalik ni Au. Hara ni i nada muruk be Au tu halak Israel, antahonKu ma mamusa halahi.

¹²Jadi paboa ma tu si Pinehas, giot baenonKu parjanjian dohot ia ro di salolot-lolotna.

¹³Ia dohot pomparannia ditotopkon ma gabe malim sapanjangna, hara ni na so tartahan ia mida halak na manyomba debata sileban dibalik ni Au. Hara ni i sesaonKu ma dosa ni Israel.”

¹⁴Goar ni halak Israel na dibunu rap dohot boru Midian i, i ma si Zimri, anak ni si Salu pamimpin ni sada ompu sian Marga Simeon.

¹⁵Goar ni daboru i, i ma si Kosbi boru ni si Zur, i ma pamimpin sian sada bagian marga di Midian.

¹⁶Dilehen TUHAN ma parenta on tu si Musa,

¹⁷“Porangi ma halak Midian, pusa ma halahi

¹⁸hara ni hajahatan na nibaen ni halahi paoto-oto hamu di Peor, jana hara ni si Kosbi na dung dibunu i hatiha masa bala na di Peor i.”