Read Batak Angkola BILANGAN 28 Bible Online

BILANGAN 28 - Batak Angkola bible

BILANGAN 28

¹Didok TUHAN ma tu si Musa.

²“Parentahon ma tu bangso Israel, anso tongtong diingot halahi manghaulkon haul sipanganon na pajob roha ni Tuhan, hombar tu hatiha na dung ditontuhon.”

³“Angka on ma haul sipanganon na angkon sihaulkononmunu tu TUHAN. Na gabe haul ganop ari, dua anak ni biri-biri jantan na marumur sataon na so martihas.

⁴Anak ni biri-biri na parjolo angkon dihaulkon manyogot jana na paduahon di potang ari.

⁵Ganop rap dohot anak ni biri-biri i angkon dilehen muse sakilogram topung dicampur dohot saliter miak zetun na dumenggan.

⁶On ma haul siganop ari na angkon sidung tutungon. Di Dolok Sinai do na parjolo situtu dihaulkon haul gabe haul sipanganon. Uap ni haul i pajopkon roha ni TUHAN.

⁷Rap dohot anak ni biri-biri na parjolo, angkon dilehen haul anggur saliter bahatna. Disiramkon ma aek ni anggur i tu ginjang langgatan.

⁸Potang ari haulkonon ma biri-biri na paduahon dos dohot haul manyogot i, rap dohot haul anggur. On pe gabe haul sipanganon do. Uap ni haul i pajopkon roha ni TUHAN.”

⁹“Di Ari Sabat angkon haulkononkon dua anak ni biri-biri marumur sataon na so martihas, dua kilogram topung na nicampur dohot miak zetun na gabe haul gandum dohot haul aek ni anggur.

¹⁰Haul situtungon i angkon dihaulkon ganop Ari Sabat songon tamba ni haul siganop ari rap dohot haul aek ni anggur.”

¹¹“Ganop bona ni bulan angkon haulkonon tu TUHAN haul situtungon, i ma: dua lombu jantan na poso, sada biri-biri jantan, pitu anak ni biri-biri jantan na marumur sataon, sudena i na so martihas.

¹²Na gabe haul gandum angkon dilehen topung na dicampur dohot miak zetun; ganop sada lombu jantan tolu kilogram topung, dua kilogram topung tu biri-biri jantan,

¹³jana sakilogram topung tu ganop sada anak ni biri-biri jantan. Haul situtungon on gabe haul sipanganon, jana uapna i pajopkon roha ni TUHAN.

¹⁴Di haul aek ni anggur angkon lehenon rap dohot haul situtungon i, na hasaya tusi: dua liter aek ni anggur ganop tu lombu jantan, sada satonga liter tu biri-biri jantan jana saliter tu ganop anak ni biri-biri. I ma aturan taringot tu haul situtungon na angkon lehenon di tanggal sada ganop bulan jana angkon baenon ganop taon.

¹⁵Songon tamba ni haul situtungon siganop ari dohot haul aek ni anggur, angkon laing lehenonmunu dope sada hambeng jantan gabe haul hasesaan ni dosa.”

¹⁶“Di tanggal opat bolas bulan sada, angkon pestahononmunu do Pesta Paskah pasangapkon TUHAN.

¹⁷Di tanggal lima bolas mamungka ma ari pesta ugamo pitu ari honokna. Sahonok ni na pitu ari i, hum roti na so marragi do tola panganonmunu.

¹⁸Di ari parjolo Ari Pesta i angkon marpungu ma hamu maribadat, jana nada tola karejohononmunu barang aha pe.

¹⁹Lehen hamu ma haul situtungon na gabe haul sipanganon di TUHAN i, i ma: dua lombu jantan, sada biri-biri jantan dohot pitu anak ni biri-biri jantan na marumur sataon, sudena i na so martihas.

²⁰Angkon haulkononmunu haul gandum, i ma: topung na marcampur dohot miak zetun: tolu kilogram topung tu ganop sada lombu jantan, dua kilogram tu ganop biri-biri jantan,

²¹jana sakilogram tu ganop anak ni biri-biri jantan.

²²Lehen hamu muse ma sada hambeng jantan gabe haul hasesaan ni dosa. Marhite pangalaho na songon i ma hamu patuluskon karejo hasesaan ni dosa ni na bahat i.

²³Sude haul on na gabe tamba-tamba tu haul situtungon manyogot na somal.

²⁴Dos dohot i pangalahona angkon lehenonmunu tu TUHAN haul sipanganon pitu ari honokna. Tamba ni haul na somal di haul situtungon siganop ari do on rap dohot haul anggur. Uap ni haul i pajopkon roha ni TUHAN.

²⁵Di ari papituhon marpungu ma hamu, jana nada tola mangkarejohon barang aha pe di ari i.”

²⁶“Di ari parjolo di Pesta Gotilon di hatiha mangalehen sabagian sian gandum na nisabi parjolo tu TUHAN, angkon marpungu do hamu maribadat, jana nada tola mangkarejohon barang aha pe.

²⁷Lehen hamu ma haul situtungon, uapna i pajopkon roha ni TUHAN, i ma dua lombu jantan sada biri-biri jantan dung i pitu anak ni biri-biri jantan na marumur sataon jana na so martihas.

²⁸Haul gandum na angkon lehenon, i ma topung na marcampur dohot miak zetun. Tolu kilogram tu ganop sada lombu jantan dua kilogram tu ganop biri-biri jantan

²⁹jana sakilogram tu ganop anak ni biri-biri.

³⁰Lehen hamu muse sada hambeng jantan na gabe haul hasesaan ni dosa. Dohot pangalaho na songon i ma hamu patuluskon karejo hasesaan ni dosa ni na bahat.

³¹Angka haul on rap dohot haul anggur na gabe tamba-tamba tu haul situtungon siganop ari do i dohot haul gandum.”