Read Batak Angkola BILANGAN 29 Bible Online

BILANGAN 29 - Batak Angkola bible

BILANGAN 29

¹“Di tanggal sada bulan pitu angkon marlagut do hamu maribadat, nada tola mangkarejohon barang aha pe. Di ari i angkon paluon ma angka sarune.

²Haulkon hamu ma haul situtungon tu TUHAN, i ma: sada lombu jantan, sada biri-biri jantan dohot pitu biri-biri na marumur sataon sudena i na so martihas. Uap ni haul i ma pajopkon roha ni TUHAN.

³Haulkon hamu ma haul gandum na dung nitontuhon, i ma topung na nicampur dohot miak zetun; tolu kilogram tu lombu jantan, dua kilogram tu biri-biri jantan,

⁴jana sakilogram tu ganop anak ni biri-biri.

⁵Lehenon muse ma sada hambeng jantan gabe haul hasesaan ni dosa. Di bagasan pangalaho na songon i ma patulusonmunu karejo hasesaan ni dosa ni na bahat i.

⁶Angka haul on ma na gabe tamba-tamba tu haul situtungon na dilehen rap dohot haul gandumna, di tanggal sada ganop bulan. Laing gabe tamba-tamba do i tu haul situtungon siganop ari na dilehen rap dohot haul gandum dohot haul aek ni anggurna. Uap ni angka haul sipanganon i pajopkon roha ni TUHAN.”

⁷“Di tanggal sampulu bulan pitu, angkon marlagut do hamu laho maribadat. Di ari i marpuaso ma hamu jana nada tola mangkarejohon barang aha pe.

⁸Haulkon hamu ma haul situtungon tu TUHAN, i ma: sada lombu jantan, sada biri-biri jantan jana pitu anak ni biri-biri jantan na marumur sataon, sudena i na so martihas. Uap ni haul i do pajop roha ni Tuhan.

⁹Haulkon hamu muse ma haul gandum songon na dung ditontuhon, i ma topung na dicampur dohot miak zetun, tolu kilogram tu lombu jantan, dua kilogram tu biri-biri jantan,

¹⁰jana sakilogram tu ganop anak ni biri-biri.

¹¹Asing sian hambeng na dihaulkon di ari hasesaan ni dosa ni na bahat i, lehen hamu muse dope sada hambeng jantan gabe haul hasesaan ni dosa. Haul situtungon siganop ari rap dohot haul gandum dohot haul aek ni anggurna, angkon haulkonon muse do di ari i.”

¹²“Di tanggal lima bolas bulan pitu, angkon marlagut do hamu maribadat laho pasangap TUHAN. Pesta i angkon pestahononmunu pitu ari honokna. Salolot ni pesta i nada tola karejohononmunu barang aha pe.

¹³Di ari parjolo haulkon hamu ma tu TUHAN haul sipanganon, i ma tolu bolas lombu jantan jara-jara, dua biri-biri jantan, dohot opat bolas anak ni biri-biri jantan umur sataon, sudena i na so martihas. Uap ni haul i pajopkon roha ni TUHAN.

¹⁴Haulkon hamu muse ma haul gandum songon na dung ditontuhon, i ma topung na nicampur dohot miak zetun; tolu kilogram ganop lombu jantan, dua kilogram ganop biri-biri jantan,

¹⁵jana sakilogram tu ganop anak ni biri-biri. Rap dohot haul gandum i pasahat muse ma haul aek ni anggur sacukupna.

¹⁶Asing sian i angkon haulkononmunu sada hambeng jantan gabe haul hasesaan ni dosa. Haul i gabe tamba-tamba tu haul situtungon siganop ari rap dohot haul gandum dohot haul aek ni anggurna.

¹⁷Di ari paduahon haulkon hamu ma dua bolas lombu jantan na poso, dua biri-biri jantan dohot opat bolas anak ni biri-biri jantan na marumur sataon, sudena i na so martihas.

¹⁸Haulkon ma rap dohot i sude angka haul na asing na porlu tu ari parjolo.

²⁰Di ari patoluhon haulkon hamu ma sabolas lombu jantan, dua biri-biri jantan, dohot opat bolas anak ni biri-biri jantan na marumur sataon sudena i na so martihas.

²¹Haulkon hamu muse ma rap dohot i sude angka haul na asing na hasaya tu ari parjolo.

²³Di ari paopatkon haulkon hamu ma sampulu lombu jantan na poso, dua biri-biri jantan dohot opat bolas anak ni biri-biri jantan na marumur sataon sudena i na so martihas.

²⁴Rap dohot i haulkon hamu muse ma sude angka haul na hasaya tu ari parjolo.

²⁶Di ari palimahon haulkon hamu ma sambilan lombu jantan na poso, dua biri-biri jantan, dohot opat bolas anak ni biri-biri jantan na marumur sataon, sudena i na so martihas.

²⁷Rap dohot i lehen hamu muse ma sude angka haul na asing na hasaya tu ari parjolo.

²⁹Di ari paonomkon haulkon hamu ma salapan lombu jantan na poso, dua biri-biri jantan, dohot opat bolas anak ni biri-biri jantan na marumur sataon, sudena i na so martihas.

³⁰Rap dohot i haulkon hamu muse ma sude angka haul na hasaya tu ari parjolo.

³²Di ari papituhon haulkon hamu ma pitu lombu jantan na poso, dua biri-biri jantan, opat bolas anak ni biri-biri jantan na marumur sataon, sudena i na so martihas.

³³Rap dohot i haulkon hamu muse ma sude angka haul na asing na hasaya tu ari parjolo.

³⁵Di ari pasalapankon marlagut ma hamu maribadat jana nada tola mangkarejohon barang aha pe karejo di ari i.

³⁶Haulkon ma tu TUHAN i sada haul situtungon na gabe haul sipanganon, i ma: sada lombu jantan na poso, sada biri-biri jantan dohot pitu anak ni biri-biri jantan na marumur sataon jana sudena i na so martihas. Uap ni haul i pajopkon roha ni TUHAN.

³⁷Rap dohot i haulkon hamu muse ma sude angka haul na asing na hasaya tu ari parjolo.

³⁹Songon i ma aturan taringot tu haul situtungon, haul gandum, haul aek ni anggur dohot haul haluaan na angkon pasahatonmunu tu TUHAN, di angka ari pesta na dung ditontuhon i. Haul on na gabe tamba-tamba do i tu angka haul na nipasahatmunu laho manggarar niet sanga gabe haul sian jop ni roha.”

⁴⁰Dung i dilehen si Musa ma tu bangso Israel sude na niparentahon ni TUHAN i tusia.