Read Batak Angkola BILANGAN 3 Bible Online

BILANGAN 3 - Batak Angkola bible

BILANGAN 3

¹Angka on ma dakdanak ni si Harun dohot si Musa, di hatiha na manghatai TUHAN i tu si Musa di ginjang ni Dolok Sinai.

²Opat halaklahi anak ni si Harun: Si Nadab, i ma siangkaan, dung i si Abihu, si Eleasar dohot si Itamar.

³Diangkat do halahi gabe malim marhite upacara na mangusehon miak di hatiha pamiahion ni ulu.

⁴Tapi anggo si Nadab dohot si Abihu, mate di Parhorsihan Sinai do di hatiha pasahatkon api na so nihagiotan ni TUHAN. Nada adong anak di halahi na dua, jadi salolot mangolu si Harun, si Eleasar dohot si Itamar ma markarejo gabe malim.

⁵Didok TUHAN ma tu si Musa,

⁶“Suru ma marlagut Marga Levi, anso halahi gabe pangoloi di si Harun.

⁷Angkon karejohonon ni halahi angka na patut karejohonkon di Bandar ParmiananKi bope mangkarejohon tugas hamalimon dohot tu halak na bahat i.

⁸Angkon uruson ni halahi sude parkokas na di Bandar Parmianan bope mangkarejohon angka karejo tu halak Israel na asing i.

⁹Sada do karejo ni halak Levi, i ma gabe pangoloi di si Harun dohot di angka anaknia.

¹⁰Si Harun dohot angka anaknia, angkatonKu ma i mangkarejohon hamalimon; sanga ise na manguji giot mangkarejohon songon i angkon mate uhumon.”

¹¹Didok TUHAN tu si Musa,

¹²“Saonnari Au do nampuna halak Levi. Di hatiha Hubunu sude anak siangkaan ni halak Mesir, madung Hupili di Au, anak siangkaan halaklahi sian ganop ripe di Israel bope anak siangkaan ni pahan-pahanan ni halahi. Jadi, songon gonti ni anak halaklahi siangkaan di Israel, Hupili halak Levi di Au, Au do nampuna halahi. Au do TUHAN.”

¹³

¹⁴Di Parhorsihan Sinai i, didok TUHAN ma tu si Musa,

¹⁵mambaen daftar ni halak Levi mangihutkon marga dohot ripe, sude anak halaklahi na marumur sabulan sanga lobi angkon suratkonon goarna.

¹⁶Si Musa pe dikarejohon ia do na niparentahon ni TUHAN i.

¹⁷Tolu anak ni si Levi halaklahi i ma: Si Gerson, si Kehat dohot si Merari. Halak on ma ompu ni angka marga na nidok mangihutkon goar ni halahi. Dua anak ni si Gerson halaklahi i ma: Si Libni dohot si Simei. Opat do anak ni si Kehat halaklahi i ma: Si Amram, si Jisar, si Hebron dohot si Usiel. Anak ni si Merari dua halaklahi i ma: Si Mahli dohot si Musi. Halak on ma na gabe ompu ni ganop pomparan na nigoaran mangihutkon goar ni halahi.

¹⁸

¹⁹

²⁰

²¹Marga Gerson i ma sian pomparan ni si Libni dohot pomparan ni si Simei.

²²Bahat ni anak halaklahi sian Gerson na marumur sabulan tu ginjang na dung tarsurat bahatna 7.500 halak.

²³Si Eliasap anak ni si Lael do kapala ni marga on. Na masuk tu marga on, angkon marbandar sabola sian Hasundutan di pudi ni Bandar Parmianan Ni TUHAN.

²⁴

²⁵Halahi do nampuna angka urusan ni Bandar Parmianan, bope tutup sian bagasan, sian balian ni tire di pintu laho masuk.

²⁶Angka tire di alaman humaliang Bandar Parmianan dohot langgatan i, dohot tire di horbangan ni alaman i. Halahi do nampuna sude karejo na adong pardomuanna dohot angka barang na disi.

²⁷Horong ni Marga Kehat, i ma pomparan ni si Amram, Jisar, Hebron dohot Usiel.

²⁸Dakdanak na marumur sabulan dohot lobi sian i tarsurat sude 8.600 halak bahatna.

²⁹Si Elisafan anak ni si Usiel do kapala ni marga on. Na masuk tu marga on, angkon marbandar sabola Selatan ni Bandar Parmianan Ni TUHAN.

³⁰

³¹Halahi do nampuna karejo mangurus Poti Parjanjian, meja, inganan ni lampu, angka langgatan, angka parkokas na nipake ni malim di Inganan Na Badia, dohot tire na di Bilik Na Sun Badia i. Halahi do nampuna karejo na mardomu tu barang-barang na disi.

³²Kapala ni Marga Levi i ma si Eleasar, anak ni si Harun. Ia do na manyuru parkarejo di Inganan Na Badia i.

³³Na masuk tu Marga Merari i ma sian pomparan ni si Mahli dohot pomparan ni si Musi.

³⁴Halaklahi na marumur sabulan dohot na lobi sian i tarsurat sude 6.200 halak bahatna.

³⁵Si Zuriel anak ni si Abihail do kapala ni marga ni i. Na masuk tu marga on ma angkon marbandar, sabola sian Utara ni Bandar Parmianan Ni TUHAN.

³⁶Karejo ni halahi mangurus parhayu ni Bandar Parmianan, angka balok, tiang ojahanna, dohot sude parkokasna. Halahi do nampuna karejo na mardomu tu angka barang-barang i.

³⁷Halahi ma hasahatan ni angka tiang, ojahanna, hancing-hancing, angka tali na porlu tu alaman sabola ruar.

³⁸Si Musa dohot si Harun, bope angka anak ni si Harun, marbandar di jolo ni Bandar Parmianan Ni TUHAN, sabola sian Habincaranna. Karejo ni halahi do marhobas padalan upacara ibadat di halak Israel, di bagasan Inganan Na Badia i. Sanga ise halak na asing na manguji mangkarejohon songon i angkon mate uhuman.

³⁹Sude halaklahi sian Marga Levi na marumur sabulan sanga lobi sian i disuratkon si Musa mangihutkon margana be domu tu parenta ni TUHAN, sude 22.000 halak.

⁴⁰Didok TUHAN ma tu si Musa, “Sude anak halaklahi di halak Israel, Au do nampunasa. Jadi, suratkon ma goar ni ganop anak halaklahi siangkaan di Israel na marumur sabulan sanga lobi sian i. Tapi na gabe gonti ni halahi, Au mandok sude halak Levi gabe Au nampunasa. Au do TUHAN! Jana pahan-pahanan ni halak Levi i pe, Au mandok, songon gonti ni pahan-pahanan na parjolo sorang di pahan-pahanan ni halak Israel.”

⁴¹

⁴²Sude na diparentahon TUHAN i dipatulus si Musa, disurat ia sude goar ni anak halaklahi siangkaan,

⁴³na marumur sabulan dohot na lobi sian i. Bahatna sude 22.273 halak.

⁴⁴Dung i didok TUHAN ma tu si Musa,

⁴⁵“Saonnari angkon pasahatonmu ma sude halak Levi gabe Au nampunasa, songon gonti ni sude anak siangkaan halaklahi sian halak Israel; pasahat muse ma pahan-pahanan ni halak Levi gonti ni pahan-pahanan na sorang parjolo sian halak Israel.

⁴⁶Harana anak halaklahi siangkaan di halak Israel 273 halak lobi sian anak ni halak Levi jadi lobina i angkon tobusonmunu.

⁴⁷Ganop sada dakdanak, gararonmunu lima hepeng perak mangihutkon na dung ditotopkon,

⁴⁸lehen hepeng i tu si Harun dohot tu angka anaknia.”

⁴⁹Dung i dibuat si Musa ma hepeng partobus i tu angka halak na umbahat sian halahi na dung ditobus ni halak Levi i;

⁵⁰sian angka anak siangkaan ni Israel dibuat ia perak i, 1.365 hepeng perak ditimbang manurut hepeng na badia.

⁵¹Dung i dilehen si Musa ma hepeng partobus i tu si Harun dohot tu angka anaknia songon na dung ditonahon TUHAN, songon na niparentahon ni TUHAN tu si Musa.