Read Batak Angkola BILANGAN 30 Bible Online

BILANGAN 30 - Batak Angkola bible

BILANGAN 30

¹Dung i dilehen si Musa ma angka paraturan on tu angka pamimpin ni marga ni bangso Israel.

²“Muda adong sada halaklahi na marniet mangalehen bagi na aha tu TUHAN sanga mamantangkon sanga aha pe, angkon patuluson ni halahi do sude na nijanjihonna i, nada tola mose ia sian janjinia.

³Tapi muda adong sada bujing-bujing na tinggal dope di bagas ni simatobangna, mambaen sada janji giot mangalehen sanga na aha tu TUHAN. Angkon karejohononnia do sude na nijanjihonnia i sanga na ni baga-bagahonnia i. Asing ma, muda hara ni na diboto amangna janji sanga baga-baga i, jadi dirarang ia.

⁵Tapi muda kaboratan hian do amangna dompak dibege ia anaknia patuluskon niet i, gabe nada dirahut niet i be bujing-bujing i. Diampuni TUHAN i do ia, angke dirarang amangnia do ia patulus niet i.”

⁶“Sahalak dadaboru na so marbagas dope mambaen niet, sanga jolo dipikir ia sanga nada, muda dijanjihon ia mamantangkon sanga na aha, gabe dirahuti niet sanga janjinia i ma ia. Muda marbagas ia dung i tongtong do dirahut janjinia i ia, muda so kaboratan do halaklahinia di na nibegenia taringot tusi.

⁸Tapi hatiha tarbege tu halaklahinia, dirarang ia patulusonna nietna i gabe na malua ma ia sian nietnia i, diampuni TUHAN i do ia.”

⁹“Sahalak na marando sanga dadaboru na disirangkon, angkon patuluskon sude niet dohot sude janjinia mamantangkon bagi aha pe.”

¹⁰“Muda adong sada dadaboru na dung marbagas mambaen niet sanga marjanji mamantangkon bagi aha pe,

¹¹angkon patulusonnia sude na nijanjihonnia i, muda so kaboratan do halaklahinia di na nibegenia taringot tusi.

¹²Tapi muda dirarang halaklahinia do patulusonnia niet sanga janjinia hatiha dibege ia taringot tusi, gabe malua ma dadaboru i sian nietnia. Diampuni TUHAN i do ia, angke dirarang halaklahinia hian do ia, patuluskon nietna.

¹³Adong do hak ni halaklahinia pahotkon sanga mangantak sude niet dohot janji ni dadaboruna.

¹⁴Tapi di hatiha na nibegenia taringot tu niet i hape nada didok ia kaboratannia, angkon patuluson ni dadaboru i do sude haul dohot janjinia. Madung dipahot halaklahinia niet i hara ni na so didok ia kaboratannia di na nibegenia taringot tu haul i.

¹⁵Muda dirarang halaklahinia do di pudi ni ari niet ni dadaborunia, gabe halaklahinia i do na manaon hara ni na nirarangnia i.”

¹⁶Songon i ma angka paraturan na nilehen ni TUHAN tu si Musa, taringot tu niet na nibaen ni sada bujing-bujing na tinggal di bagas ni amangna, sanga pe sada halak dadaboru na dung marbagas.