Read Batak Angkola BILANGAN 31 Bible Online

BILANGAN 31 - Batak Angkola bible

BILANGAN 31

²“Uhumi ma halak Midian, hara ni pambaenan ni halahi tu halak Israel. Dung salpu i, ale Musa, marujung ma ngolumu.”

³Dung i didok si Musa ma tu bangso Israel, “Marhobas ma hamu laho marporang, angkon poranganmunu do halak Midian laho manguhum halahi, hara ni sude pambaenan ni halahi maradopkon TUHAN.

⁴Sian ganop marga ni Israel angkon adong saribu halak kehe marporang.”

⁵Jadi dipili ma saribu halak sian ganop marga ni Israel, sude dua bolas ribu halak bahatna na dung hobas marporang.

⁶Disuru si Musa ma kehe halahi marporang na niuluhon ni si Pinehas anak ni Malim Eleasar. Si Pinehas do na manjago barang-barang na badia dohot angka sarune laho mangalehen tanda-tanda.

⁷Songon na niparentahon ni TUHAN i tu si Musa, diporangi halak Israel ma halak Midian jana dibunu halahi sude halaklahi,

⁸dohot ma disi lima raja ni Midian, i ma: Si Ewi, si Rekem, si Zur, si Hur dohot si Reba. Si Bileam anak ni si Beor i pe dibunu do.

⁹Ditaban halak Israel ma dadaboru dohot angka anak ni halak Midian, jana dirampas halahi ma sude pahan-pahanan dohot sude hamoraon ni halahi.

¹⁰Angka kota dohot bandar ni halahi pe disurbu sude.

¹¹Dung dibuat halak Israel sude na nirampas i dohot ma i halak na nitaban dohot pahan-pahanan,

¹²dioban halahi ma i tu si Musa dohot tu si Eleasar dohot tu sude halak Israel. Di hatiha i dompak marbandar do halahi di tano na hornop ni Moab donok tu Batang aek Jordan paadop-adop dohot kota Jeriko.

¹³Dung i kehe ma si Musa, si Eleasar dohot angka pamimpin na asing sian Israel maninggalkon undung-undung i laho mangalo-alo tentara ni Israel.

¹⁴Dimuruhi si Musa ma angka pamimpin dohot kapala ni saribu tentara dohot kapala ni saratus tentara na baru mulak sian parporangan i.

¹⁵Disapai ia halahi, “Biasi dipadiar hamu mangolu sude dadaboru i?

¹⁶Nada he diingot hamu, angka dadaboru i do na mangihutkon sipaingot ni si Bileam. Dielek-elek halahi halak Israel maninggalkon TUHAN di Peor, jana hara ni i do dibaen na diparo TUHAN hamatean di tonga-tonga ni halak Israel.

¹⁷Antong bunu hamu ma saonnari sude anak halaklahi dohot sude dadaboru na dung jungada marcampur.

¹⁸Tapi sude dadaboru na laing bujing-bujing dope buat hamu ma i di hamu.

¹⁹Jadi saonnari hamu na dung mamunu sada-sada halak jana na dung dais tu bangke angkon tinggal hamu di balian ni parbandaran pitu ari honokna. Di ari patoluhon dohot papituhon sude hamu dohot dadaboru na nitaban i, angkon paiaskon diri.

²⁰Ganop pakean bope sanga aha pe tehe na nipauli sian bobak, imbulu ni hambeng sanga hayu angkon paiason.”

²¹Dung i didok si Eleasar ma tu angka halak na baru mulak sian parporangan i, “On ma angka paraturan na nilehen ni TUHAN tu si Musa.

²²Sude na tahan tu api, songon sere, perak, tumbaga, bosi, simbora na bontar dohot simbora na lomlom, angkon nipaias marhite na manutung tu api. Sude barang na asing i na so tahan tu api, angkon dipaias dohot aek.

²³

²⁴Di ari papituhon angkon basuonmunu do pakeanmunu, disi pe anso ias hamu, dung i tola ma hamu masuk tu bagasan parbandaran i.”

²⁵Didok TUHAN ma tu si Musa,

²⁶“Ho dohot si Eleasar, rap dohot pamimpin na asing na sian halak Israel, etong hamu ma sude barang na nirampas i dohot angka na nitaban bope pahan-pahanan.

²⁷Sude barang na nirampas i angkon dibagi dua, dos bahatna, sabagian ma i tu tentara jana sabagian nari di rayat i.

²⁸Bagian ni TUHAN i, buat ma sian bagian ni tentara i sada sian lima ratus, bope sian halak na nitaban, bope sian lombu, halode, biri-biri dohot hambeng.

²⁹Lehen ma tu si Eleasar gabe silehen-lehen na mardohonan tu TUHAN.

³⁰Sian bagian na nilehen tu halak na bahat i, angkon buatonmunu sada sian lima pulu, bope sian halak na nitaban, bope sian lombu, halode, biri-biri dohot hambeng. Lehenon ma i sude tu halak Levi na manjago Bandar Parmianan Ni TUHAN.”

³¹Dipatulus si Musa dohot si Eleasar ma sude na niparentahon ni TUHAN i.

³²Asing sian angka na nibuat ni angka tentara di halahi sandiri, sude na nirampas i bahatna: 675.000 biri-biri dohot hambeng, 72.000 lombu, 61.000 halode dohot 32.000 bujing-bujing.

³³

³⁴

³⁵

³⁶Satonga sian i dilehen tu tentara, songon on ma bilanganna: 337.500 biri-biri dohot hambeng sian i 675 ma silehenon tu TUHAN, 36.000 lombu, 72 ma i tu TUHAN, 30.500 halode, 61 ma i tu TUHAN; 16.000 bujing-bujing, 32 halak ma i tu TUHAN.

³⁷

³⁸

³⁹

⁴⁰

⁴¹Dung i dipasahat si Musa ma bagian ni TUHAN i tu si Eleasar gabe silehen-lehen na mardohonan tu TUHAN, songon na niparentahon ni TUHAN i.

⁴²Bagian ni rayat i dos do bahatna dohot bagian ni tentara: 337.500 biri-biri dohot hambeng, 36.000 lombu; 30.500 halode dohot 16.000 bujing-bujing.

⁴³

⁴⁴

⁴⁵

⁴⁶

⁴⁷Songon na dung diparentahon TUHAN i dibuat si Musa ma sada sian lima pulu halak na nitaban dohot pahan-pahanan, lalu dilehen ia tu halak Levi na markarejo di Bandar Parmianan Ni TUHAN.

⁴⁸Dung i ro ma angka kapala ni tentara ni halak Israel manopot si Musa

⁴⁹paboahon, “Tuan, madung hami etong sude tentara na di toru ni parentanami, disi do halahi sude nada adong na mago.

⁵⁰Saonnari adong do hami oban angka barang sere, golang tangan, golang pat, tintin, anting-anting dohot borgok na hami buat be. Sudena i hami haulkon tu TUHAN songon garar ni hosanami anso tongtong didongani Ia hami.”

⁵¹Dung i dijagit si Musa dohot si Eleasar ma sere i, sudena i marrupahon barang parhiasan.

⁵²Na nilehen ni kapala ni tentara i giot adong ma dua ratus kilogram boratna.

⁵³Angka parajurit na so kapala mambuat barang na nirampas i di halahi sandiri.

⁵⁴Dung i dioban si Musa dohot si Eleasar ma sere i tu Bandar Parmianan Ni TUHAN, anso dijagohon TUHAN i bangso Israel.