Read Batak Angkola BILANGAN 36 Bible Online

BILANGAN 36 - Batak Angkola bible

BILANGAN 36

¹Dung i kehe ma angka kapala ripe sian Marga Gilead anak ni si Makir pahompu ni si Manase anak ni si Josep, manopot si Musa dohot angka pamimpin ni halak Israel.

²Ninna halahi, “Disuru TUHAN i do hamu mambagi tano i di halak Israel gabe tano pusako marhite undi. Laing Ia do na manyuru hamu mangalehen tano pusako i tu kahangginami si Zelafehad bagihononna di boruna.

³Tapi porlu do ingoton muda marbagas halahi dohot halaklahi sian marga na asing, jadi marga na asing noma nampuna tano i. Muda songon i, tano na dung ditontuhon hian di hami gabe mur murak.

⁴Di Taon Paulakkon, di bangso Israel, dipaulak ma tu nampuna parjolo angka arta teanan na dung targadis, gabe hot ma tano ni boru ni si Zelafehad i gabe teanon ni halaklahi ni halahi, gabe agoan tano ma marga nami.”

⁵Dung i dipabolkas si Musa ma tu halak Israel angka parenta na sian TUHAN, “Sanga aha na nidok ni Marga Manase i tutu do.

⁶Jadi hara ni i didok TUHAN do bahaso angka boru ni si Zelafehad i tola marbagas sanga tu ise giot ni halahi, asal ma laing di bagasan marga ni halahi.

⁷Tano pusako ni halak Israel hot do i ganop di margana be.

⁸Ganop dadaboru na manean tano pusako di ganop Marga Israel, angkon laing tu marga i do ia marbagas. Muda songon i, sude halak Israel manean tano pusako sian ompungna

⁹hara ni i nada morot be tano pusako i sian marga na sada tu marga na asing. Ganop marga ni bangso i hot ma manean tano pusako ni halahi be.”

¹⁰Jadi songon na dung diparentahon ni TUHAN i tu si Musa, boru ni si Zelafehad na lima i,

¹¹i ma si Mahla, si Tirsa, si Hogla, si Milka dohot si Noa marbagas tu iboto ni halahi.

¹²Marbagas tu angka marga na di bagasan Marga Manase anak ni si Josep ma halahi. Marhite na songon i gabe hot ma tano pusako na nitean ni halahi sian ama ni halahi.

¹³On ma angka aturan dohot hatontuan na nilehen ni TUHAN tu halak Israel marhite si Musa dompak maradian halak Israel di tano na hornop na di Moab mardonokkon Batang aek Jordan paadop-adop dohot Jeriko.