Read Batak Angkola BILANGAN 4 Bible Online

BILANGAN 4 - Batak Angkola bible

BILANGAN 4

¹Disuru TUHAN si Musa

²mambaen paretongan ni halak Levi sian Marga Kehat, mangihutkon horong ni marga dohot tu pomparanna be.

³Lalu manyuratkon goar ni sude halaklahi sian na marumur tolu pulu dohot lima pulu taon, na tarbaen markarejo di Bandar Parmianan Ni TUHAN.

⁴Karejo ni halahi, i ma mangurus barang-barang na sun badia i.

⁵Dilehen TUHAN ma angka parenta tu si Musa songon on: Muda dapot hatiha mambuka parbandaran i, angkon masuk ma si Harun dohot angka anaknia tu Bandar ParmiananKu, lalu paijurkon tire na di jolo ni Poti Parjanjian, dung i ditutup ma Poti i dohot tire i.

⁶Dung i angkon tutupon ni halahi dope dohot sangkarambar bobak na halus, dung i dipahirbang ma sangkarambar abit na rata langit di ginjangna, dung i dipamasuk ma hayu pamorsan ni Poti i.

⁷Angkon pahembangon ni halahi muse sada abit na rata langit di ginjang meja inganan ni roti silehenon tu TUHAN i, di ginjang meja i angkon payakkonon pinggan, talam inganan ni hamonyan, talam inganan ni haul dohot mangkuk inganan ni aek ni anggur sihaulkonon. Angkon tongtong do adong roti di meja i.

⁸Sudena i angkon tutupon ni halahi dohot sangkarambar abit na rara, lalu dipahirbang di ginjangna i sangkarambar bobak na halus, lalu dipamasuk hayu pamorsan ni meja i.

⁹Angkon buaton ni halahi muse sangkarambar abit na rata langit laho manutup inganan ni lampu dohot angka lampuna, jungkit-jungkitna dohot pangintopina bope sude inganan ni miak zetun.

¹⁰Inganan ni lampu dohot sude parkokasna angkon bungkuson di bagasan sangkarambar bobak na halus dung i dipayakkon di ginjang ni inganan pamorsananna.

¹¹Dung i pahirbangon ni halahi ma sangkarambar abit na rata langit di ginjang ni langgatan sere i jana ditutup muse dohot sangkarambar bobak na halus, dung i dipamasuk ma hayu pamorsan ni langgatan i.

¹²Sude parkokas na nipake di Inganan Na Badia i, angkon buaton ni halahi jana bungkuson tu abit na rata langit, dung i ditutup muse dohot sangkarambar bobak na halus, dung i dipayakkon di ginjang ni inganan pamorsananna.

¹³Angkon paiason langgatan i ulang adong abuan na marisi tabo-tabo, dung i pahembangon sangkarambar abit na bunga torung di ginjangna.

¹⁴Di ginjangna i muse angkon payakkonon ni halahi di langgatan i sude parkokas na nipake hatiha maribadat di langgatan i: Inganan ni api, garpu, sodok dohot sambong. Dung i tutupon ni halahi ma i dohot sangkarambar bobak na halus lalu dipamasuk hayu pamorsan i.

¹⁵Muda dapot hatiha mambuka parbandaran i horong ni Marga Kehat angkon ro be ma mamorsan barang-barang na badia i, tapi angkon dung sidung pe ditutupi si Harun dohot angka anaknia barang-barang bope parkokasna i. Angke halak sian Marga Kehat, nada tola dais tu barang-barang na badia i, muda dais halahi angkon mate halahi. Songon i ma karejo ni Marga Kehat muda giot paimbaron ma Bandar Parmianan.

¹⁶Si Eleasar anak ni si Harun do hasahatan ni sude Bandar Parmianan dohot miak tu angka lampu, hamonyan, haul gandum, miak upacara bope sude na adong di Bandar Parmianan na dung mardohonan di TUHAN i.

¹⁷Didok TUHAN ma tu si Musa dohot tu si Harun,

¹⁸“Anggo angka barang on na dung mardohonan do on di Au. Antong jagohon ma anso ulang donok angka halak Kehat i tusi. Angkon mate do halahi muda donok halahi tusi. Jadi, anso ulang tarjadi na songon i, masuk ma si Harun dohot angka anaknia tu Bandar Parmianan paboahon tu halak Kehat i sanga aha na giot obanonna.

²⁰Tapi muda laing masuk dope halak Kehat i tu bagasan mangaligi angka malim i manyimpan barang na badia na giot pindahonon i, angkon mate do halak Kehat i.”

²¹Disuru TUHAN ma si Musa

²²mamilangi halak Levi sian Marga Gerson mangihutkon horong ni marga i dohot tu pomparanna be.

²³Angkon suratkonon ni si Musa goar ni sude halaklahi na marumur antara ni tolu pulu taon dohot lima pulu taon na dung tarbaen dohot markarejo di Bandar Parmianan Ni TUHAN.

²⁴Halahi ma disuru maroban angka barang on:

²⁵Bandar Parbadia dohot angka barang: Tutup ni Bandar Parmianan sian bagasan, tutup sian ruar, abit sian bobak na halus panutup sian ginjang, tire ni pintu ni Bandar Parmianan,

²⁶angka tire dohot tali na di alaman humaliang Bandar Parmianan dohot langgatan, tire ni pintu tu alaman bope sude karejo na mardomu tu angka barang i.

²⁷Angkon jagoon ni si Musa dohot si Harun do karejo na nilehen ni si Harun dohot angka anaknia i, karejo na lalu tu Marga Gerson, bope sude barang siporsanon anso diporsan.

²⁸I ma karejo ni Marga Gerson di bagasan Bandar Parmianan. Sude karejo i angkon karejohonon ni halahi mangihutkon pangatur ni si Itamar anak ni si Harun.

²⁹Disuru TUHAN ma si Musa mamilangi halak Levi sian Marga Merari mangihutkon horong ni marga dohot pomparanna be.

³⁰Angkon suraton ni si Musa goar ni sude halaklahi na marumur tolu pulu taon tu lima pulu taon na dung tarbaen markarejo di Bandar Parmianan Ni TUHAN.

³¹Disuru do halahi maroban parhayu ni Bandar Parmianan, angka balok, tiang dohot ojahanna.

³²Dohot angka tiang na di alaman humaliang Bandar Parmianan dohot ojahanna, pago-pagona, angka tali bope sude parkokas na nipake laho pajongjongkon. Ganop halak ditontuhon do siobanonna.

³³Songon i ma na dilehen tu halak sian Marga Merari taringot tu karejo di Bandar Parmianan, jana karejohonon ni halahi karejo i mangihutkon pangatur ni si Itamar anak ni si Harun.

³⁴Songon na dung diparentahon TUHAN gabe dibaen si Musa, si Harun dohot angka hatobangon ni bangso i ma pamilangion patoluhon tu Marga Levi na tolu i, i ma Kehat, Gerson dohot Merari. Dibaen halahi pamilangion i sian marga tu marga, bope marsasaompu. Disuratkon halahi goar ni sude halaklahi na marumur antara ni tolu pulu taon dohot lima pulu taon na dung tarbaen dohot markarejo di Bandar Parmianan Ni TUHAN. Songon on ma na dapot disi: [MARGA] — [BAHATNA] Kehat — 2.750 Gerson — 2.630 Merari — 3.200 Sudena: — 8.580

⁴⁹Domu tu parenta ni TUHAN i marhite si Musa, sude halak angkon didaftarkon jana dilehen karejona be sanga aha pe na angkon karejohononna jana sanga aha na angkon porsanonnia.