Read Batak Angkola BILANGAN 8 Bible Online

BILANGAN 8 - Batak Angkola bible

BILANGAN 8

¹Didok TUHAN ma tu si Musa,

²“Dokkon ma tu si Harun, muda giot dibaen ia lampu na pitu i tu inganan parlampuan i, angkon denggan ditutung ia anso torang sinondangna i tu jolo.”

³Dung i dipatulus si Harun ma songon na niparentahon ni TUHAN i. Ditutung ia ma lampu dipaadop ia adop jolo ni inganan ni lampu i.

⁴Anggo inganan ni lampu i sian ginjang lalu tu toru, dibaen sian sere na nitopa do songon na dung dipaboa ni TUHAN i hian tu si Musa.

⁵Didok TUHAN ma tu si Musa,

⁶“Paasing ma angka halak Levi sian halak Israel na asing i jana baen ma upacara paiaskon tu halahi,

⁷songon on ma pambaenna: pispis ma halahi dohot aek na dung mardohonan di upacara i, dung i suru halahi mancukur sude pamatang ni halahi dohot mamasu pakean ni halahi. Dung i gabe ias ma halahi mangihutkon ugamo.

⁸Dung i suru muse halahi mambuat sada lombu jantan na poso dohot haul gandum, i ma topung na dung dicampur dohot miak zetun. Dung i ho pe Musa angkon buatonmu sada lombu jantan na asing gabe haul hasesaan ni dosa.

⁹Dung i suru ma marlagut sude halak Israel jana dokkon halak Levi jongjong di jolo ni Bandar ParmiananKu.

¹⁰Payakkonon ni halak Israel ma tangan ni halahi tu ginjang ulu ni halak Levi,

¹¹dung i lehenon ni si Harun ma halak Levi i gabe silehen-lehen na mardohonan sian halak Israel di Au, anso tarkarejohon halahi karejongKu.

¹²Dung songon i payakkonon ni halak Levi i ma tangan ni halahi tu ginjang ulu ni lombu jantan na dua i, na sada haulkonon ma i gabe haul hasesaan ni dosa, na asing i gabe haul situtungon. Dohot pangalaho na songon i ma malua halak Levi i sian dosa ni halahi.

¹³Pasahat ma halak Levi i, gabe silehen-lehen na mardohonan di Au jana dokkon ma si Harun dohot angka anaknia i manguluhon halahi.

¹⁴Songon i ma dalanna baenonmunu paasingkon halak Levi sian halak Israel na asing i, anso gabe Au nampuna halahi.

¹⁵Dung dibaen hamu upacara pasahatkon halak Levi i, gabe marhak ma halahi markarejo di bagasan Bandar ParmiananKu.

¹⁶Madung Hubaen halahi gonti ni sude anak halaklahi siangkaan di Israel, jadi na dung Hupili do halahi gabe di Au sandiri.

¹⁷Di hatiha na Hubunu sude anak siangkaan di Mesir, anak halaklahi siangkaan sian ganop marga di Israel dohot sian pahan-pahanan na parjolo adong, madung Hubaen Au puna sandiri.

¹⁸Jadi saonnari na gabe gonti ni sude anak siangkaan ni Israel, Hubuat halak Levi

¹⁹songon silehen-lehen sian halak Israel. Jadi Hulehen ma halak Levi i tu si Harun dohot tu anakna, anso tarbaen halak Levi i markarejo gabe malim di halak Israel dohot di bagasan Bandar ParmiananKu. Dung i anso gabe halak Levi i ma mangido ampun sian Au hara ni bangso i, anso ulang hona parmaraan muda madonok tu halahi ro tu Inganan Na Badia i.”

²⁰Hara ni i dihaulkon si Musa, si Harun dohot sude bangso Israel ma halak Levi tu TUHAN songon na dung diparentahon Tuhan i tu si Musa.

²¹Dung i halak Levi i pe angkon paias diri halahi mangihutkon ugamo dohot mamasu pakean ni halahi, jadi lehenon ni si Harun ma halahi gabe silehen-lehen na mardohonan tu TUHAN. Angkon baenonnia muse do karejo hasesaan ni dosa ni halahi.

²²Dipatulus halak Israel do sudena na diparentahon ni TUHAN i tu si Musa taringot tu halak Levi. Dung songon i marhak ma halak Levi markarejo di bagasan Bandar Parmianan Ni TUHAN marguru tu pangatur ni si Harun dohot anakna.

²³Didok TUHAN tu si Musa,

²⁴“Mamungka sian na marumur dua pulu lima taon halak Levi, angkon markarejo halahi di bagasan Bandar ParmiananKu.

²⁵Jana dung marumur lima pulu taon halahi malua ma halahi sian karejona i.

²⁶Dung songon i tola do urupannia halak Levi na asing na markarejo di Bandar ParmiananKu. Tapi sada pe karejo nada tola karejohonon ni sahalak sajo. Songon i ma pangalahona aturkononmu karejo ni halak Levi.”